November 6–8, 2026
Wa Sarabyin Leo XIV a Kasa Hkrun Lam Uruguay de Kabu Gara Shiga hpe hkaw tsun ai, Nawku hpung hpe n-gun shaja ai, simsa lam hpe shalat ai hte shinggyim sari sadang hpe makawp maga ai lam ni hpe madung tawn nna, masum ya tup sa du gawan ai lam rai nga ai. Shi gaw Montevideo, Paysandú hte Florida mare ni de sa du nna, asuya ningbaw ningla ni, saradaw, Jau ni, nawku hpung ni, kun dinghku ni, hpaji ninghkring ni, ramma ni hte matsan mayan hkrum sha nga ai masha ni hte hkrum shaga lai wa sai.
1. November 6: Montevideo de du ai
Wa Sarabyin Montevideo de du ai hte tara shang hkap tau hkalum la lai wa sai rai nga ai. Gumsan magam Yamandú Orsi, asuya dat kasa ni, mung shawa wuhpung wuhpawng ni hte dat kasa ni hte hkrum shaga ai. Shi gaw, saradaw ni, Jau ni, nawku hpung masha ni hte rau, Metropolitan Nawku Htingnu hta rau sha akyu hpyi ai lam hpe mung galaw lai wa sai.
Nawku hpung gaw Yesu Hkristu hte Kabu Gara Shiga a myit mada lam hpe masha shagu hpang de du hkra woi sa mayu ai lam hpe ahkaw ahkang lu ai ni hpe shadum ya ai.
2. November 7: Paysandú, Casavalle hte Ramma ni
Wa Sarabyin gaw, ndai ginra de shawng nnan Kabu Gara Shiga hpe la sa wa ai sasana magam gun ni, grau nna, San Pra ai Jacinto Vera hpe myit dum let, Paysandú mare hta Chyoi Pra ai Missa hkungga hpe galaw lai wa sai. Kahtawlik Hpung masha ni hpe makam masham, tsawra myit hte myit rawt let Sasana magam bungli hpe matut galaw sa wa na matu n-gun jaw lai wa ai.
Shi gaw, Nawku Htingnu de sa du gawan ai shaloi, masha ni hpe bunghku n rai, mahkrai ni hpe gawgap ai ni tai wa nna, jinghku jingyu, kahkyin gumdin lam hte simsa lam hpe shalat ya na matu saw shaga ai.
Casavalle mare hta matsan mayan hkrum nga ai dinghku ni hte shinggyim nga pra masa hta yak hkak ai lam ni hpe hkrum sha nga ai Hkristan ni hpe, Kaja ai Samari masha a kasi hpe hkan sa let, ra kadawn nga ai ni hpe garum shingtau na matu tsun shadut da ai. Shinggyim sari sadang hpe makawp maga ai lam hta Nawku hpung, shinggyim wuhpawng hte Mungdan lapran jawm galaw sa wa na ahkyak ai lam hpe mung madi madun dan ai.
Uruguay Kahtawlik Dakkasu kaw, hpaji hte hpaji masa gaw shinggyim masha yawng hpe daw jau ra ai lam hpe ahkyak shatai nna, “masha hpe algorithm a shawng e tawn da ra ai” ngu ai npawt tara hpe tsun dan ai.
ginsup pa hta ramma ni hte rau akyu hpyi ai aten hta, Hkristu a sakse ni tai wa na matu n-gun jaw lai wa ai. Mungkan ga de nhtoi shapraw ya na matu Nawku Hpung kaba n ra ai; ahkyak ai gaw Madu a nhtoi hpe shadan dan ai lam sha ra nga ai.
3. November 8: Florida hte Nu Maria Sumshi Masum
Wa Sarabyin gaw, Uruguay mungdan a Patroness, Nu Maria a Htingnu hta, Chyoi Pra ai Missa Hkungga hpe galaw lai wa ai.
Shi a mungga hta, Hkristan makam masham hpe prat langai kaw nna prat langai de htawt sit lu na matu kun dinghku ni ahkyak ai lam hpe madi madun dan ai. Grau nna, ma ni hpe akyu hpyi sharin ya ai, shanhte a shani shagu na sak hkrung lam hku nna Karai Kasang hte hkrum shaga ya ai kanu kawa ni hpe shadum ya ai.
Ma ni Nawku hpung hte tsan gang wa ai shaloi myit mada shara n sum mat na matu kanu kawa ni hte kaji kawa ni hpe n-gun jaw ai. Makam masham gaw Karai Kasang kaw na jaw ya ai kumhpa rai nna, tsawra myit, akyu hpyi ai hte Hkristan sakse hkam ai lam hku nna kaga masha ni hpe garan gachyan ra ai lam yawng hpe shadum ya ai.
Uruguay kaw nna Argentina de n pru shi yang, mung shawa ni hpe hkap tau hkalum la ai majaw chyeju dum ai lam tsun let, makam masham, tsawra myit hte myit mada lam a nli tum ni hpe matut nna gat hkai na matu n-gun jaw da ai.