Wa Sarabyin Leo gaw shi a catechesis hta anhte a prat hta hpunau nauna myit a ahkyak ai lam hpe madi madun da nna, “shinggyim masha a prat lachyum” langai mi re ngu tsun shaleng dan ai. Daini na aten majan, manghkang ni a majaw hpunau nauna myit gaw yak hkak ai zawn rai nga tim, dai n lawm yang, “anhte gaw sak hkrung nga lu na, rawt jat galu kaba wa na matu, sharin hka ja la lu na matu n byin na re.” nga nna sang lang dan lai wa ai.
Wa Sarabyin Leo gaw, November 12, bat masum ya shani na General Audience hta, Hkristu a si hkam ai hte bai hkrung rawt ai lam hpe myit sumru let, ndai ‘paschal wenyi lam’ hte sak hkrung ai gaw, prat hpe myit mada shara hte hpring tsup shangun nna, kaja ai lam galaw na matu shadut ya ai lam hpe ahkyak shatai tsun shalawm da nga ai. Dai gaw ‘fraternity’ hpe mung n-gun jaw ya nga ai, dai hpe anhte a aten na kaba dik ai mayak mahkak langai mi re ngu tsun ai.
Hpunau nauna ngu ai gaw, lachyum rawng ai shinggyim nga pra masa rai nga ai—anhte kaga masha ni hte matut mahkai, nga sa lu ai atsam gaw, anhte a shinggyim nga pra masa hpe rawt jat galu kaba wa shangun nga ai. Tinang hkum tinang tsan gang nga ai shaloi, anhte gaw langai hkrai sha rai nna, tingkyeng myit rawng rawng nga ga ai. Mungkan a manghkang ni hte garan ginhka ai lam ni gaw dai hpe ningdang kau ai zawn rai tim, hpunau nauna myit gaw n mai byin ai shingran n re ai sha, tengman ai hte lu la mai ai yaw shada lam rai nna, dai hpe Karai Kasang n-gun jaw ya nga ai.
“Hpunau nauna” ngu ai lachyum hpe lakap nna, shada da lanu lahku madi shadaw hkat ai ngu ai lachyum hpe yin la nna, Wa Sarabyin Leo gaw, anhte gaw ‘yawng gaw hpunau nauna ni’re ai hpe shadum ya let, San Pra ai Francis Assisi a shakram ga “Omnes fratres” (“hpunau nauna yawng”) hte Wa Sarabyin Francis a ‘Fratelli tutti’ hta ka da ai ga hpe bai kahtap tsun ai. Tengman ai Hkristan hpunau nauna myit gaw, Yesu anhte hpe tsawra ai zawn shada da tsawra hkat ra ai ngu ai hkang da ai ga hta ru jung nga ai, nga nna tsun ai.
Myit daw myit hten ai hpe prat nnan de galai shai kau ya ai Hkristu a Hkrung rawt ai lam gaw, Shi a hpang hkan ai ni hpe Wenyi hta tengman ai hpunau nauna ni shatai ya sai. Wa Sarabyin Leo gaw, masha yawng hpe yak hkak ai lam ni a lapran langai hte langai a makau kaw tsap let, kahkyin gumdin lam, kam hpa hkat ai lam, matsan dum lama ai lam ni hpe tam na matu tsun shadut da nga ai. Hkristu jaw ya ai hpunau nauna myit gaw shinggyim masha ni hpe tinang hkum hpe sha myit ai hte garan ginhka ai lam kaw na lawt lu shangun nna, anhte a shawng nnan na shaga la ai lam hpe shani shagu tsawra myit hte myit mada lam hpe bai gram lajang ya nga ai.