Daini na akyu hpyi sumru ai lamang a matu, Peace in the Holy Spirit, Chyoi Pra ai Wenyi hta Simsa Ai ngu ai hpe la ga.
Anhte simsa ai hpe lu la hkra shakut ai mahkrun hta Chyoi Pra ai Wenyi gara hku garum ya ai ngu ai hpe jawm sumru yu ga. Ehpesu ni hpang de shagun ai laika, daw kaba mali: kaji sumshi (Ehpesu 4:30) hta:
“Hkye hkrang la hkrum ai nhtoi du hkra, nanhte hpe dazik shakap ai Karai kasang a Chyoi Pra ai Wenyi hpe myit hkum shayawn myit” nga nna shadum da nga ai.
Chyoi Pra ai Wenyi Karai Kasang hta anhte a sak hkrung ai lam ni hte seng nna, Shi hta mung – anhte zawn myit hta hkam sha ai, kabu ai, yawn ai, pyaw ai hte n pyaw ai, myit mang ai hte ra sharawng ai lam ni nga ai hpe chye ra ga ai.
Chyoi Pra ai Wenyi gaw, shi hpe myit yawn shangun ai lam ni hpe kau da nna, anhte a myit masin n-gun atsam mahkra hpe shi kaw ap da nna shi hte madang tup jawm pawng nga na hpe ra sharawng nga ai. Dai hku nna sha, shi jaw ai simsa ai hpe nhpaw n-ya anhte hkam la lu mai nga ai.
Ndai dinghta ga hta, anhte a matu san da, masat da ya sai chyeju ni hpe hkam la mayu ga ai rai yang, anhte a kraw kata e rawng nga ai Karai Kasang a “hkam sha ai” “myit mang ai” “ra sharawng ai” lam ni hpe maja let madat ya ra ga ai.
Dai lam hpe chyum laika hta anhte mu mada lu ga ai. Shakawn Kungdawn, daw kaba latsa-e-shi-jahku: kaji latsa-e-kru-shi-manga (119:165) hta,
“Na a tara hpe tsawra ai ni gaw ngwipyaw kaba chye nga ma ai. Shanhte hta kadai mung myit kataw shara n nga ai” nga nna tsun da nga ai.
Bai, Esaia daw kaba sum-shi-lahkawng, daw kaji shi-sanit (32:17) hta mung,
“Dinghpring ai gaw, ngwi pyaw ai shabyin na ra ai; ding hpring ai a akyu gaw, htani htana ngwi pyaw ai hte myit maju jung ai, tai na ra ai.” nga nna rawng nga ai.
Dai hte maren, Shakawn Kungdawn, daw kaba sumshi-mali: daw kaji shi-mali (34:14) hta mung,
“N hkru ai hpe koi nna, kaja ai galaw u, ngwi pyaw ai hpe tam nna hkan sa nga u” nga nna shadut da nga ai.
Chyoi Pra ai Wenyi gaw anhte a prat hkrunlam a matu, mai kaja ai hpe ra sha rawng nga ai lam hpe Chyum mungga hta mu lu nga ai. Chyum mungga hpe anhte a prat hkrun lam hta gara hku madat mara hkan shadik na ngu ai hpe mung, Chyoi Pra ai Wenyi gaw anhte hpe madun dan mayu nga ai.
Karai Kasang a Mungga hpe madat mara hkan sa ai kaw na lu la ai nhtaw n-ya kabu gara chyeju ni hpe anhte hkam la lu na matu, Chyoi Pra ai Wenyi gaw shi a mungga hpe anhte a masa lam shagu, myit mang lam shagu hta hkan shadik shangun mayu nga ai.
Anhte, Karai Kasang hte rau galung kahkin nga ai, kam sham ai masha ni hku nna, Wenyi gara hku hkam sha nga ai, gara hku myit nga ai, gara de anhte hpe woi sa nga ai ngu ai lam ni hpe mu mada chye ra ga ai. Anhte a chye madat ai myit nyan hta shi gara hku shaga ai, woi len ai ngu ai hpe chye madat ra ga ai.
Chyum Mungga hpe hti hkaja akyu jashawn ai gaw, Wenyi hte rau simsa let hkawm sa na matu, grai ahkyak nga ai. Chyum Mungga daw ni hpe anhte a myit masin hta chye da ai rai yang, shi ra sharawng ai lam ni hpe madi madun ya na matu grau loi nga ai. Hpa majaw nga yang, Karai Kasang gaw, Chyum laika hta rawng ai hte nhtan shai ai hku nang hpe galoi n woi na re.
Dai majaw, Chyoi Pra ai Wenyi the, lani the lani, grau hku hkau kanawn mazum chye na matu shaman la ra ga ai.
Ya, asim sha ng anna akyu hpyu sumru yu ga:
- Chyoi Pra ai Wenyi gaw kadai rai nga ai ngu ai hpe sumru yu ga.
Yawhan ka da ai Kabu Gara Shiga, daw kaba shi-mali: daw kaji shi-manga kaw nna shi-sanit du hkra (14:15-17) hpe jawm madat yu ga,
“Nanhte ngai hpe tsawra myit dai rai yang gaw, nye a ga matsun hkan shatup na myit dai. Ngai mung Wa kaw hpyi nna, Wa mung, nanhte hte prat tup rau nga na matu, tengman ai hte seng ai Wenyi ngu ai Shalan Shabran ai wa kaga, nanhte kaw shangun dat ya na ra ai. Mungkan ga gaw dai Wenyi hpe n mu n chye ma ai majaw, n hkap la lu ma ai: nanhte chyawm gaw dai Wenyi hpe chye nga myit dai; kaning rai nme law, shi gaw nanhte hte rau rai nga ai, nanhte hta mung rawng nga na ra ai.”
- Shi nang hte kade mi ni htep nga ai hpe san yu u. Shi gara hku hkam sha ai, shi hpa-baw myit ai, gara de woi len nga ai, ngu ai hpe masam maram, san yu u.
Langai Korinhtu, daw kaba kru: daw kaji shi-jahku hte hkun (1 Korinhtu 6:19-20) hta rawng ai hpe madat yu ga,
“Dai hta n ga, nanhte a hkum hkrang gaw Karai Kasang kaw na nanhte lu la ai hte, nanhte hta e rawng nga ai Chyoi Pra ai Wenyi a htingnu rai nga ai, nanhte n chye nga myit ni? Nanhte gaw tinang hkum hpe pyi up lu ai n rai; Nanhte jahpu manu daw nna mari da sai ni rai nga myit dai; dai re ai majaw, nanhte a hkum hkrang hte Karai Kasang hpe shagrau shaa nga mu law”.
3. Karai Kasang a lahpyen kata hta ban sa la ga. Na a kraw hta rawng nga ai ga san ni hpe san nna, nang hpe sharin ya shangun u.
Chyoi Pra ai Wenyi gaw, shi myit ra ai lam, shi myit mang ai lam ni, shi ra sharawng ai lam ni hpe anhte a ntsa de adip arip rai n di na re. Shi gaw anhte hte sung ai hkuhkau lam hpe gaw gap na matu machyi shim ai hte shakut nga na ra ai.
Raitim, anhte shi myit ra ai lam ni hpe san ai shaloi gaw, shi tsun shaga, shadan shaleng ya wa na re. Dai majaw, shi a man e simsa, machyi shim ai hte nga u.
Shani tup, nang myit, galaw sa wa ai lam ni hte seng nna shi gara hku hkam sha ai ngu ai hpe aten la nna san yu u; shi hpe shara jaw u. Shaloi shi nang hpe Mungkan e n jaw lu ai ngwipyaw simsa ai hpe jaw na ra ai.
Mungga madat nga ai hpunau ni yawng, Chyoi Pra ai Wenyi the grau hkau chyap wa mu ga law. Yawng hpe Karai Kasang shaman ya u ga.