MAKAM MASHAM GAW TSIN-YAM TSINDAM HKRUM NGA AI SHINGGYIM MASHA NI HPE MU CHYE NA MATU ANHTE A MYI HPAW YA AI
Wa Sarabyin gaw, shana de na Marian akyu hpyi hpawng garai n galaw shi yang, Bu hkawm akyu hpyi sa ai shawa masha ni hpe laban shani na Kabu Gara Shiga hpe myit sumru yu let, shangai wa ai ten kaw na myi kyaw ai masha langai hpe Yesu shamai ya ai lam hpe bai tsun dan ai (Yh 9:1-41).
Hkye hkrang la ai lam a makoi magap da ai lam hpe ndai mabyin hta hpaw shadan dan ai, shinggyim masha ni nsin kata hta nga nga ai anhte a myi hpe hpaw ya na matu karai a kasha du sa ai lam re. Kabu Gara Shiga hta lawm ai masha zawn, anhte mung, prat a lachyum hpe chye na na matu, “myi nmu ai sha shangai wa ai” the bung nga ga ai.
“Dai majaw Karai Kasang, Yesu hta shinggyim hkum hkrang tai wa ai gaw, Shi a chyeju nsa hte hkrang shapraw da ai anhte a shinggyim nga pra masa ga kumyun gaw, anhte hkum anhte, kaga masha ni hpe, Karai Kasang hpe tengman ai hku mu lu hkra karum ya lu ai nhtoi hpe hkam la lu na matu re” nga nna tsun ai. makam masham gaw “nsin kata de gumhtawn shang ai” hte bung ai, dai gaw makam masham ngu ai gaw teng sha myi hpaw nna “myi nmu ai sha” kam sham ai lachyum rai nga ai nga nna Wa Sarabyin tsun ai. Hkristu hte anhte matut mahkai ai lam hte Shi a tsawra myit gaw, anhte galoi mung n mu yu ai, anhte a myi hpe hpaw ya ai, nga nna tsun ai.
“Makam masham ngu ai gaw, myi nmu ai sha galaw ai lam, myit sawn sumru ai lam (sh) nawku htung hte seng ai tengman ai lam langai ngai de, mungkan kaw nna anhte a myi man hpe shingdu tawn kau ai lam n re” . “De malai, makam masham gaw ‘Yesu shi nan mu mada ai zawn, Shi a myi hte’ mu lu hkra karum ya ai.” Wa Sarabyin gaw, kaga masha ni a tsin-yam tsindam ni hpe mu lu na matu, shinggyim masha ni hpe hkala nba ni hpe mu lu na matu, anhte a myi hpe hpaw na matu Hkristan ni hpe saw shaga nga ai.
Anhte a mungkan hta zingri zingrat ai lam ni law law nga ai hte maren, Hkristan ni gaw anhte a grup yin hta n tara ai lam, zingri zingrat ai lam, tsin-yam tsindam ni hkrum nga ai aten hta pyi, “sadi maja ai, myit maju jung ai, myihtoi ga tsun ai” makam masham hpe sakse hkam ra ga ai. “nsin a mungkan hpe anhte a myi hpe hpaw ya ra ai, simsa lam, tara rap ra lam hte kahkyin gumdin lam hpe kam hpa ai lam hku nna kaga masha ni hpang de Kabu Gara Shiga a nhtoi hpe la sa ya ra ai” nga nna tsun ai.
Wa Sarabyin Leo XIV gaw, Hkristu anhte a myit masin hpe hpaw ya nna, nden marai hte Shi hpe sakse hkam lu na matu, Chyoi Pra ai Nu Maria hpyi karum ya na matu akyu hpyi ya let shi a mungga hpe hpungdim dat ai.