Kahtawlik nawku hpung, Myitkyina Saradaw Ginwang kata, Myitkyina Jau Ginwang na kanu num hpung ni a ( 43 ) lang na alu sumbu hpaw poi lamang hpe jau ginwang, ginjaw num hpung ni woi awn nna ( 24. 10. 2026 ) ya shani, Myitkyina, St. Columban jawng wang na, Mungbawng htingnu hta galaw la lu sai.
Jau ginwang num hpung ni a laksan chyeju dum alu sumbu hpaw ai lam hpe lawk shagu na kanu num hpung ni shang lawm let jau ginwang madang hku nna shaning shagu laning mi hta kalang galaw ai rai nga ai.
Alu sumbu hpaw poi lamang hta lawk shagu na kanu num hpung ni gaw mahkawn yu ngwi ni ka shalat shangwi shapyaw ai, Chyoi Pra Nu Maria hte seng ai lam, Chyoi Pra Ai Wenyi hte seng ai lam Chyum Laika Ang Katut Hta Hkrup shingjawng lamang hpe mung galaw ai.
shingjawng lamang galaw ai lam a yaw shada lam;
Myitkyina jau ginwang hta asuya magam gun htinggaw ni law ai re majaw nawku hpung a sharin shaga lam, nawku hpung a labau hpe n chye ai ni law ai. Hkaja na aten mung shanhte hta n law ai, dai re majaw ndai shawa kaw ningmu jahpaw ya ai hku nna nawku hpung a yaw shada lam hte nawku hpung a sharin shaga lam gaw ndai re ngu ai lachyum hpe chye shangun mayu ai majaw shing jawng poi lamang hpe galaw ya ai re lam num hpung ningbaw jan tsun ai.
Ndai alu sumbu hpaw poi lamang galaw dat yang num hpung ni yawm dik marai 300 hte 500 daram galoi mung shang lawm ai lam nga ai. Shata lahkawng hta kalang ningmu jahpawt sharin hpawng ni hpe mung galaw ya ai. Kun dinghku hta kanu num ni kade daram ahkyak ai, nawku hpung hta kanu num ni kade daram ahkyak ai, shinggyim bawng ring lam hta kanu num ni kade daram ahkyak ai, gara hku shang lawm ra na ndai zawn re ai Ga Baw ni hte ningmu jahpaw sharin hpawng ni hpe galaw ya ai.
Dai sharin hpawng hta mung num hpung ni marai ( 200 ) daram gaw galoi mung shang lawm taw ai. Ningmu jahpaw sharin hpawng ni galaw ya ai a marang e nu num hpung ni gaw tinang hkum tinang kam hpa ai myit ni grau nga wa ai, nawku hpung hta ngai ahkyak nga ai ngu ai hpe mung shanhte mu mada hkam la wa ai. Kanu num ni makam masham hta madung dat shakut wa ai shaloi shanhte a kun dinghku hta mung shawng de na zawn ga li ga law re ai lam ni n nga wa ai, shada jahkrum bawngban chye wa nna kun dinghku ngwi pyaw simsa hkra nga sa chye ai ni law wa ai akyu ni hkam la lu nga ai.
Shang lawm ai num hpung ni a nsen:
Jan Scholastica Jangma Kaw Mai;
“Ndai alu sumbu hpaw poi hpe laning hte laning grau kaja ai hku galaw la lu ai hpe mu mada ai majaw grai kabu ai. Daining na laklai ai lam gaw chyum laika kaw na Nu Maria hte Chyoi Pra Ai Wenyi a lam hpe e ang katut, htap hkrup shingjawng lamang hpe bang ya ai majaw grai chyeju dum ai. Ndai zawn re ai lamang anhte num hpung ni hta law law bang ra ai hpe ngai mu mada ai. Ndai zawn rai shingjawng ai a marang e anhte chyum laika hte grau hku hkau wa ai, chyum laika hpe grau nna chye na hkap la nna asak hkrung lam hta e hkawm sa wa lu ai. Shingjawng ai ngu ai gaw No lu na matu sha n re, anhte num hpung ni hkum ngau shagu gwi tsap ra ai, gwi tsun ra ai ngu ai atsam marai ni hpe mung lu la ai”
Jan Veronica Lazum Htu Seng;
“Alu hpaw poi hpe ngai hku nna No ( 1 ) lang shang lawm yu ai re. Daini ngai hku nna mu mada akyu lu la ai lam gaw shada da hku hkau lam grau nna nga wa ai, lawk shagu na n bung ai atsam madun lam ni hpe mu mada la ai, ndai gaw anhte shada ningmu jahpaw ai, yawng a matu akyu lu ai lamang mung re”
Alu sumbu hpaw poi hta lu la ai Alu ni hpe gaw kaji htum ai wa hpe garum ai hta garan jai lang ai, kaji kadun nga ai Jau ginwang ni de laning mi hta kalang ningmu jahpaw lam galaw ai hta madung jai lang ai re lam Jau Ginwang a num hpung ningbaw rai nga ai Jan Rosa Nhkum Ban Htoi tsun ai kaw na chye lu ai.
