LUSHA GAM LADAW LABAN (3)
(3rd Sunday of Lent, Cycle C)
Tsawra ai nu wa hpu nau ni ndai Laban gaw, Shaning C a Lusha Gam Ladaw Laban ( III ) rai nga ai..
Mare masha ni hpe masu sha ai lam hta grai myit ra sharawng ai sagu rem shabrang langai mi nga ai. Shi gaw shi a sagu ni hpe kahtawng na loi tsan ai shara de shat jaw sha na matu sagu ni hpe gau sa wa ai, dai ngut ai hpang shi gaw shi a sagu ni hpe chyahkyawn ni sa htim gasat nga ai lam kahtawng masha ni hpe jahtau let garum hpyi ai hku na masu tsun tsun rai galaw lai wa ai. dai zawn shi garum hpyi ai shaloi mare masha ni mung Lahkawng masum lang hkrit kajawng let lagat pru nna, garum na matu sa wa tim, hpang jahtum e sagu rem wa a masu tsun ai ga hpe sha hkrum lai wa ai..dai majaw shanhte gaw sagu rem wa a masu tsun ai lam hpe hpang e n kam mat ai. hpang jahtum e, kaja wa chyahkyawn nkau mi shi a sagu ni hpe sa htim ai shaloi mare masha ni hpe karum hpyi lai wa ai raitim shanhte gaw shi a galoi.mung masu tsun chye ai ga a majaw, hpa zawn n’nawn kau ya ma ai..dai majaw hpang jahtum e sagu ni hpe sum mat ra ai.
Ndai mabyin gaw Galoi mung hkalem hkalau chye ai lam gaw lani mi hta anhte hpe jahten sharun kau shangun nga ai zawn hkrat sum kau shangun chye nga ai. tsawra ai nu wa ni.. Anhte gaw myit mada da ai asi si ra ai, n rai yang hten za ai lam gaw anhte hta du wa na re. Ndai bat na Kabu Gara Shiga hta, Yesu gaw Yuda masha ni hpe, asi n si ai maihpang hpun a ga shadawn hte, myit malai n lu ai ..asi n si rai yang, kran kau hkrum na lam, sadi jaw da nga ai. Ndai ga shadawn gaw Karai Kasang a tara rap ra ai lam nga ai, myit galu kaba ai lam hte tara jeyang ai lam hpe shapraw dan ya nga ai.
Yuda masha ni a matu Maihpang Hpun hte rau tsanlun hpun ni hpe manu dan ai hpun ni hku nna masat da ai hpe mu mada ai. Maihpang hpun ni hpe hpun yawng hta asi si dik ai hpun ngu masat da ai mung rai nga ai. dai hpun gaw laning mi hta hkai masum lang si si ai. Shawng nnan na asi si ai gaw June shata htum wa de rai nga ai; lahkawng ngu na gaw, August shata hta min nna, di jahkraw la nna, maigan de dut shabra ai rai nga ai, masum ngu na gaw September shata hta myin ai raitim shawng na daram manu gaw n law ai. ndai bat na Kabu Gara Shiga hta na la lu ai maihpang hpun gaw, Masum ning tup asi n si ai hpun hku nga nga ai hpe mu lu ai..dai hpun hpe kajik dik gasau nga ai shara hta hkai da ai rai tim asi n si lai wa ai, asi n si ai hpun hta akyu nrawng ai lam masum nga ai: asi n si ya lu ai; dai gaw, asi si ai hpun ni matu manu dan ai shara hpe majoi shachyat ya ai lam rai nga ai, hpang jahtum e, ga sau ni hpe akyu nrawng hku jahten kau ya nga ai. Dai majaw, dai zawn akyu n rawng sai asi n si si ai hpun ni hpe kran kau na matu sun sin ai wa a lit tai wa ai..Hpun ni hte rau masha ni mung dai zawn sha rai nga ai.
Asi n si ai Maihpang hpun ga shadawn gaw, Israela amyu hte anhte ni hpe madung da tsun ai lam rai nga ai. Israela gaw lata la hkrum ai amyu rai nga ai. Karai Kasang gaw shanhte hpe lata la nna Ga Sadi Tawn Da Ai Mungdan – nga chyu hte lagat ntsin lwi ai lamu ga de woi wa sai rai nga ai. mauhpa lam ni hku nna shanhte a hpyen ni a lata na makawp maga hkrum ai. Shanhte a hpyen ni – Moba, Amon, Meuni, Hpilisti, Babelon, Persi hte kaga law law ni gaw, shanhte hta grau law ai hte n-gun ja ai raitim, Israela ni hpe laksan hku nna karai kasang gaw makawp maga ya lai wa ai majaw, shanhte hpe kadai mung n dang shamyit kau lu ma ai.
Karai Kasang gaw shanhte hpe hpun langai hkai da ai zawn dai hpun hta na asi si wa na hpe myit mada nga ai..tsun mayu ai gaw amyu masha ni a sadi dung ai lam hte madat mara ai lam hpe myit mada nga ai. raitim Shanhte gaw madat mara lam ngu na asi n si ai sha n-ga, myit malai lu ai hku nna asi si na ngu ai ga sadi hpe pyi n madun lai wa ai. Karai Kasang gaw shanhte hpe ahkaw ahkang hte shaman chyeju ni hpe n hpaw nya jaw ya ai raitim, shanhte gaw Shi a shaman chyeju ni hpe bai nhtang jaw ai lam n nga lai wa ai. Dai majaw, tara rap ra ai lam hku nna, Karai Kasang kawn kabai kau hkrum na hte, daw kau hkrum na matu ging dan nga nga ai.
Tsawra ai nu wa hpu nau ni Kashin kamun hkam la ngut sai ni anhte yawng gaw Karai Kasang a nawku hpung hta shang lawm nga lu ai shaman chyeju hkam la lu ai, bai anhte gaw lata la ai shara hta hkai da hkrum ai lakum hpun hte bung nga ai. Anhte a myit masin hte anhte a prat gaw Kabu Gara Shiga hte nawku hpung a sharin achyin ya ai lam ni hte maren nga sa ra ai. Ndai gaw anhte kaw na ra sharawng ai asi rai nga ai. dai majaw anhte mung Htap htuk kaja ai asi si ra ai.
Dai ni na Kabu Gara Shiga hta lawm ai maihpang hpun gaw masum ning tup matut manoi asi n si ai lam tsun da nga ai. Sun Madu a lanu lahku ai lam hte myit tsang ai lam a matu, laning mi hta hkai masum lang asi si ra ai Raitim, masum ning laman hta nam si langai mi pyi n si lu ai. maihpang hpun a matu law dik asi si na matu aten gaw masum ning sha rai nga ai. Dai Nta madu wa gaw, shi hkum nan asi si na hpe myit mada let sa wa ai rai tim, dai maihpang hpun kaw na asi si nga na hpe myit mada lu mai nga ai. Shi gaw masum ning tup myit galu let la lai wa ai raitim, dai hpun hta e asi si na kumla n nga lai wa ai. dai hta e Sun Madu wa a myit galu ai lam gaw tara rap ra ai lam sha n-ga, shakawn hpa mung rai nga ai.
Israela labau hta, sun madu a myit galu let ala ai masum ning hpe Babelon de bawng dung ai aten garai n du shi ai, bai bawng dung hkrum ai hpang na aten gaw kashin kamun sara wa Yawhan hte Yesu shi nan hkaw tsun hpang ai aten hpe tsun mai nga ai; shing nrai, jahtum aten du wa sai Yesu a shawa magam bungli masum ning hpe tsun mayu ai mung rai na re. Karai Kasang gaw Israela masha ni kaw na asi nkau mi hpe mu lu na matu myit galu let la lai wa ai raitim, kaman lila sha rai mat nga ai. Karai Kasang a myit galu kaba ai lam hpe, gingdan ai asi n si ai sha, Kabu Gara Shiga hte nawku hpung a akyu ara ni hpe hkam sha lai wa sai ni pyi, grai law hkra, grai tsan ai de rawt jat wa shangun nga ai. Hkristan ni a asi n si ai lam gaw, asi n si ai maihpang hpun zawn, asi n si ai sha n-ga, kaga ni hpe mung hkra machyi shangun nga ai. Kaga masha ni hta nga ai kaja ai lam hpe myit daw shangun ai sha n-ga, shanhte a n hkru n kaja ai lam hpe mung n-gun jaw, madi shadaw ya ai lam tai nga ai.
Ya na zawn akyu n rawng ai hpun ni hpe galu kaba wa hkra tawn da ai shaloi, akyu n jaw n kaja ai lam ni hpe grau nna shabyin ya na sha rai nga ai. Dai majaw dawm kau ra ai. Asi n si ai hpun ni zawn, asi n si ai Hkristan ni mung dai zawn sha rai nga ai. Dai maihpang hpun gaw masum ning tup asi n si ai shaloi, ningwa hpe nhpang hte shi a ru pawt hta da ging nga ai..raitim nhtu hte hpun a lapran hta, sun galaw ai wa a hpyi nem ai ga chyu sha tang du shang lawm nga lu ai dai gaw – ‘Madu e, ndai shaning hta mung, ngai dai hpun a grup yin hpe htu nna, ga sau hpe bang rai naw pawm ya na nngai ngu nna tsun lai wa ai.’ Yuda masha ni a mabyin hta, lapran hshang lawm ai Sun galaw ai wa kaba gaw Yesu Hkristu rai nga ai. Hpang jahtum hku na ahkaw ahkang langai mi hpe Yuda masha ni a lapran Shanhte myit malai lu na matu Shi hkum nan pahkam hkam la ya lai wa ai raitim, shanhte gaw Shi hte Shi a Kabu Gara Shiga hpe ningdang kau ai. hkristu a hkaw tsun ngut ai hpang pyi.. Yuda amyu ni myit malai n lu ai ma ai majaw A.D 70 hta, Karai Kasang kabai kau da hkrum lai wa ai. rai nga ai.
Shanhte a tara jeyang ai lam gaw mu ahtem ai zawn shanhte a ntsa e yu hkrat wa ai. Roma Hpyen Dap gaw shanhte hpe shamyit kau na daram rai sai, Yerusalem mare hte Nawku Htingnu hpe mung jahten sharun kau ai. Karai Kasang a mu ningwa gaw loi loi hte n htu lu tim, grai kaja hkra htu nga ai. Karai Kasang a tara jeyang ai lam gaw aten galu na re, rai ti mung teng sha rai nga ai. Karai Kasang a myit galu ai lam mung, shadawn sharam nga ai. Dai hpun gaw asi n si yang, teng sha kran kau hkrum nna wan hta kabai bang kau ai hkrum na re. Anhte gaw ging dan ai asi si na matu lang hte lang ningdang kau ai rai yang, Karai Kasang a tara jeyang ai lam anhte a ntsa du de na ra ai; dai gaw aten garawt magang, shi a hten byak ai lam grau kaba wa magang rai nga ai. Dai majaw, tsawra ai nu wa hpunau ni e, rawt mu! Myit malai lu nna, prat hta na a shaga la ai lam hte ging dan ai asi si hpang nga mu.
Akyu hpyi saga oh hpan madu Karai Kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw lusha gam ladaw hta. masum. ngu na lanban rai nga ai
Hti Ang Ai Ja Chyum Mungga Ni Gaw
Chyum Mungga Daw I : Prumat Laika : 3: 1-8. 13-15
Chyum Mungga Daw II : 1Kor 10: 1-6..10-12
Kabu Gara Shiga : Lk 13: 1-9
Ndai Ja Chyum Mungga ni hpe hti nna myit sumru yu let, hpawt ni na nawku daw jau lamang ni hpe woi nga ga law.
