St.Jau Wuhpung wuhpawng hpe gaw Cardinal Charles Bo Lashio kaw Saradaw garai n byin shi yang, Apostolic Prefecture prat hta 1990 ning, May shata ( 25 ) ya shani Lashio kaw hpaw hpang da ai rai nga ai.
Shi Saradaw tai ngut ai hpang Lashio ( 6 ) ning magam gun nna, Pathien Saradaw lit magam bai gun ai. Dai hpang e Sasana magam hta ra ai nga ai shara ni hkan jai lang na matu Pathein hta Yangon Myo kaba ni hta St. Paul wuhpung wuhpawng jau, mama shalat jawng ni hpaw da ai. St. Paul jau ni a matu Pathein kaw Formation House jau, brother tai na shalat jawng hpe hpaw ai.
St. Paul jau ni a ginjaw shara gaw Pathein kaw langai nga ai, dai gaw Formation House hte Mother House rai nga ai. Bai nna jau tai mayu ai, brother tai mayu ai ramma ni hpe shalat ya ai Novice hpe Pyin Oo Lwin kaw hpaw tawn da ai. Jau tai mayu ai ni, brother tai mayu ai ni hpe kalang ta saw shaga dat mayu ai. Jau tai na, brother tai na myit lawm ai rai yang ngai hpe mung matut mahkai wa mai ai.
St. Paul ni a Sasana hta madung dat nna shang lawm ai gaw Karai Kasang a mungga hpe atsawm garai n chye shi ai ni hpe sasana galaw ai. Karai Kasang hpe garai n lu hkap la shi ai hpe n gun dat nna sasana majen je ai lam galaw ai. Karai Kasang hpe hkap la kam sham timung, atsawm garai n chye shi ai ni Karai Kasang hpe grau nna chye chyang wa na matu mung n’gun dat shang lawm nga ga ai.
Anhte St.Paul Wuhpung ni hkan lang da ai Motto gaw Madu Yesu jen noi si hkam hkrum ai shaloi tsun ai “Ngai Hka Gara Nngai” ngu ai rai nga ai. Wenyi hpe kaw si hpang gara ai ni gaw tsawra matsan dum chye ai shi kaw galoi mung sa wa na, shi kaw du wa na hpe shi galoi mung hpang gara nga ai ngu ai hpe Motto hku nna jai lang let sasana magam hta shakut nga ga ai.
Nsen shapoi lamang hpe galoi mung hkap madat nga ai Nu Wa Hpu Nau ni yawng hpe tsun mayu ai lam gaw anhte a kam sham ai lam grau nna ngang grin wa lu na matu saw shaga mayu ai. Hpa majaw nga yang ya aten anhte Mungdan hta n sim n sa, n ngwi n pyaw nga nna hkrit maja let nga ra ai prat hta anhte ni kalang lang ga san san mayu wa ai. Anhte ni nang Madu hpe galoi mung akyu hpyi taw nga ai, nang Madu hpe galoi mung manoi manat taw nga ai, raitimung nang Madu a garum shingtau ai lam anhte n mu lu wa ai zawn re ai nga nna kalang lang myit daw myit hten ai lam ni nga wa na. Raitimung Madu Karai Kasang gaw ndai zawn re ai myit daw myit hten ai lam ni a lapran, myit ru myit tsang tsin yam tsin dam lam ni a lapran hta anhte hpe galoi mung makawp maga bau sin nga ai. Anhte hte rau rai nga ai ngu ai hpe galoi mung hkam la let kam sham ai lam hta shakut nna galoi mung hkawm sa ga ngu nna n’gun jaw mayu ai.
St. Paul Jau, Brother tai mayu ai ramma ni nga ai rai yang matut mahkai wa mai ai.
Ph: 09891156245
Email – stephennawtawng@gmail.com
