Shakawn Kungdawn 126:5-6 hpe shawng madat la yu ga:
“Myi prwi hte gat hkai ai ni, kabu gara let bai shu lu na mu ai. Nli noi hpe hpye let hkrap nna pru wa ai wa gaw, hkauling lahkawn hpai nna, kabu gara ai hte bai wa na ra ai law.”
Shinggyim masha ni a prat hta yak dik htum ai lam ni hta na langai mi gaw – yak hkak jamjau ai lam amyu myu a lapran e kabu gara ai hte nga na lam rai nga ai. Rai tim, Karai Kasang hte rai yang, anhte du nga ai shara, kaning re ai masa, yak tim, pyaw tim, kabu gara ai hte nga lu nga ai.
Hpa majaw nga yawng, Chyoi Pra ai Wenyi hta kabu gara ai gaw anhte a kanawn mazum lam, ja gumhpraw lu su ai, nlu su ai ndai lam yawng hta tawt jan nga ai. Wa Karai e anhte a kraw lawang, salum kata de Chyoi Pra ai Wenyi hku nna shi a tsawra ai hpe ru bang ya ai kata lam na kabu gara ai rai nga ai.
Kasa Petru sharin ai hpe mung bai madat yu ga:
1 Petru 1:6-9 “Aten kadun mi a laman, hten mat chye ai Ja hpe wan hte chyam yu ai zawn – nanhte a jet ai makam masham hpe chyam dinglik na matu, ru yak jamjau ai lam amyu myu a majaw nanhte yawn hkyen hkrum ra ai rai tim, nanhte kabu gara nga myit dai.
Yesu Hkristu dan pru ai shaloi, nanhte a kam sham ai gaw – shagrau sha-a, hpung shingkang, shakawn kungdawn ai hkrum na myit dai.
Nanhte Madu hpe n mu yu tim, shi hpe tsawra myit dai. Nanhte shi hpe n mu yu ai rai tim, shi hta kam sham nna hpung shingkang hte hpring ai, nanhte a makam masham kaw na pru wa ai, n chye tsun shapraw dan ai kabu gara ai, wenyi a hkye hkrang la hkrum ai hte kabu nga myit dai”.
Anhte, yak hkak jamjau lam amyu myu a lapran hta kabu gara nga lu ai ngu ai gaw ndai dinghta ga na asak gaw, dinghta ga e htum mat ai n rai; dai hta grau ai hpang na prat sumsing lamu hta matut manoi naw nga ai ngu ai jet ai makam masham hpe anhte lu da ai majaw rai nga ai.
Dai yak hkak jamjau ai lam ni gaw, lani mi hta anhte hpe hpan da ai Madu hte myiman chyaw bai hkrum na; ndai dinghta ga gaw anhte a nta majing n re, sumsing mungdan na nta she ngang grin ai, dai buga de anhte du na re ngu ai myit n-gun hpe ban ya ai.
Dai majaw Kasa Yaku n-gun jaw ai, madat yu ga: 1:2-4 “Nye a hpunau ni e, nanhte a kamsham ai myit hpe dinglik yu ai hkrum yang, shakut sharang chye ai myit jat nga ai hpe, nanhte chye nga myit dai majaw, agung alau amyu myu hpe hkrum kadup myit dai shaloi e kabu gara shara kaba rai nga ai, myit la mu.
Dai hta n-ga nanhte hkum hkum chyip chyip rai lu nna hpa hta mung n kadawn myit ga, shakut sharang ai myit gaw tinang a atsip nga ai bungli hpe, shangut kau lu u ga” nga nna n-gun jaw da nga ai.
Anhte hpe tsawra ai Karai Wa gaw, dai yak hkak jamjau ai lam ni hpe hkam sharang tawt lai lu na kamsham myit n-gun atsam anhte hpe jaw ya nga ai.
Asim sha nga nna akyu hpyi ga:
Karai Wa gaw anhte kaning re ai masa lam hta nga ai raitim, anhte hta kabu gara ai hte jahpring ya mayu nga ai, ngu ai hpe myit dum ga:
Shakawn Kungdawn 126:5-6 hta tsun da nga ai “Myi prwi hte gat hkai ai ni, kabu gara let bai shu lu na mu ai. Nli noi hpe hpye let hkrap nna pru wa ai wa gaw, hkauling lahkawn hpai nna, kabu gara ai hte bai wa na ra ai law.”
Ya nang hkrum hkra nga ai ruyak kyindut lam ni hpe sumru yu nna Wa Karai hpe tsun dan u!
Chyoi Pra ai Wenyi a atsam jaw rit ngu nna akyu hpyi ga; Shakawn Kungdawn 51:12 hpe madat sumru yu ga: “Na a hkye hkrang la ai lam a kabu gara ai gaw, ngai hpe bai jaw nna, n wai ai Wenyi hte ngai hpe shadaw da e.”
Ndai akyu hpyi myit sumru lamang hta anhte hpe shalan shabran ya nna kabu gara shangun ai Wa Karai hpe chyeju dum shakawn ga.
Yawng hpe Wa Karai bau sin ya nga u ga law!
By Cardinal Charles Bo