Daini gaw the Heart of God to forgive (Karai Kasang a Salum gaw anhte a mara ni hpe Raw kau ya na matu re) ngu ai lam hpe jawm mit aru akyu hpyi na matu saw shaga nngai. Karai Kasang a mara dat ya ai gaw anhte ra ai daram jaw ya nga ai.
Ndai ga-baw hte seng ai chyum mungga madung hpe madat yu ga:
Yawhan a Shagun Laika Langai, daw kaba Langai, kaji jahku (1 Yawhan 1:9)
“Anhte a yubak mara hpe anhte madun nem ga yang gaw, anhte a yubak mara hpe raw dat kau na hte n ding n man ai nlang hte hta na, anhte hpe jasan jaseng mi ga, shi kangka nga ai hte dinghpring ai wa rai nga ai.”
Karai Kasang gaw shut hpyit mara hpe grai nju ndawng ai. Hpa majaw nga yang, dai gaw anhte hpe mung, kaga masha ni hpe mung hten za shangun nga ai; grau nna, Karai Kasang hte anhte a lapran na shada tsawra hkuhkau ai lam hpe dan di kau ya ai majaw rai nga ai.
Dai hkuhkau matut mahkai ai hpe bai mawai la na matu, Wa Karai gaw, shi a Kasha Yesu hpe anhte hpang de shangun dat nna dai shut hpyit mara a manu jahpu hpe wa kau shangun sai. Anhte ya sha sha, shut hpyit mara de du mat wa ai raitim, shi anhte hpe tutnawng tsawra nga ai majaw, anhte myit malai nna shi hpang de kayin wa ai hte rau, dai mara ni hpe raw dat ya nga ai. Anhte manu jahpu n jaw ra ai; Madu Yesu anhte a matu jaw ya sai; matut nna mung jaw ya nga na re.
Loi mi jawm myit yu ga:
Nang yubak mara langai ngai hpe galaw hkrup kau ai hpe na a shani shagu na galaw sa wa lam ni hta gara hku byin wa ai?
Karai Kasang hte nang bai htingram lu hkra nang gara hku galaw nta?
Nang myit malai lu na matu aten kade la a ta?
Anhte myit malai nna mara dat ya na matu hpyi nem ai hpang e pyi, shut hpyit mara a n kaja ai akyu ni hpe gaw anhte naw dum hkam sha nga na re; raitim, dai ni kaw na langai mi mung, Karai Kasang hte anhte a lapran na hkuhkau matut mahkai ai hpe dingbai dingna jaw ya lu ai n rai.
Hpa majaw nga yang, Madu Yesu gaw tsaw dik manu ngu ai – shi a asak hpe – jaw ya sai majaw rai nga ai. Dai hpe Roma, daw kaba matsat, kaji sum-shi-masum kaw nna sum-shi-jahku (8:33-39) hta Kasa Pawlu tsun da ai:
“Karai Kasang a lata la ai ni hpe kadai wa mi mara shagun lu na a ta? Karai Kasang gaw dinghpring shangun ai wa rai nga ai.
Dawdan lu ai wa gaw, kadai wa mi rai nga a ta?
Si hkam nna, rai sa, si hkam ai hta n-ga, si mat ai ni kaw na hkrung sharawt la ai hkrum nhtawm, Karai Kasang a hkra lata e rai nga let, anhte a matu mara hpyi htinglu ya ai wa, Hkristu Yesu nan rai nga ai.
Hkristu a tsawra ai hta na anhte hpe kadai wa mi jahka kau lu na a ta?
‘Na a majaw e anhte shani shagu sat kau hkrum ga ai, sat na san da ai sagu hpe zawn, anhte hpe nawn da mi ai’ nga nna ka da nga ai hte maren,
tsinyam tsindam atsu atsam, zingri zingrat ai, hku hku hpang gara ai, singu krin ai, shoihpa hkrithpa hte ri nhtu hkrum yang she, jahka kau lu na mi ni?
N rai law, anhte hpe tsawra nga ai wa a majaw, ndai yawng hte hpe anhte grau nna hkap dang kau lu ai ni rai ga ai.
Bai, Shakawn Kungdawn Laika daw kaba latsa e masum, kaji shi-lahkawng (103:12) hta mung,
“Sinpraw maga gaw, sinna maga hte tsan nga ai hte maren,
Shi anhte a shut hpyit mara hpe anhte hte shatsan kau ya mi ai” nga nna tsun da nga ai. Shi a masat tara n nga ai tsawra myit gaw anhte a mara ni yawng hpe raw dat ya na matu Karai Kasang hpe ganawng ya ai.
Anhte a mara ni hpe raw dat ya na matu shi kaw hpyi nem jang, Karai Kasang gaw dai mara ni yawng hpe malap kau ya ai.
Akyu Hpyi Ga
- Karai Kasang a simsa ai gaw nang nga ai shara hpe ka-up da yu ga. Hpyilipi, daw kaba mali, kaji kru hte sanit (4:6-7) hpe hti mai ai.
- Tinang galaw kau sai mara ni hpe myit dum lu na matu Karai Kasang kaw garum hpyi ga. Mara ni hpe tsundan tawngban na matu aten loi la u.
Shakawn Kungdawn, daw kaba latsa e masum, kaji shi kaw nna shi-mali (103:10-14) hpe hti mai ai.
- Mara ni hpe raw dat ya ai hpe hkam la u. Ndai daw gaw ahkyak dik ai daw re.
1 Yawhan 1:9 hpe hti mai ai.
Matsan dum n jin ai Karai Wa gaw nang kaw na yubak mara mahkra hpe gun la kau ya nna, lawt lu ai hte kabu aw law ai, simsa ai chyeju jaw ya u ga law.
