Daini na Ja Chyum Mungga hpe hti sumru yu ai shaloi e, N san seng ai Nat shi a nta de bai nhtang wa ai lam na la lu nga ai. Shinggyim masha ni hta e, kaja ai hte n kaja ai galoi e mung rau nga nga ai re. Dai majaw gara wa hpe lata la nna, gara hpe kabai kau ra na ngu ai hpe mung Karai Kasang gaw myit sawn yu chye na matu machye machyang jaw da nga ai. Anhte Shinggyim masha ni she wanglu wanglang madu a myit hte Karai Kasang hpe chye lata la na ra nga ga ai. Hkristan prat a hkrun lam gaw, loi ai lapran lam hpe lata la n na, hkawm sa ai prat n re. Langai n rai yang langai hpe hkrak lata la nna hkawm sa ra ai prat re. Dai zawn lata la na matu myit, marai hte wenyi n’gun mung ra nga ai.
Madu Karai Kasang tsun ai gaw, “Ngai hpang maga n nga ai wa gaw, ngai hte nhtan shai ai wa rai nga ai. Ngai hte kahkyin gum din n re ai wa gaw, ayai aya rai nga ai nga (Lk 11:23) tsun da sai re. Wa sarabyin Yawhan Paulu mung Madu Karai a hpang de hkan ai ngu ai gaw, n hkrit n tsang shakut hkawm sa ra ai hkrun lam langai mi rai nga ai nga tsun da nga ai.
Ya nang ngai anhte a Hkristan prat hkrun lam hta, hpa baw lam ni hpe n hkrit n tsang shakut ap nawng lam ni galaw sa ngut sai kun? Madu hkum nan myit sumru yu ga.
