Daini, anhte jawm sumru yu na ga-baw hpe “Chyoi Pra ai Wenyi hte Hku Hkau ai Lam” ngu nna lata da ga ai.

Shakawn Kungdan 25:14 hta, “Karai Kasang (Yaweh) hpe hkrit hkungga ai ni, shi a sung ai lam (hku hkau ai) chye nga nna, shi shanhte hpe shi a ga shaka chye lu shangun mu ai” nga nna tsun da nga ai.

Chyoi Pra ai Wenyi hte anhte hku hkau kanawn mazum ai shaloi, kaga lam ni/ kaga masha ni hte hku hkau ai lam ni kaw na n lu la mai ai “kabu gara ai” hte “hkum tsup ai namchyim” ni hpe hkam la lu ga ai.

Asak hkrung ai Karai Kasang hte anhte, matut manoi rai nna jet ai hku hkau lam kaw na lu la ai tsawra myit gaw, anhte hpe lawan ladan, mau na zawn lai shai wa shangun ai.

Karai Kasang hte hku hkau ai kaw na – sim sa ai, shim lum ai, dinghpring ai, shamai shatsai ai hte lawt lu ai lam ni hpe hkam la lu ga ai.  Chyoi Pra ai Wenyi hte nang rau hkawm jang, “Eden sun hta Adam yan Eva, Karai Kasang hte rau hkawm chyai ai zawn” nang hkam sha na re. 

Chyoi Pra ai Wenyi hta – na a matu san da ai “tsaw ra, lanu lahku ai, kaja dik ai garum shaingtau lam hka la-ing kaba” hpe nang mu tam na ndai.  Dai majaw, daini, na a salum hpe hpaw nna, Chyoi Pra ai Wenyi hku nna Karai Kasang nang hte hku hkau mayu ai lam hpe nnan bai hkam la ga.

Yawhan 15:15 hta Madu Yesu tsun ai,                                                   

“Ya kaw nna ngai nanhte hpe mayam n ngu na mani ai; kaning rai nme law, mayam gaw madu galaw ai bungli hpe n chye wu ai: nanhte hpe ngai jinghku she ngu na made ai; nye Wa kaw na ngai na la ai hte yawng, ngai nanhte hpe chye shangun ma sade ai”.

Karai Kasang gaw, shi a Amyusha ni hte rau hku hkau nga na hpe ra sharawng ai.  Dai hpe anhte gaw Chyoi Pra ai Wenyi hku nna matut manoi hkam la mai ai.  Chyoi Pra a Wenyi mung nang hte rau sak hkrung nga sa mayu ai.  Shi nang hpe lam woi madun mayu ai, shaga mayu ai, tsawra mayu ai.  Nang shi hte kanawn mazum hku hkau mayu ai hpe shadik ya mayu ai, nang myit lu ai hta grau ai hku shi galaw ya lu nga ai.

Yawhan 14:16-17 hta Yesu tsun ai,

“Ngai mung Wa kaw hpyi nna, Wa mung, nanhte hte prat tup rau nga na matu, tangman ai hte seng ai Wenyi ngu ai Shalan Shabran ai wa kaga, nanhte kaw shangun dat ya na ra ai”.

Nang gaw, Karai Kasang a chyeju hku nna “Karai Kasang shi hkumnan hte” jahpring ya ai hpe hkrum ndai.  Hpa majaw nga yang, “Chyum laika ni hpe ka da ai Wenyi, Yesu hpe si ai kaw na bai jahkrung sharawt la ai, Sape ni hpe n-gun atsam jaw ai, yawng mayawng hpe nnan hpan da ai aten hta hka-hpung ni a ntsa e wam ka-up nga ai Wenyi gaw nang hta shanu nga ai. 

Anhte hkum tsup ai asak hpe ya mung, htawm hpang de htani htana hkam la lu na matu, shi a Kasha Shingtai wudang ntsa e si hkam na matu shangun dat ya ai Karai Kasang a tsawra myit gaw kade wa kaba la nga a hka! Dai rai yang, anhte Chyoi Pra ai Wenyi hte hku hkau ai hpe gara hku gaw gap na rai ta? Shakawn Kungdawn 25:14 hta tsun da ai gaw:

“Karai Kasang (Yaweh) hpe hkrit hkungga ai ni, shi a sung ai lam (hku hkau ai) chye nga nna, shi shanhte hpe shi a ga shaka chye lu shangun mu ai”

Bai, Ehpesu 4:30 hta:

“Hkye hkrang la hkrum ai nhtoi du hkra, nanhte hpe dazik shakap ai Karai Kasang a Chyoi Pra ai Wenyi hpe myit hkum shayawn myit” nga nn tsun da nga ai.

Chyoi Pra ai Wenyi hte manang tai, hku hkau ai lam hpe kaga manang kaja ni hte hku hkau ai zawn sha hpang wa ai rai nga ai.  Anhte shi hpe hkungga ra ai, tsawra ra ai, aten jaw ya ra ga ai.  Shi hpa hpe ra ai, n ra ai ngu ai hpe mung chye da ra ga ai. 

Shi hpe shayawn kau ai lam lama ma hpe galaw kau hkrup jang mung tawngban ra ga ai.  Chyoi Pra ai Wenyi mung anhte masha ni zawn hkam sha chye nga ai.  Raitim, shi gaw, chyeju hte hpring ai, mara dat ya chye ai, masa n lata ai sha tsawra chye ai. 

Chyoi Pra ai Wenyi hte hku hkau ai hpe lu la na matu, lam masum hpe galaw mai nga ai:

1. Shi woi awn ai hpe hkan nang ra ai,
2. Tinang galaw ai lam ni, mabyin masa ni hpe shi gara hku mu mada, hkam sha ai kun, ngu nna aten la let shi hpe san ra ai,
3. Shut hpyit mara ni kaw nna, Madu Hkristu hku nna jaw ya ai dinghpring ai prat hkrun lam de, Chyoi Pra ai Wenyi woi len ai hku hkan nang ai,

Yang jang pyi gaw, shi hte manang tai na matu  shi lam woi mayu nga ai.  Na a ntsa, shi a tsawra lanu lahku ya ai chyeju hpe ru bun ya mayu nga ai.

Akyu Hpyi Ga:

1. Karai Kasang, nang hte manang tai hku hkau mayu ai lam hpe sumru yu u. Yawhan 15:15 hta Madu tsun da ai hpe bai dum ga:

“Ya kaw nna ngai nanhte hpe mayam n ngu na mani ai; kaning rai nme law, mayam gaw madu galaw ai bungli hpe n chye wu ai: nanhte hpe ngai jinghku she ngu na made ai; nye Wa kaw na ngai na la ai hte yawng, ngai nanhte hpe chye shangun ma sade ai”

• Chyoi Pra ai Wenyi, shi a tsawra ai hpe na ntsa de ru bun ya na matu akyu hpyi u.  Shi nang hte teng sha ni htep nga ai lam hpe madun ya na matu hpyi u.  Karai Kasang a ni htep ai hpe kaja wa jum hkra hkam sha mayu ai myit hpe bang ya rit ngu nna akyu hpyi u.

• Chyoi Pra ai Wenyi, hpa lam ni hpe ra ai, n ra ai ngu ai hpe san yu u.

Na a salum hpe hpaw nna, nang hpe jamjau jaw myit n pyaw shangun ai lam ni gaw hpa ni rai kun san yu u. Nang hte shi a kanawn mazum lam, na a mabyin masa ni, myit mang ai lam hte, mu jut ni hpe shi gara hku mu mada hkam sha ai kun san yu u. 

Hpang Jahtum: Karai Kasang hta kam manoi nga ga

Anhte gaw, Karai Kasang ra na re ngu nna shadu ai hte anhte ra ai daw ngu nna, ya sha sha, garan ginhka kau chye ga ai.  Kaja wa nga yang, Karai Kasang gaw anhte galaw ai lam shagu hta hkan lawm mayu ai.  Anhte a prat jut shingnaw shagu hta lawm mayu ai.  Anhte a man-ang bungli shagu hpe galaw na matu chyeju hte kabu gara ai lam bang ya mayu ai. Di, hkaban, kashin ai, baza ni hpe ye kau ai, masha law law hte akyu hpyi nawku ai zawn re ai lam shagu hta shi lawm mayu ai.

Dai majaw, Chyoi Pra ai Wenyi hpe na a sak hkrung lam jut shara shagu de hkap tau shang lawm shangun nna, Karai Kasang nang hpe garan jaw mayu ai hpaji machye machyang sutgan hte tsawra ai hpe hkam la ga.  

Yawng hpe Wa Karai Kasang shaman ya nna, tutnawng lanu lahku bau sin ya nga u ga law.