Daini na Ja Chyum Mungga hpe hti sumru yu ai shaloi e, aten shagu maja ra nga ai lam na chye lu ga ai. Grai galai shai taw nga sai ndai prat hta e, anhte gaw media matut mahkai ai a hpang hkan nna, lu lawm lam, hpaji lam ni hte kyin taw nga nna, wenyi lam yan a lajang shachyip na lit ni hpe jahkring hkring  sha dinghprut kau nna, magam bungli ni hta sha lup taw nga ga ai. Raitim Madu a hpang hkan ai ni hku nna, n grin ai hpang jahtum na aten a matu, jin jin hkyen da na matu hte e, sadi dung ai mayam wa zawn, Shi madu a sharin shaga ai lam ni hpe mung sadi dung ai kang hta ai wa zawn sha galaw sa na matu shadum ya nga ai.

Shingrai anhte yawng hpe mung Madu Yesu du sa na hpe galoi mung maja let, ala nga na hpe saw shaga nga ai. Bai anhte ni a lit magam ni hpe dinghprut kau ai a majaw, hkam la ra na lam ni hpe mung Yesu shadum ya nga ai. Madu du wa na hpe n chye kau dat ai majaw, lit magam hprai ai shangun ma wa zawn, anhte mung Madu a sharin shaga ai hte tinang a lit magam hprai kau ai lam ni a majaw, Madu du wa ai aten hta dai mara ni jeyang hkrum na teng sha rai nga ga ai. Dai re majaw anhte yawng Madu Karai jaw ya sai lit magam ni hpe sadi dung let, gun hpai shakut sa nga ga law.