Dai ni na Ja Chyum Mungga hpe hti sumru yu ai shaloi e, sape majing a lam hpe na chye lu ga ai. Madu Karai gaw shi nan Karai Kasang re ai lam hpe a dan aleng sha tsun ndau nga ai. Lusha gam ladaw a hpang ja htum shani ni hta, Madu Yesu hte Yuda masha ni ga n hkrum n ra nga tsun shaga ai hpe mu lu ga ai. Dai gaw Madu Yesu shi gaw Abraham n nga shi ai kaw nna shi nga nga magang sai ngu ai ga hkaw mi a majaw rai nga ai. Dai re ai majaw Yuda masha ni grai masin pawt let, Madu Yesu hpe nlung hte kabai sat kau na matu shakut nga ma ai. Anhte mung Madu Karai a lam hkrak chye nga ga ai kun?
Anhte a Madu Karai Kasang a lam hpe masha ni a shawng kaw sakse hkam gwi nga ga ai kun? Madu Yesu a jaw e anhte ni Karai Kasang hpe mu lu ai rai nga ga ai. Madu Yesu gaw, Karai Kasang hte matut mahkai nga ai lam hpe hkam sha lu ga ai. Dai re ai majaw anhte yawng mung Madu Yesu a tara lam ni hpe hkan sa hkan nang let, shi madu Karai Kasang hpe chye chyang tsawra nga na matu, bai nna shi Madu a hpang hkan nang lu na matu hte ap nawng daw jau ai ni byin nga lu na matu, tut e shakut sa ra nga ga ai. Dai zawn tsawra ap nawng daw jau nga lu na matu gaw, Madu hkum nan shi hpe chye chyang tsawra nga na ahkyak la nga ai hpe dum let shakut hkawm sa ga law.
