Daini na Ja Chyum Mungga hpe hti sumru yu ai shaloi e, anhte ni gaw Hparishe ni hte chyum laika ka ai sara ni zawn n galaw na matu Yesu Madu shadum ya nga ai. Shanhte ni gaw Yuda my sha ningbaw ningla ni rai nna, ritkawp tara hte htunghking ni hkan sa ma ai. Shanhte gaw masha law law a man hta kaja ai hku hkan sa tim mung, Karai Kasang a tsawra myit majing hte n hkan sa ma ai. Kaja wa ra kadawng ai ni hpe garum shingtau na malai, shut ai htung lai len ni hta sha nga pyaw nga ma ai. Karai Kasang gaw, anhte a myit salum kata hta e kaja ai hte n kaja ai yaw shada ai lam ni mahkra hpe mu chye lu ai wa re.

 Anhte a shani shagu na sak hkrung lam hta, yawng a matu dingman dinghpring ai hku nga sa nga ai kun? Tinang hkum hpe san dinglik yu ra ga ai. Yesu Madu a kaba dik ai tara lam gaw, shada da tsawra nga mu nga ai tara hte maren hkan sa lu hkra shakut sa wa ra na matu Madu Yesu tsun da sai re. Tsawra myit daju Madu Yesu hte bung ai salum lu madu na matu chyeju jaw ya rit law. Shaloi jang, tinang hte ni htep ai ni, dum nta masha ni jinghku jingyu manaw manag ni sha n rai, hpyen ni a ntsa e mung tsawra myit nga lu na chyeju jaw ya rit law ngu hpyi chye ra ga ai.