Daini na Ja Chyum Mungga hpe hti sumru yu ai shaloi e, Yesu Sape shi lahkawng hpe sasana lit shatsam ai lam na lu ga ai. Dai ni e Madu Yesu gaw, Kasa shi lahkawng hpe sharin a chyin ya nna, sasana a matu hkaw tsun na dat dat wu ai. Shinggyim masha ni a gawng kya ai lam hpe chye ai Madu Yesu gaw, shawng lam hta hpa byin wa na kun ngu ai hpe n hkrit na matu, bai tinang a ra ai rung rai ni hpe n la sa na matu, Ja gumhpraw ni hpe mung n gun sa na matu, kasa ni hpe shadum ya nga ai.
Hpan da hkrum ai du sat du myeng hkrung mahkrung, tu matu ni a ra rawng ai lam ni hpe jahkum shazup ya ai Madu Yesu gaw, shi a kasa ni a ra kadawn ai lam hpe jahpring ya na matu, tut e yu mada ya nga ai. Kadai a nta kaw raitim shang mu. Lajang da ya ai lu sha hpe sha mu. Bai nna, nanhte hpe n hkap la ai ni nga wa yang, dai myu mare kaw nna, pru mat wa mu. Nanhte a lagaw kaw kap ai numhpu hpe pyi arut jahkrat da kau mu nga tsun da nga ai. Dai majaw shiga madat nu wa ni e, dai ni na mungga hta anhte hpe alak mi Madu Yesu shadum ya ai. Dai gaw, Shi Madu Yesu a shaman chyeju hkam la lu na matu, shi a hpang hkan ai sasana magam gun ai ni hpe hkap la bau garum ra ai lam hpe mung ja ja tsun shadum ya nga ai re.
