Lu sha gam ladaw laban 2 hta tsun da ai Yesu a hpraw nsam galai shai ai lam gaw, “Easter’ Paska a nhtoi hpe tau hkrau tsun dan ai: si hkrung si htan hte hkrung rawt ai mabyin, nsin hte nhtoi nnan hpe Hkristu gaw zingri zingrat ai lam ni, kayat hkrum ai, Wudang hta jen da hkrum ai, shing nrai, matsan myan kabai da hkrum ai hkum hkrang yawng hta htoi tu shangun ai” nga nna Wa Sarabyin Leo, shi a March 1 laban shani na angelus mungga hta tsun da ai.
Yesu hte rau hkawm sa ai sape ni gaw Shi a hpung shingkang hpe mu lu tim, shanhte mu ai lam hpe chye na na matu aten la ra ai, “mungga hpe madat na matu atsin sha nga ai aten, Madu a kanawn mazum lam hpe kabu gara lu na matu myit malai lu na aten”ni ra nga ai. Wa Sarabyin shi a mungga hta, shinggyim hkum hkrang tai wa ai Mungga Yesu gaw, Mawshe hte Elia ‘Tara hte Myihtoi’ ni a lapran e tsap nga ai hpe mu lu ai lam hpe shadum ya ai.
“Yawdan hka hta kashin kamun hkam ai shani zawn, ‘Ndai wa gaw Ngai tsawra ai Kasha rai nga ai’ ngu nna, Kawa a nsen hpe anhte na lu ga ai, dai aten hta Chyoi Pra ai Wenyi gaw Yesu hpe ‘htoi tu ai sumwi’ hte ka-up da nga ai.” “Karai Kasang a shinggyim hpung shingkang” hpe ndai hku madun dan ai gaw, Petru, Yaku hte Yawhan ni hpe “shawa masha ni yu na matu n rai, hkungga lara ai hku nna, shagrit shanem ai hpung shingkang hpe myit sumru yu na matu” ahkang jaw ai.
Mungkan hta n hkru n kaja ai lam ni nga tim, “Karai Kasang a hpung shingkang hte” htoi tu nga ai Yesu a hkum hkrang galai shai ai lam gaw, Hkye hkrang la ai wa gaw “labau a hkala nba ningma ni hpe galai shai kau ya nna, anhte a myit masin hpe htoi tu shangun ai, shi a hpaw shadan dan ai lam gaw hkye hkrang la ai kumhpa rai nga ai” ngu ai hpe madun dan nga ai.
Wa Sarabyin Leo gaw, “Ndai lam gaw anhte hpe myit htum shangun ai kun? Karai Kasang a jet ai myi man hpe mau hpa hte tsawra myit hte mu nga ai kun?”
Bai nna, “Karai Kasang n nga ai ngu ai ni a myit daw myit hten ai lam hpe Kawa a mahtai gaw, shi a Kasha, Hkyela Madu gaw kumhpa rai nga ai; Chyoi Pra ai Wenyi gaw, anhte hpe htani htana asak hte chyeju hpe jaw ya ai, hkye la ai, anhte a gawng kya ai makam masham hpe, jahkrung sharawt ya na lam a ga sadi rai nga ai.”