Daini na Ja Chyum Mungga hpe hti sumru yu ai shaloi e, Yeruslem mare hte seng nna, Yesu hkrap ai lam na la lu ga ai. Aten ngu ai gaw lanyan wa ai kun? Htum mat wa ai kun? Ngu ai gaw, anhte lai di wa ai laman ni hta madung rai nga ai. Dai hta sha n ga, anhte a prat mahkrum madup ni hta, aten gaw anhte a prat hta, Karai Kasang kade ram lawm nga ai ngu ai hpe mung grai nan lawm taw nga ai re. Shingrai Karai a hpaji ninghkring ni gaw, ndai aten hpe hpan lahkawng garan da nga ma ai re. Dai gaw Chronos ngu ai gaw, man man htum mat wa ai nayi hte shani ngu nna, Kairos ngu ai gaw Karai Kasang ra sharawng ai hkye la ai shani ngu ai rai nga ai.

Madu Yesu gaw masha law malawng a sadi maja chye ai lam a majaw hkrap ngu nga ai. Dai majaw nanhte gaw, Madu Karai Kasang du wa na aten hpe n chye ai majaw rai nga ai nga nna tsun da nga ai. Madu Yesu a shangai wa ai hte, du sa wa ai hkyela Madu a ninghtoi hpe sadi maja ai lam n nga ma ai. Shingrai hkyela Madu Mesia a aten gaw hpang jahtum e du wa sai lam hpe masha yawng gaw n chye madat nga ai.