11. Matsan masha ni a matu ngang kang ai ga sadi jaw ai lam gaw, htunghking madang hta lai nna akyu pru ai myit masa galai shai ai lam mung lawm ra ai. Kaja wa nga yang, shim lum ai prat kaw na lu la ai kabu gara lam ngu ai hkalem hkalau ai lam gaw, kaga masha ni hpe jahten kau ai, n tara ai shinggyim nga pra masa hte n-gun ja dik ai ni hpe ra sharawng ai mung masa-sut masa lam hpe akyu jashawn nna, sutgan mahkawng da ai hte shinggyim nga pra masa awng dang lam hpe madung tawn ai prat a bandung de masha law law hpe shadut ya nga ai. Shingrai, matsan masha ni law htam wa ai mungkan hta, sut su ai elite langai mi rawt jat wa ai hpe, shim lum ai hte sut su ai bubble kata hta nga nga ai, shinggyim masha ni hte shingdaw yang kaga mungkan langai mi hta dip sha hkrum nga ai hpe anhte gaw, n bung ai hku mu lu ga ai. Htunghking langai mi naw nga ai — kalang lang atsawm sha makoi magap da ai — kaga masha ni n chye ai sha tawn kau ai hte, wan hku law ai masha ni kawsi hpang gara ai majaw si mat ai (sh) shinggyim masha ni a matu n htap htuk ai masa hta asak hkrung nga ai hpe myit npyaw hpa mu lu nga ai. Lai wa sai shaning ni hta, Mediterranean panglai hkin-gau ntsa e tsawt nga ai asak n rawng ai ma langai a sumla gaw, masha law law hpe karu kachyi shabyin ya ai; n kaja ai lam gaw, aten kadun laman na jahtau garu ai lam hta lai nna, dai hte bung ai mabyin masa ni gaw, shingdu shiga ni hku nna mu mada wa nga ai.
12. Matsan mayan hkrum ai shaloi, anhte a sin langa hpe n mai jahkrat kau ai. Grau nna, lu sha hte hka n lu ai majaw masha law law hkrum sha nga ai grai sawng ai masa ni hpe grau nna myit tsang ra ai. Sut su ai mungdan ni hta mung, matsan masha ni law jat wa ai gaw, dai hte maren sha myit tsang hpa rai nga ai. Uropa mungdan ni hta, shata htum du hkra na malu masha nlu ai dinghku ni law wa ai. Madung hku nna, anhte gaw matsan mayan amyu myu law jat wa ai hpe mu lu nga ga ai, dai gaw dinghkrai tengman ai lam n rai sai raitim, ya gaw sut masa hte shinggyim nga pra masa matsan mayan lam amyu myu hkan nang nga ai, dai gaw sut su ai shara law law hta pyi n rap ra ai lam chyam bra wa ai hpe madun dan nga ai. “Shanhte a ahkaw ahkang hpe makawp maga na matu atsam n rawng ai, n tara ai hku roi rip hkrum ai hte zingri zingrat hkrum ai masa ni hpe hkam sharang nga ai num ni gaw, htam lahkawng matsan hkrum ai hpe n malap ga. Dai zawn matsan tim, shanhte a matsan dinghku ni hpe makawp maga ai hta shani shagu na share shagan ni hpe anhte galoi mung mu lu ga ai.” [8] Mungdan nkau mi hta ahkyak ai galai shai lam ni byin nga ai aten, “mungkan ting na shinggyim wuhpawng ni gaw num ni mung la ni zawn sha sari sadang maren sha ahkaw ahkang ni hpe madun dan na matu naw tsan nga ai.