ANHTE A MYIT MADA SHARA RAI NGA AI MADU YESU HPANG DE SIT SA GA, SHI ANHTE HPE SHAMAI SHATSAI YA NA RA AI.
Vatican kaw bat mi hta kalang galaw ai General Audience hta, Wa Sarabyin Leo XIV gaw, mauhpa lamik kumla lam lahkawng hpe myit sumru yu let, Madu hpe kam hpa ai myit hte kam sham ai myit hte sa ai shaloi, anhte hpe galoi mung shamai shatsai ya lu ai lam hpe shadum n-gun jaw lai wa ai. Hpa majaw nga yang “Yesu gaw anhte a myit mada shara rai nga ai” rai nna, anhte hpe hkum hkrang, myit masin, n-gun atsam nnan jaw ya na ra ai.
“Asak hkrung lam hta myit daw myit hten ai aten ni nga ai, si hkrung si htan hkrum ai aten ni mung nga ai. Yesu hpang de sit sa wa ga: Shi anhte hpe shamai ya lu ai, Shi anhte hpe bai ja hkrung sharawt ya lu ai. Yesu gaw anhte a myit mada shara rai nga ai!”
Wa Sarabyin Leo XIV gaw, “Hkristu gaw anhte a myit mada shara” ngu ai Jubilee gabaw hte la kap nna,Yesu hpe kam sham ai ni hpe shamai shatsai ya ai atsam hpe hpaw shadan dan ai lamik kumla lahkawng hpe myit sumru yu let ya na zawn saw shaga lai wa ai.
Hkristu hpe myit masin tup the kam sham ai ni kaw na byin pru wa ai lamik kumla lahkawng.
San Marku a Kabu Gara Shiga hta tsun da ai shawng nnan na lamik kumla gaw, shinggyim wuhpawng kaw nna n san seng ai ngu nna n ju n dawng hkrum ai, machyi makaw hkrum ai raitim, shi hpe shamai shatsai ya lu ai atsam Yesu hta nga ai ngu, kam sham ai num langai mi a lam rai nga ai. Shing rai, shi gaw masha wunawng wuwa a lapran e Yesu hpe lata the ahtawk na matu shakut ai, shi a makam masham a majaw, Yesu gaw shi hpe shamai ya nna, “Shayi sha e, na a makam masham gaw nang hpe hkye la nit dai, ngwi pyaw ai hte wa su,” ngu nna tsun wu ai.
Lahkawng ngu na lamik kumla hta, shi a kasha si mat ai majaw, myit ru myit tsang hkrum nga ai kawa langai kam sham myit kaba the hpyi nem ai, Yesu gaw dai wa a kasha, num kasha hpe si ai kaw na sharawt la ai lam hpe tsun da ai. Yesu gaw, “Hkum hkrit et, kamsham ai myit sha rawng u,” ngu nna dai wa a nta de sa nna, masha yawng hkrap ngu hkrap ngoi nga ai hpe mu jang, “Ma gaw n si ai, yup pyaw nga ai,” ngu nna sharawt la ai.
Ndai lam lahkawng gaw, “Hkristu gaw anhte a myit mada shara” ngu ai Jubilee gabaw hte la kap nna, kam sham myit hte Madu hpang de kayin wa ai shaloi, Shi a atsam the yawng the hpe dang di lu ai lam hpe hpaw shadan dan nga ai.
“Yesu galaw ai lam gaw, machyi makaw shagu kaw na shamai shatsai ya ai sha n-ga, si ai kaw na mung jahkrung sharawt lu ai hpe anhte hpe madun dan nga ai,” nga nna Wa Sarabyin Leo madung da tsun let, “Htani Htana Asak rai nga ai Karai Kasang a matu, hkum hkrang si ai gaw yup pyaw ai hte bung nga ai. Teng man ai si ai gaw wenyi a si ai lam rai nga ai: ndai hpe anhte hkrit tsang ra ai!” ngu nna tsun n-gun jaw lai wa ai.
Anhte a prat hpe myit masin, hkum hkrang hpe galai shai ya lu ai
Dai num kasha hpe bai hkrung sharawt ya ngut ai hpang, Yesu gaw shi a kanu kawa ni hpe ap ya nna shi hpe lusha jaw na matu tsun ai lam hpe madi madun dan ai, ndai lam gaw Yesu anhte shinggyim masha ni hte grai ni htep ai lam hpe madi madun ai kumla langai mi rai nga ai ngu nna mung Wa Sarabyin Leo tsun ai.
Ndai lam hpe grau sung ai hku chye na la lu shangun ai hte, “Anhte yak hkak hkrum nga ai aten hta, wenyi lam hta lusha ra kadawn nga ai aten hta, anhte hpe gara hku garum nga ai hpe anhte chye ga ai kun? Bai nna, anhte hkum nan Kabu Gara Shiga hpe n hkam la, ai rai yang, gara hku lu la na kun?”
Wa Sarabyin gaw mau hpa lam langai hpra hpe myit sumru let, anhte a tsin-yam tsindam ni hpe hparan na matu Karai Kasang hpe kam sham ai lam hta hpa mung anhte hpe pat shingdang na lam n nga ai hpe madi madun dan ai.
“Kalang lang, anhte n chye na ai, makoi magap da ai hte tengman ai hku nna, chyeju gaw anhte hpang de du sa nna, anhte a prat hpe loi loi hte galai shai kau ya ai,” nga nna Wa Sarabyin mau ai the shakawn ai.
“Dai ni aten hta mung, masha law law gaw, shi a atsam hpe teng sha n kam sham ai sha, ntsa lam hku nna Yesu hpang de sit sa ai ni law nga ai. Anhte gaw anhte a nawku hpung a kata hta hkawm sa nga ga ai, rai tim, anhte a myit masin gaw shara shagu hta du nga ai.
Ndai Kabu Gara Shiga gaw, Yesu shamai shatsai na matu hpa mung yak hkak ai lam n nga ai, anhte gaw Shi hpang de sa na sha ahkyak ai, hpa majaw nga yang, Yesu anhte hpe galai shai ya na re, ngu nna Wa sarabyin n-gun jaw dat ai.
