Readings: 1st: I Sam 16:1.6-13; Ps 22; 2nd: Eph 5:8-14; Gos: Jn 9:1-41
Yerusalem e, kabu gara nga u. Shi hpe tsaw ra ai ni yawng e, kabu gara nga mu!” (Is 66, 10).Dai ni gaw, “Laetare” Laban ngu shamying ai, Lent aten a mali ngu na Laban shani rai nga ai.Ndai Laban shani gaw, Chyoi Pra ai Kanu Nawku Hpung gaw, anhte a sagu rem wa Hkristu gaw anhte hpe htoi tu shangun ai the anhte hpe magap da ai lam ni hpe hpaw kau shangun ya nga ai.
Dai ni daw 1 kaw na sharin la mai ai lam law law nga ai. Langai, Samuela gaw shi hpe shangun dat ai shara de, grau nna Yese a amyu bawsang ni hpang de sa nna, Karai Kasang a ga madat mara ai. Shagrit shanem nna myit galu let, Karai Kasang a lam matsun hpe hkan sa nna madat mara ai: “Shi hpe shaga la u: shi garai n du yang, anhte shat sha na matu n dung nga ga ai.” Kaga masha langai ngai hpe namman chya ya ai hku nna, alawan dawdan ai lam n galaw ai. De a malai, jaw ai wa du wa ai aten du hkra myit galu let la nga ai. Dai majaw, Karai Kasang a matsun hpe hkan sa na matu myit galu ra ga ai.
Bai nna, hkum hkrang nsam hpe hkalem na ahkang n jaw ging ai. Kaja wa myit n pyaw hpa gaw, law law lang anhte a ningbaw ningla ni hpe shanhte a hkum hkrang atsam marai hpe sha yu nna lata la ga ai. Dai a mahtai gaw galoi mung tsin-yam tsindam byin shangun ai. Dai hte maren, anhte jaw ai hku lata la ai shaloi, masha ni teng sha lawt lu ai, myi kyaw ai ni mu lu ai, lagaw hten ai ni bungli galaw lu ai, kawsi hpang gara ai ni lusha sha lu ai, simsa ai lam up hkang nga ai.
Daini daw lahkawng hta, Hkristu anhte hpe nhtoi jahtoi ya nna lawt lu shangun ai shawng na anhte a moi na nsin sin ai prat hpe Pawlu shadum ya nga ai. Dai majaw, Pawlu ndai hku hpaji jaw da ai: “Nhtoi a akyu gaw hkum tsup ai mai kaja ai hte ding man ai asak hkrung lam hte teng man ai lam hpe mu lu nga ai.” Pawlu tsun mayu ai gaw Hkristu gaw anhte a prat hpe jahtoi ya ai nhtoi rai nga ai. Shi a shinggan e nga ai ngu ai gaw nsin kata kaw nga ai lachyum re. Dai majaw, ndai aten ladaw hta mung, dai hpang na aten hta mung, anhte a hkye hkrang la ai lam a nhtoi rai nga ai Hkristu hta grin nga lu hkra shakut ra ga ai.
Dai ni na kabu gara shiga hta, Yesu gaw myi nmu ai shangai wa ai wa a myi hpe bai mu lu shangun ai. Ndai shara hta, Yesu gaw shi a sagu hpung a hkam kaja lam hpe lanu lahku ai sakse madun dan ai. Ndai gaw madung hku nna machyi makaw hkrum ai ni, n-gun kya ai ni, shingdu tawn da hkrum ai ni a matu re. Bai nna, dai ni shi gaw myi nmu ai wa hpe hkye la na matu htunghking hte nawku htung a pat shingdang ai lam hpe dawm kau ya sai. Laban Nhtoi hta shamai ya ai. Shi gaw byin wa na akyu ni hpe n myit yu ai sha, myi nmu ai wa a ahkyak ai lam hpe galaw ya ai.
Yesu a sape ni gaw shi hpe ndai hku san ma ai: “Rabai e, ndai wa myi kyaw ai shangai wa ai gaw, kadai a yubak majaw rai ta? Ndai ga san kaw nna, tsin-yam tsindam yawng gaw yubak mara a majaw byin wa ai ngu ai myit masa nga ai hpe asan sha mu lu ai. Raitim, Yesu a mahtai gaw dai hku n re ai hpe sakse madun dan ai. Karai Kasang gaw shi a hpung shingkang dan dawng na matu lama ma byin na ahkang jaw nga ai. Tsun mayu ai gaw, ndai lamik kumla gaw Karai Kasang a atsam hte hpung shingkang hpe mau hpa hku shadan dan nga ai.
Yesu shamai shatsai ya ai wa kaw nna anhte sharin la mai ai lam ni hta, dai wa gaw shi hpe jaw ai matsun ga hpe madat mara ai lam lawm ai: “Siloam hka htung de sa kashin u,” Lahkawng, anhte a ga, makam masham, kam sham ai lam, tengman ai lam ni hte maren sha rai ra ai. Hparishe ni jahkrit shama ai lam yawng hpe galaw tim, dai wa gaw Hkristu hpe n ningdang kau ai sha, teng man ai hte ngang kang ai hku nga nga ai. De a malai, shi hpe shamai ya ai gaw Yesu re ngu aja awa tsun ai. San Yawhan Chrysostom tsun ai hku nga yang: “Hparishe ni shi hpe Nawku Htingnu kaw na shapraw kau ma ai, rai ti mung Nawku Htingnu a Madu gaw shi hpe mu wu ai.”
Hparishe ni gaw hkum tsup ai myi hte mu lu ai. Raitim, Yesu gaw shanhte hpe myi nmu ai ngu tsun ai. Bai nna yawn hpa gaw shanhte a myi nmu ai lam hta naw nga nga ma ai, hpa majaw nga yang shanhte gaw dai hpe n hkap la ma ai. Atsawm mu lu na matu, kaja ai myi hte sha n mai byin ai. Hkum hkrang myi nmu ai hta lai nna, myi nmu ai lam amyu myu nga ai. ga shadawn nkau mi nga ai:
Tinang hkum hpe sha myit ai: ndai gaw kaga masha ni a ra kadawn ai lam hpe n mu lu shangun ai;
Insensitivity: anhte kaga masha ni hpe hkra machyi shangun ai hpe nmu hkra myi pat ya ai;
Snobbery: kaga masha ni a sari sadang hpe maren mara n mu lu hkra nmu shangun ai;
Gumrawng gumtawng ai lam: anhte a mara hpe n mu lu hkra myi pat ya ai;
Lachyen lahka ai lam: tengman ai lam hpe n mu lu hkra galaw ya ai;
lawan ladan ai: anhte a grup yin mungkan a tsawm htap ai lam hpe nmu shangun ai;
Arung arai hpe ra marin ai: wenyi manu dan ai lam ni hpe n mu lu hkra myi pat ya ai.
Ndai lam ni yawng gaw myi a hkuwawt hpe shinggan de nga ai hpe n mu lu hkra, kata na masha hpe pat shingdang ya nga ai. Anhte a myi kaja nga tim, kaja ai, teng man ai, tsawm htap ai lam law law hpe n mu lu ai. Anhte yawng hta myi nmu ai lam law law nga ai. Dai majaw, Helen Keller (ma kaji kaw nna myi nmu ai) ndai hku tsun ai hpe chye lu ai: ‘Masha langai mi hta byin wa chye ai kaba dik ai tsin-yam gaw, shi myi nmu ai shangai wa ai n re, shi hta myi nga nna, n mu lu ai lam re.’
Shinggan mungkan a lam ni hte seng nna anhte dai daram myi nmu lu ai rai yang, n mu lu ai wenyi mungkan hte seng nna anhte kade daram myi nmu na kun?
Hpang jahtum, Hkristu anhte hpe jaw ya ai hkye hkrang la ai lam gaw nhtoi zawn rai nga ai. Karai Kasang a ga hpe si ai du hkra madat mara ai Hkristu gaw anhte a nhtoi rai nga ai. Ndai nhtoi hpe kam sham nna hkap la ai wa gaw, shi a prat hta myi hpaw wa ai wa hte bung nga ai. Ndai lam gaw masha ni myi nmu ai sha, nsin kata kaw shangai wa ai majaw re. Raitim, kabu gara shiga gaw, Hkristu gaw anhte a wenyi myi nmu ai hpe shalawt ya nna shamai ya ai lam rai nga ai. Dai majaw, “Madu gaw nye a sagu rem wa rai nga ai majaw, ngai hpa mung n ra nngai” ngu nna kamhpa myit hte tsun lu ga ai.