Wa Sarabyin Leo XIV gaw, May 20, bat masum Ya shani na General Audience hta, Vatican Zuphpawng II a Chyoi Pra ai Nawku Hpung hte seng ai Nawku daw jau ai lam the seng ai, ‘Sacrosanctum Concilium’ hpe myit sumru let, Nawku Hpung gaw Nawku hpung a sak hkrung lam hte makam masham a madung rai nga ai hpe ahkyak shatai tsun shalawm lai wa ai. Shi sang lang dan ai hta, ndai Council gaw htung lailen ni hpe gram lajang na matu sha n-ga, Nawku hpung a Hkristu hte hkrung nga ai matut mahkai lam hpe grau sung hkra galaw na matu yaw shada ai re.
Wa Sarabyin sharin ya ai gaw, nawku daw jau ai lam gaw, Hkristu a hkye hkrang la ai Paschal Mystery—Shi an-ni n-kri lam, si hkrung si htan, hkrung rawt ai lam, hpung shingkang lam ni hpe daini na kam sham ai ni a man hta mu lu hkra galaw ya nga ai. Nawku daw jau ai hku nna, Hkristu gaw Chyoi Pra ai Wenyi a atsam hte Nawku hpung hpe matut nna shachyoi shapra, kahkyin gumdin nga ai, grau nna Missa hkungga gaw, ndau shabra ai Mungga, Sakramentu ni, magam gun ni, zuphpawng nga ai makam masham hpung masha ni hku nna, matut nna shachyoi shapra nna kahkyin gumdin nga ai.
Hippo mare na San Augustine a ga hpe lakap nna, Wa Sarabyin Leo tsun ai gaw, Missa hkungga hta Nawku hpung gaw “Madu a hkum the sai hpe hkap la nna, shi hpe la ai hte maren tai wa ai,” Hkristu a Hkum hkrang nan tai wa ai. Shi gaw, Nawku hpung a htung lailen ni, akyu hpyi ga ni, lata masat kumla ni, masat kumla ni gaw, ‘lex orandi, lex credendi’ (“akyu hpyi ai tara gaw kam sham ai tara re”) ngu ai npawt tara hpe hkan sa let, shi a makam masham hpe shaleng dan ai hte hkrang shapraw ya ai lam hpe ahkyak shatai tsun shaleng dan ai.
Wa Sarabyin gaw, Missa hkungga shagu hpe “akyu hpyi ai hta Nawku hpung a tengman ai lam hpe shadan dan ai” ngu nna Wa Sarabyin Yawhan Pawlu II a sharin achyin ai lam hpe bai kahtap tsun ai. Shi gaw, nawku daw jau ai lam gaw “Nawku hpung a magam bungli hpe woi awn ai npawt nhpang” hte “shi a n-gun yawng lwi pru wa ai hka hpawk” re ai hpe shadum ya ai. Nawku hpung hkaw tsun ai hte tsawra myit hku nna daw jau nga ai ten, shi a magam bungli yawng gaw nawku daw jau ai lam de lwi shang wa nna, dai hpe makawp maga nga ai.
Wa Sarabyin Leo matut tsun sang lang dan ai hta, nawku daw jau ai lam gaw, kam sham ai ni hpe Mungga, sakramentu ni, wuhpung wuhpawng akyu hpyi ai lam ni hku nna, Hkristu a Paschal mung sung hta bai gram lajang ya ai hku nna, madi shadaw ya nga ai. Nawku dawjau ai lam hta shang lawm ai gaw, shani shagu na sak hkrung lam hpe galai shai ya ra ai, Hkristan ni hpe shanhte galaw ai poi hte maren, arawn alai hte wenyi lam hta sak hkrung hkawm sa lu hkra woi awn ra ai.
Hpang jahtum, nawku daw jau ai lam gaw kam sham ai ni hpe chyoi pra ai hte hkap hkalum la ai wuhpung wuhpawng langai hku nna, Hkristu hta kahkyin gumdin ai hte shinggyim masha yawng a matu hpaw ya ai hpe ahkyak shatai tsun dan ai. Wa Sarabyin Francis tsun ai ga ni hpe bai myit dum let, “Sagu Kasha a shana shat sha poi de masha shagu hpe saw shaga da ai” ngu nna makam masham hpung masha ni hpe shadum ya nga ai. Hkristan ni hpe nawku daw jau ai lam hta Hkristu a hkrung nga na matu saw shaga let hpungdim da tai.
Wa Sarabyin gaw, ‘Dominum et Vivificantem’ 40 ning hpring ai hpe mung myit dum galaw let, Pentecost poi du wa sai hte maren, makam masham hpung masha ni hpe, myit masin nnan ni hpe bai gram lajang ya nna, mungkan hpe ngwi pyaw simsa lam jaw ya lu na matu, Chyoi Pra ai Wenyi hpe akyu hpyi ya na matu n-gun jaw da nga ai.