Bat shagu galaw ai General Audience hta, Wa Sarabyin Leo XIV gaw, Vatican Zuphpawng II a ‘Lumen gentium’ hpe matut nna myit sumru let, “baptism’ kashin kamun hkam la sai masha shagu gaw, Hkristu hpe tut nawng sakse hkam na matu shaga la hkrum ai, kabu gara shiga hkaw tsun ai hta, shamu shamawt nga ai wa rai ra ai” nga nna, tsun shadut da nga ai.
(The Universal Call to Evangelize) Mungkan ting Kabu Gara Shiga hkaw tsun na matu shaga la ai lam
Mungga madat nga ai ni hpe, kabu gara shiga hkaw tsun ai lam gaw, Saradaw, Jau ni a matu sha n re. Kashin kamun hkam la ai masha shagu gaw Nawku hpung a sasana magam bungli a “active agent” langai mi rai nga ai. Wa Sarabyin Leo XIV gaw, kashin kamun (baptism) hkam la ai gaw Hkristan shagu a madung masat kumla rai nna, Hkristan hpung masha ni hte hpung masha ni hpe langai sha re ai sasana magam bungli hta kahkyin gumdin shangun ai “dazik” zawn rai nga ai hpe ahkyak shatai tsun da nga ai.
Kam sham ai ni a lit magam a npawt nhpang masum
Vatican II a ‘Lumen gentium’ ngu ai laika buk kaw na Wa Sarabyin gaw, “Karai Kasang a Amyu Sha ni” Hkristu a magam bungli hta gara hku shang lawm ai lam hpe tsun dan da ai:
Jau, Hkinjawng a magam bungli: kashin kamun (baptism) hte Missa hkungga hku nna, kam sham ai hpung masha ni gaw akyu hpyi ai, tsawra matsan dum lama myit, “wenyi hte tengman ai lam” hku nna Karai Kasang hpe nawku daw jau ai lam ni hpe jaw ya nga ai.
Myihtoi Aya: Kam sham ai hpung masha ni gaw, mungkan hta Hkristu a tengman ai sakse ni hku nna, ga hte amu hku nna, “makam masham hpe shachyam shabra nna makawp maga” na matu shaga la hkrum ai ni rai nga ai.
Hkawhkam aya: Ndai hta kam sham ai hpung masha ni chyeju hte nnan bai gram lajang ai prat hpe woi awn na matu kaja ai lam ni hte tinang hkum hpe hkang zing ai lam (asceticism) hpe jai lang ai “hkawhkam hkinjawng aya” hta lawm nga ai.
“Mu lu ai Makam masham ” (Sensus Fidei)
Ndai zawn tsun shaga ai lam hta Karai hpaji lam kaba langai gaw, kam sham ai ni a myit hkrum ai lam ngu ai myit masa rai nga ai.
Kamsham ai lam hta shut ai lam n nga ai: Kamsham ai hpung masha ni a hkum hkrang ting gaw, makam masham hte arawn alai lam ni hpe myit hkrum kahkyin gumdin ai shaloi, “shut ai lam n nga ai” ngu Wa Sarabyin tsun da nga ai.
Supernatural Discernment: Ndai gaw langai hkrai a ahkaw ahkang n re, kam sham ai ni hpe tengman ai lam hte shut shai ai lam hpe garan ginhka nna, Kabu Gara Shiga hpe shanhte a prat hta jai lang lu na matu “Nawku hpung ting alit magam ” rai nga ai.
Lit magam the shaman chyeju ni
Chyoi Pra ai Wenyi gaw Nawku hpung kata na tsang shagu hpe “special graces” lak lai ai chyeju ni hpe garan jaw da nga ai. Jau, Mama, brother prat hku rai tim, ‘lay association’ hpung masha hku rai tim, ndai kumhpa ni gaw Nawku hpung hpe gawgap na matu yaw shada ai rai nga ai.
Wa Sarabyin gaw, kam sham ai ni yawng hpe, Karai Kasang a masha hta lawm ai majaw chyeju dum ai lam hte Nawku hpung a sasana magam bungli a matu lit la ai lam lahkawng yan hpe hkam la let, ‘zim sha nga ai’ kaw nna, ta tut n-gun dat shang lawm ai de htawt sit sa wa na matu saw shaga dat ai.
