Luka a Kabu Gara Shiga hta lawm ai atsam marai langai mi gaw, akyu hpyi ai lam hte seng nna grau nna sharin achyin ya ai hpe mu lu ai. Shakut sharang na matu shadut ya nga ai. Yesu gaw anhte hpe galoi mung akyu hpyi ra ai lam, myit n daw n hten ra ai lam hpe ga shadawn tsun dan ai.
Ga shadawn hta, Karai Kasang hpe mung, masha hpe mung n hkrit ai, n hkru n kaja ai tara agyi langai a lam hpe tsun da ai. Dai aten na shinggyim wuhpawng kata hta gawng kya dik htum, matsan dum lama ai ra dik htum re ai gaida jan langai mi hpe mung madun da ai. Shi a madu wa n- nga mat sai, bai hkungran na matu gaw n mai byin ai zawn rai nga ai, shi a dinghku hpe madi shadaw ya na matu, kam hpa na masha n-nga ai.
N tara ai tara agyi langai a lam hpe tsun ga nga yang, gaida jan hpe n gawn n sawn di kau mai ai. Shi hta ahkaw ahkang mung n nga ai, ja gumhpraw mung n nga ai. Raitim, dai gaida jan gaw kaga masha the n bung ai shi gaw shakut shaja ai, asum n jaw ai lam rai nga ai. Hpang jahtum, tara agyi wa gaw, shi a myit simsa lam a matu, gaida jan hpe garum ya dat ai.
Mabyin masa lam yawng kaja nga ai shaloi akyu hpyi na matu loi nga ai. Anhte mung, grau ra kadawn ai aten, anhte a makam masham hpe teng sha chyam dinglik hkrum ai aten hta, akyu hpyi ai hpe jahkring kau ai gaw, dip sha hkrum ai aten ni hta rai nga ai. Anhte gaw tut nawng, n sim n sa akyu hpyi ra ai. Anhte teng sha ra ai ngu kam ai lam hpe hpyi na matu hkrit tsang n ra ai.
Ngai galoi mung akyu hpyi ai kun? Kade daram na hkra hpyi ai kun? Ngai hpa hpyi ai kun? Ngai teng sha hpa hpe ra sharawng ai kun? Ngai ra sharawng ai hte teng sha ra kadawn nga ai hpe garan ginhka chye ai kun? Bai nna, Karai Kasang a tsawra myit hte lajang ya ai lam hpe ngai teng sha kam sham ai hte kam hpa nga ai kun?
Maga mi hku na, lachyum shaleng ga nga yang: anhte mung tara agyi wa zawn, n tara ai ni byin chye ga ai re. Kalang lang anhte mung, Karai Kasang hpe n hkrit ai lam gaw, Karai Kasang anhte hpe kaja ai masha tai na matu ahkang n jaw ai the bung ga ai.
Dai hte maren, tara agyi wa zawn anhte mung grup yin na matsan masha ni a hkrap ngu hkrap ngoi nsen hpe n madat nga ga ai. Raitim Karai Kasang gaw n-hkring mat ai shakut shaja ai gaida jan rai nga ai. Karai Kasang gaw anhte tara rap ra ai hku tara jeyang ai aten du hkra, kaja ai lam hpe galaw, tsun shapraw ai aten du hkra, tsawra myit hpe sharin la lu ai aten du hkra, matut manoi nga na sha rai nga ai.