Daini na lamang hta God Disciplines Us in Love (Karai Kasang Anhte Hpe Tsawra Myit hte Sharin Achyin Ya ai) ngu ai ga baw hpe woi sumru na nngai.

Ndai ga baw hte lakap nna chyum mungga kadun mi hpe shawn madat yu ga:

Hebre 12:6 “Ngai sha ni e, dai Madu sharin ai hpe, n gawn n sawn hkum rai et; Shi nang hpe daru yang, gawng hkum run et; Madu gaw tsawra ai wa hpe sharin shaga ai, hkap la ai kasha nlang hpe kayat ga ai”.

Hpunau ni e, anhte law law wa, grau nna, daini na prat hta “discipline” ngu ai shading sharai sharin ya ai hpe nau n ra, n hkap la mat saga ai; tinang lama ma shut ai hpe manang ni, ntsa de na masha kaba ni, manang shada madi madun shadum sharin ai hpe n ra sharawng mat saga ai.

Shadum sharin, shading sharai ya ai hpe anhte a shawng lam, htani htana asak a matu tsawra ai hte garum ai ngu nna n sawn la ai sha; anhte galaw mayu ai lam ni hpe dingbai dingna jaw ai hku nna sha sawn la, mu mada chye nga ga ai. 

Anhte a tsawra dik ai Wa Karai gaw, anhte hpe htani htana asak a matu galoi mung shadum sharin ya nga ai; Hebre ni hpang de shagun dat ai laika hpe madat yu ga:

Hebre 12:7-14 “Daru sharin ya ai akyu lu la na matu, hkam sharang nga mu: Karai Kasang gaw nanhte hpe kasha zawn woi di da myit dai: kaning rai nme law, kawa e n daru sharin ai kasha, kanang nga a ta?

Yawng mayawng hkam ga ai daru sharin la ai nanhte n hkrum myit yang gaw, nanhte kasha majing n rai, n-gyi sha rai nga myit dai. 

Bai lam mi gaw, nanhte hpe daru sharin ya na matu, hkum shan hte seng ai kanu kawa nanhte lu ga ai rai nna, anhte shanhte hpe hkungga lara di ga ai: dai hta grau nna asak hkrung nga lu hkra, wenyi ni a Kawa npu e anhte mai taw nga ga ai, n rai ni?

Shanhte gaw tinang ra ai hku hte maren tawng marang mi sha, daru sharin ya lu mi ai; shi chyawm gaw, shi a chyoi pra ai anhte hkam la lu u ga, anhte a akyu matu daru sharin nga ai. 

Daru sharin ya lai lam magup gaw hkam sha ai shaloi e, pyaw hpa zawn n rai, yawn hpa zawn rai nga ai: rai timung, dai gaw htawm hpang e she, dai hta sharin hkam sha ai ni a matu mara, dinghpring ngu ai ngwi pyaw ai asi si shapraw ya nga ai. 

Dai re ai majaw, kya noi nga ai lata ni hte lapyin n rawng ai lahput ni hpe sharawt da ting mu; lagaw hten ai ni hkrihkraw n kashai ai sha, shamai ai hkrum lu mu ga, nanhte sa wa na matu, ding ai lam masun lajang mu.

Masha yawng mayawng hte ngwi pyaw lu hkra mung, chyoi pra ai hpe dep lu hkra mung, hkan tam nga mu; chyoi pra ai n rawng yang gaw, kadai mung dai Madu hpe mu lu na n rai.”

Anhte ya sha, na la sai mungga hta, Karai Kasang gaw anhte hpe tsaw ra ai majaw, anhte hpe shi hte rau matut mahkai nga na matu, dinghpring ai chyeju jaw ya na matu anhte hpe daru sharin ya nga aingu ai hpe chye la lu ga ai.

Anhte mahtang, rai dum ai myit hte tinang hta ra rawng ai lam ni hpe n shapraw dan gwi ai a majaw, Karai Kasang e shading sharai ya ai hpe n kam hkam la ga ai.  Shi daru sharin ya ai a shingdu maga de anhte a matu dinghpring ai hte htani htana asak nga ai hpe anhte tau nau chye da ga ai rai yang gaw – shi Kawa a tsawm dik la ai lata de anhte a hkum hpe kabu gara let ap ya na ga ai rai nga ai.  Shi anhte hpe sharin achyin ya ai gaw, anhte a matu hkikhkam ai masing shi hta nga nga sai ngu ai hpe mung kam ra ga ai.

Ya aten hta tinang a kraw lawang hta Wenyi shadum ya nga na re; tinang hpa lam ni hta sharai ra nga ai ngu ai hpe pyi dum nga na sai.

Yawng asim sha nga nna akyu hpyi ga:

 Ga Shagawp 13:1 hpe madat la nna, tinang a kraw lawang hta akyu hpyi ga:  

“Hpaji rawng ai kasha gaw, kawa sharin shaga ai, madat nga ai; n kaw n law re ai wa chyawm gaw daru ai ga n madat nga ai.”

Bai, Shakawn Kungdawn 94: 12-13 hta mung Shi Madu sharin ai hpe hkam la ai ni shim lum nga na hpe tsun da ai:

“Karai Kasang e, nang shadum ya nna, Na a tara hpe sharin ya ai wa gaw, a nga ai.  Tara n lang ai ni a matu, nsung hku htu ngut hkra, ru tsang ai nhtoi hta na shi lawt u ga, Nang shi hpe ban sa ai lam, madu ya nu ai.”

Tsawra ai hpunau ni e, Chyoi Pra ai Wenyi e anhte hpe shadum ya nna, Wa Karai e shading sharai ya mayu ai lam ni hpe shi a chyeju hta shamyet shanat let, galai shai mat wa ga.  Wa Karai lajang da ya ai ga sadi hpe hkam la nna shanglawt ai masha ni tai let Hkristu Yesu hte rau sumsing mungdan lam de hkawm sa wa ga law.