CHYOI PRA, SAN SENG AI LAM GAW MASHA N KAU NI A MATU SHA N RE
April 8 ya shani na General Audience hta, Wa Saradaw Leo XIV gaw, Mungkan ting chyoi pra ai de shaga la hkrum ai lam hpe madung tawn nna, Vatican Zuphpawng II a laika ‘Lumen gentium’ hpe matut sharin shaga lai wa ai. Chyoi pra ai lam gaw wenyi lam hta kungkyang ai ni a matu sha n re, kashin kamun hkam la sai masha shagu a matu kumhpa hte lit langai mi re ai hpe ahkyak shatai tsun dan ai.
Masha Yawng a matu chyoi pra ai lam: Chyoi pra ai lam gaw “tsawra myit hkum tsup ai lam”—Karai Kasang hte htingbu wa hpe tsawra myit hpring tsup ai lam re ngu Wa Sarabyin asan sha tsun da nga ai. Shani shagu na prat hta kabu gara ai hte ap nawng daw jau ai hku nna dan dawng ai, tsan ai (sh) n du lu ai myit mada lam langai zawn n rai nga ai.
Hkristu a kasi ningli: Chyoi pra ai ngu ai gaw, Chyoi Pra ai Wenyi gaw kam sham ai wa a prat hpe Hkristu hte maren shatai ya ai kata lam galai shai ai lam rai nga ai. Sakramentu ni, grau nna ‘Eucharist’ chyoipra hkum gaw ndai hkrun lam a matu ra kadawn ai malu masha rai nga ai.
Sakse hkam ai lit magam: makam masham a matu asak apnawng ai gaw makam masham a “tsaw htum ai sakse” rai nga ai, Hkristan yawng gaw shinggyim wuhpawng kata makam masham hte tsawra myit a kumla ni tai na matu shaga la hkrum nga ai.
Kayin wa ai lam: Nawku hpung kata na “yubak mara hpe yin la ai lam” hpe hkap la let, Nawku hpung gaw Karai Kasang kaw na kumhpa kaba rai nna, hpung masha ni gaw “prat hpe ahkyak ai hku galai shai wa lu na matu” hte shani shagu myit malai lu na matu tut nawng shakut ra ai lam hpe Wa Sarabyin tsun shaleng da nga ai.
Wa Sarabyin gaw, shanhte a prat hpe laksan kaja ai lam masum hku nna ap nawng da ai ni hpe madi madun da nna, dai ni hpe pat shingdang ai tara ni hta grau nna “lawt lu ai kumhpa” hku nna bai gram lajang da ai:
Matsan mayan lam hpe yin la ai– Tinang hkum hpe sha myit ai lam hte tingkyeng akyu hpe sha myit ai lam kaw na lawt lu shangun nna, Providence hpe kam hpa myit hpe shalat ya ai.
Madat mara ai lam– Hkristu a tinang hkum hpe jaw kau ai hpe kasi la ai; uphkang mayu ai myit hte kam shut ai myit hpe yeng seng kau ya ai.
San seng chyoi pra ai lam-Karai Kasang a magam bungli hta tsep kawp ap nawng da ai “hkum tsup ai hte san seng ai” myit masin the daw jau ai.
Wa Sarabyin Leo XIV gaw N-ni n-kri hkrum ai lam ni pyi, Hkristu a tsin-yam tsindam hte rau pawng hpawm ai shaloi, chyoi pra ai lam de shang wa ai lam tai wa ai. Ndai hkrun lam hta kam sham ai hpung masha ni hpe madi shadaw ya lu na matu, Chyoi Pra ai Nu Maria a makawp maga ai lam hpe hpyi let, shi a mungga hpe hpungdimdat ai.
