Daw III
Dai ni na lamang hta mung lai wa sai bat ni hta na la lu sai Ningbaw Ningla Hte, Manghkang Hparan Ladat Lam ni ngu ai ga baw hta na hpang jahtum daw hpe matut gam garan ya mayu nngai law
Tsawra ai ramma ni ningbaw ningla gaw, mang hkang hpe tam mu ai hpang, numdaw lahkawng ngu na matut gun hpai ra na lam gaw, mang hkang masa hpe, sawn dinglik lam rai nga ai, mang hkang a masa hpe sawn dinglik ai hta,dai mang hkang gaw hpa mang hkang ta? Hpa bungli hte seng nga ai, gara shara kaw byin pru ai, gara aten hta byin wa ai ngu ai lai wa sai lamang hta, tsun lai wa sai hte maren, sawn dinglik yu hparan na ra nga ai, dai zawn sawn dinglik ai hta, No ( 1 ) myit maram ai lam gaw, kalang lang bai mu hkrup ai lami laman hte hprai shai chye ai hpe sadi ra ai, mang hkang a masa hpe atsawm sawn dinglik maram yu ai hte maren, dai mang hkang a mahtai hka ang hkup lu nga chyalu rai sai.
Kalang lang mang hkang langai hpe lahta na gin lam ni hte sawn dinglik hparan lu na nloi ai hpe mu chye ai, dai masa hte hkrum katut jang, mabyin bungpre ai sawn sumru lam hpe, galai bang nna, sumru ra na rai nga ai, gara ladat hpe lang ai raitim,ahkyak ai lam gaw, mang hkang mabyin masa hpe, atsawm sha sawn maram lu na lam rai nga ai hpe ningbaw ni atsam dat ra ai. Bai mang hkang a kaja wa mabyin hpe sawn dinglik ngut ai hpang no ( 2 ) ngu na matut gun hpai ra na lam gaw, dai mang hkang hpe hparan ai hta, mai byin ai mahtai hpe tam sawk gahkin shapraw na lam rai nga ai, mang hkang langai hpe hparan na matu, mai byin ai mahtai ni tam sawk sumru teng mang ai mahtai hpe lu hkra gun hpai ai hta, mang hkang langai a matu hparan ai mahtai gaw, kam nmai ai lam hpe mung, jaw teng ai lam hpe mung, masa lam law law mu hkrup chye nga ai, mahtai langai hpe asan sha nre ai hku na mung, teng man ai hku nna mung, galoi rai tim, ngut kre hkra, n mai daw dan lu nga ai, mu sawn nna lu ai mahtai hpe ngut kre hkra, tup hkrak jaw ai hte, jep joi maram lam garai n galaw yang, kaning re ai mahtai hpe mung, kabai kau ai lam hparai kau ai lam tsep kawp nmai galaw ai.
Lu malu mahtai yawng hpe hkyawm nna, gahkin da ra ai, hpa majaw nga yang, kalang lang nmai byin ai ngu nna shadu da ai ntai nmai re ai mahtai wa kaja dik mahtai rai taw nga ai hpe mung, kaja dik ngu shadu ai mahtai gaw, nmai byin ai hpe mung mu chye lu ai majaw rai nga ai, dai majaw mang hkang langai hpe hparan ya na matu, sawn sumru myit mang ai lam hta, lu malu mahtai ni yawng hpe langai n ngam gahkin nna, sumru ra na rai nga ai,bai lamang masum hku nna, mahtai ni hpe tam shapraw nna, matut gun hpai na lam langai gaw, dai zawn gahkin da ai mahtai langai hpra a akyu pru ai lam ni hpe, sawn dinglik maram daw dan na lam rai nga ai, mahtai langai hpra hpe maram dawdan ai hta, mahtai langai hpra a kaja n kaja ai lam yawng hpe shingdaw yu ra na rai nga ai, dai zawn shingdaw yu ai a marang e, akyu byin pru shangun na mahtai hpe mung, shingdaw nna mu chye wa na rai nga ai, kalang lang tinang a ra rawng ai lam akyu pru ai lam ni gaw mahtai lahkawng masum rawng yang, pru chye ai hpe mung, akyu pru ai hpe mung sawn maram daw dan ra na rai nga ai, dai zawn mahtai ni hpe shingdaw sawn maram ai hta, shingra tara hte maren, sawn maram nna, daw dan lam jaw ra na rai nga ai, masha makam myit makam, masa makam lam ni hpe tsep kawp bang sangaw ai lam nmai galaw ai, dai hta n ga dai zawn sawn sumru daw dan ai hta, myit katu nna ngut daw nmai daw dan ai, mang hkang langai hpe hparan ai shaloi, mahtai pru na matu daw dan ai hta, ndai no masum daw gaw grai ahkyak dik ai numdaw rai nna, ndai numdaw hpe gun hpai ai hta, ningbaw galaw ai wa gaw, grai sadi nna gun hpai ra na rai nga ai.
Tsawra ai ramma ni lahta na lam ni hpe masa jaw jaw, hparan gun hpai ngut ai hpang hpang jatum gun hpai ra na lam gaw, kaja dik ai hte mai byin ai mahtai hpe lata la na lam rai nga ai dai zawn lata ai hta, kalang lang mahtai langai hta n ga,grau mu lu chye nga ai, kalang numram lahta na matai hpe tam nmu ai mabyin hte hkrum tut chye nga ai, dai zawn byin tim ndai ninggam hta,gun hpai ra na lam gaw, no mali ninggam hta lata mahkawng da lu ai mahtai ni gaw, kaja dik mahtai langai shing nrai, law law hpe lata na lam rai nga ai, mang hkang langai hta, hparan ladat masum nga nna, hparan ladat langai hpra hta, akyu pru lam hpan masum hpra nga ai ngu tsun ga,dai rai yang, mang hkang langai hpe hparan ai hta, akyu pru lam ni kaw nna,tinang ra sharawng ai akyu pru lam ni jaw ya lu ai hparan ladat hpe lata la ra na rai nga ai, tsawra ai ramma ni, ningbaw galaw ai wa a lit gaw, mang hkang hparan ai hta seng nna mahtai hpe tam sawk ai sha n ga, dai mahtai hpe ta tut jai lang na hpe yu maram daw dan na lam mung ra nga ai.
Laika hte maren kaja htap htup ai mahtai rai yang,kalang lang tatut gun hpai ai hta,mang hkang nhparan lu ai hpe mung, mayak mahkak ni hte bai hkrum kadup chye ai hpe mung mu lu nga ai, dai re majaw ningbaw ni hku nna, mang hkang hpe hparan nna, lata da ai mahtai hpe tatut sung lang ai hta akyu hkam sha lam ni hpe atsawm kaja maram yu nna, awng dang lam ni, myit dik hpa lam ni mu lu yang, matut gun hpai shangun na lam rai nga ai, lamana tinang lata da ai mahtai gaw, njaw ai lam ni, hprai shai ai lam ni mu wa jang, ningbaw galaw ai wa gaw, lamang hpe ahkyak hkyak galai ra yang galai kau ra na rai nga ai, tsaw ra ai ramma ni, lahta de tang madun lai wa sai hte maren, hpawt ni ngu ai nhtoi hta, ningbaw lit magam hpe gun hpai sa wa na anhte ramma ni ningbaw ningla hte mang hkang hparan ladat lam ni hpe ya ten kaw nna, hka ja matsing sum hting da ai rai yang, anhte ningbaw ningla magam hpe tatut gun hpai sa ai hta, mang hkang lam ni hte hkum kadup tim, teng man jaw teng ai mahtai ni hte hparan lajang sa wa lu nag aw teng sha rai nga ai.