Langai hte langai chyeju kumhpa lu la ai hte maren, Karai Kasang a chyeju amyu myu hpe, kaja ai hpajau wa jau ai zawn, nanhte shada da dai hpe jau hkat nga mu. (1Peter 4:10)
Madu Karai Kasang shi a tsawra ai mung sung lam ni, anhte hpe hpaw malang dan ai lam ni hpan law law nga ai hta, makau grup yin na kam sham ai hpu nau ni hku nna mung shi a tsawra ai masin salum hpe, anhte hpe hpaw malang dan ai lam galaw nga ai. Hebre 10:24-25 “Tsawra ai myit rawng wa na hte kaja ai amu bungli byin wa na matu, shada shingjawng hkat lu hkra, langai hte langai myit tau myit htang nga ga: tinang a zuphpawng ai lam hpe n koi nkau ai sha, shada da hpe shadum shahprang ai lam grau galaw nga ga dai nhtoi du magang ra ai hpe, nanhte chye myit dai majaw, shingrai shadum shahprang shara grau nna rai nga ai.”
Anhte shada da shadum shahprang n gun jaw lam ni galaw lu hkra, Karai Kasang gaw anhte hkum shagu hpe chyeju atsam ni jaw ya nga ai. Dai chyeju atsam ni hpe sung lang nna, shada da tsawra dau jau hkat nga let, Karai Kasang a mungdan hta hkumzup ai asak aprat anhte lu la hkra shakut ra ga ai.
Kasa Pawlu tsun ai, “Anhte gaw tinang a lam hkaw dan ga ai n re ai sha, Madu Hkristu Yesu a lam hpe mung, anhte nan Yesu a jaw e nanhte a shangun ma ni rai nga ga ai lam hpe mung, hkaw dan nga ga ai. Nsin hta nhtoi htoi u ga, nga nna tsun ai Karai Kasang gaw, Hkristu a myiman kaw na Karai Kasang a hpung shingkang a chye chyang ai nhtoi hpe shapraw ya lu u ga she, anhte a kraw lawang e jahtoi ya ma ni ai. Raitimung, dai chyahtum chyalai re ai n gun atsam gaw anhte kaw na n re ai sha, ndai sutgan gaw, ga di bu hta sha anhte rawng da ga ai.” (2Kor 4:5-7)
Karai Kasang anhte hpe jaw ya ai chyeju atsam ni gaw, anhte tinang a lam hkaw dan na matu nrai, Madu Yesu Hkristu a lam hpe hkaw dan matu she re, ngu nna Kasa Pawlu shadum ai. Karai Kasang anhte hpe ap jaw ya ai chyeju atsam ni gaw, anhte n sadi la yang aloi sha bai shamat kau lu mai ai, ngu ai lam hpe shadum na matu, ndai chyeju ni gaw ga di bu hta anhte rawng da ga ai, ngu nna Kasa Pawlu tsun ai rai nga ai.
Shi Madu a tsawra ai lam hte n gun atsam hpe hpaw malang dan na matu n gun kya ai anhte hpe shi sung lang ai. Anhte a grup yin hta shanu nga ai anhte hpu nau ni gaw hkum tsup ni nrai, gawng kya ai ni re, ngu ai hpe Madu Karai Kasang chye nga ai. Hkum tsup ai, chyoi pra san seng ai masha ni hpe sha Karai Kasang shi a tsraw myit madun ai, chyeju jaw ya ai rai yang, anhte a matu myit mada shara, n gun lu hpe ntai lu na re: n gying ndan ai ni hpe Madu Karai Kasang shi a shaman chyeju ni matut nna jaw ya nga ai ngu ai lam ni hpe mu mada ai majaw she, anhte a matu myit mada shara n gun lu hpa tai nga ai rai nga ai. Anhte a hpu nau ni hta Madu Karai Kasang madun shaleng ya nga ai shi a masin salum gaw, Kawa Karai Kasang gaw anhte hpe tut e tsawra nga ai, anhte a n hkum n tsup ai, gawng kya ai lam ni a majaw shi galoi mung myit daw mat na nrai, ngu ai lam rai nga ai.
Shada da sharawt mada yu nna myit n gun lu la nga ga, n hkum n tsup ai gawng kya ai hpu nau ni hta Karai kasang madun shaleng ya nga ai shi a matsan dum lama ai lam hpe mu mada nna n gun tai nga ga. Hkum tsup chyoi pra ai majaw Karai Kasang a chyeju lu la nga ai, ngu ai masa n re ai sha, ra rawng gawng kya ai ni hpe karai Kasang tsawra myit madun nga ai, ngu ai lam hpe madaw masha ni yu mu la lu hkra galaw ga. Karai Kasang a tsawra chye dik ai shi a masin salum hpe, ga di bu hte bung ai hten ga loi ai anhte a masin salum ni hta bang da ya nga ai, ngu ai lam hpe myit dum nga let, shada da wenyi myit n gun sharawt ya hkat nga ga.
Tsawra ai myit rawng wa na hte kaja ai amu bungli byin wa na matu, shada da n gun atsam tai lu na lam hpe myit shapraw la nna, langai hte langai lachyen ginghka hkat ai lam n galaw ai sha, shada da shadum shahprang ai lam grau galaw nga ga.
Lawu na lam ni hpe myit sumru akyu hpyi mai ai:
- Kaga masha ni hku nna shi Madu a tsawra ai masin salum hpe hpaw malang dan na Karai Kasang ra sharawng nga ai, ngu ai lam hpe sumru yu mai ai;
- Kaga masha ni hta Karai Kasang a tsawra ai salum hpe mu mada wa lu hkra garum ya rit ngu nna Chyoi Pra ai wenyi kaw akyu hpyi mai ai;
- Madu Karai Kasang a tsawra ai lam hpe madun shaleng lam shabyin na matu dai ni galaw lu mai ai lam hpe myit sumru mai ai.
