Daini anhte jawm hkaja myit sumru akyu hpyi na ga baw hpe –
“Joy From the Holy Spirit
Chyoi Pra ai Wenyi Kaw na Kabu Gara Lam” ngu nna la ga.
Shawng nnan, Kasa Pawlu Htesaloni masha ni hpang de shagun dat ai Laika Langai: Daw kaba langai, daw kaji kru hte sanit (1 Htesaloni 1:6-7) hta na shawng madat yu ga:
Ya anhte jawm sumru yu na gaw – Karai Kasang anhte hpe jaw ya ai kabu gara ai hpe hkam la lu hkra “Chyoi Pra ai Wenyi garum ya ai”- ngu ai lam rai nga ai. Anhte Hkristan ni rai nga ga ai majaw, Chyoi Pra ai Wenyi anhte hte rau nga nga ai hpe kamsham ra ga ai.
Chyoi Pra ai Wenyi hte rau anhte htep lahti rai rau kanawn masum nga ga yang gaw, agrin nga ai kabu gara ai chyeju hte nga sa lu hkra, Shi anhte hpe shatsam ya lu ai. Dai hpe Wa Karai a salum hta rawng ai sung ai la-ing kaw na Wenyi e anhte hpe jahpring ya ai hku nna lu la ga ai.
Galati ni hpang de shagun ai Laika Daw kaba manga: daw kaji hkun-lahkawng (5:22) hta “kamsham ai ni lu la na kabu gara ai gaw Chyoi Pra ai Wenyi a asi langai mi rai nga ai hpe sakse hkam ya ai. Dai majaw, Chyoi Pra ai Wenyi a htingnu ni rai nga ai anhte mung, anhte a salum ni hte sak hkrung prat ting hta dai kabu gara ai asi hpe shadan dan ra ga ai.
“Chyoi Pra ai Wenyi e jahpring ya ai” hte “kabu gara ai” ndai lam lahkawng yan dantawk matut mahkai nga ai lam hpe Chyum mungga shara law law hta madun da nga ai.
Roma Daw kaba shi -mali: daw kajai shi-sanit (14:17) hta,
“Karai Kasang a mungdan gaw, sha sha, lu lu rai na hku n re ai sha, Chyoi Pra ai Wenyi e, dinghpring ai, ngwi pyaw ai hte kabu gara ai, rai nga ai” nga nna tsun da ai.
Kasa Laika Daw kaba shi-masum: daw kaji manga-shi-lahkawng (13:52) hta mung,
“Sape ni chyawm gaw, kabu gara ai hte Chyoi Pra ai Wenyi hpring nga ma ai” nga nna sakse hkam ya ai.
Langai Htesaloni Daw Kaba langai: daw kaji kru hte sanit (1 Htesaloni 1:6-7) hta mung,
“Nni nkri law law hkrum timung, Chyoi Pra ai Wenyi a kabu gara ai hte dai mungga hpe hkap la let, nanhte gaw, anhte a Samnang ai ni mung, dai Madu a Samnang ai ni mung, tai nga manit dai rai nna, Makedoni mung hte, Ahkaia mung na kam sham ai ni nlang a kasi kamang tai wa manit dai” nga nna Pawlu shakawn da nga ai.
Dai majaw, Yesu a sape ni gaw, Chyoi Pra ai Wenyi hte hpring jang kabu gara nga nna, laklai galai shai mat ma ai. Hkrit kaya nna, loi daw hkan nang ai masha ni kaw nna – galoi mung kabu gara ai hte ap nawng ai, Mungkan hpe pyi galai shai kau ai masha ni tai wa ma ai. Laja lana rai zingri hkrum nga yang pyi, Chyoi Pra ai Wenyi gaw shanhte hpe kabu gara ai hte jahpring ya wu ai.
Dai maren sha re ai Wenyi hpe anhte mung hkam la da saga ai. Anhte yak hkak jamjau, chyam dinglik ai lam ni hte hkrum nga ai aten hta, Wenyi gaw shi a kabu gara ai hte anhte hpe jahpring ya mayu nga ai. Dai lam hpe “Karai Kasang anhte hte rau nga nga ai” ngu ai hta lai nna kaga mi sanglang dan na lam n nga sai.
Rai tim, dai chyeju hpe lu la na matu, anhte shagrit shanem let hpyi ra ga ai. Karai a tsawra ai hte sadi dung ai lam gaw, anhte a kraw kata na hkrit myit hpe shaden kau ya na matu hpyi ra ga ai. Chyoi Pra ai Wenyi hte anhte dingyang matut mahkai, kanawn mazum nga lu hkra hpyi ra ga ai.
Anhte hpe garahku lam woi na ngu ai hpe Chyoi Pra ai Wenyi chye nga ai. Hkum tsup ai hte sung ai sak hkrung lam hta woi hkawm na kaja dik ai mahkrun ni hpe shi Madu chye nga ai. Anhte mahtang shi a nsen hpe madat let shi lam woi ai de hkan nang ra ga ai.
Asim sha jawm sumru yu ga –
Anhte Chyoi Pra ai Wenyi hte rau kanawn mazum ai lam ahkyak ai ngu ai hpe sumru yu ga:
Galati Daw kaba manga: daw kaji hkun-lahkawng hte hkun-masum (5:22-23) hta,
“Wenyi a asi chyawm gaw tsawra ai, kabu gara ai, ngwi pyaw ai, myit galu kaba ai, matsan dum ai, mai kaja ai, kangka ai, myit nem ai hte tinang myit hpe hkang lu ai rai nga ai: dai lam hte hpe hkum lu na tara mi n nga ai” ngu nna tsun da nga ai.
Chyoi Pra ai Wenyi nang hte ni htep nga ai lam hpe madun rit ngu nna shi kaw hpyi ga.
Grau sung ai kabu gara lam de lam woi ya na matu Chyoi Pra ai Wenyi hpe garum hpyi u.
Kaning re ai masa lam hta rai nga tim, kabu gara ai asi hpe shapraw dan lu hkra garum ya na matu hpyi u.
Chyoi Pra ai Wenyi kaw tinang a prat mahkra hpe shadang tup ap nawng da ai gaw kaja dik ai ladat rai nga ai.
