1st: 2 Kg 4, 8-11. 14-16; Ps: 88; 2nd: Rom 6, 3-4.8-11; Gos: Mt 10, 37-42
Ndai pranwan ladaw hta 13 ngu na Laban shani hta, kaga masha ni hta Hkristu hpe hkap tau la na matu Nawku hpung gaw saw shaga nga ai. Dai gaw anhte a lapran na Karai Kasang a dat kasa ni hku nna madung rai nga ai. anhte a prat hta kaja ai galai shai lam byin tai wa hkra langai hte langai ra kadawn ai lam hpe myit dum na matu mung maren sha n-gun jaw nga ai.
Ndai Laban shani na daw 1 hta, Shunem yan la a daw jaw daw ya ai lam gaw, shan a prat hta shaman chyeju hte kabu gara lam hpe jaw ya sai. Ndai lam kaw nna sharin la mai ai lam law law nga ai. Karai Kasang a masha wa a tsin-yam tsindam hte kalang ta ra kadawn ai lam hpe shan chye na ya ma ai. Dai gaw shanhte a shaman chyeju a npawt nhpang re ai hpe shanhte chye ma ai. Dai majaw, ndai daw jaw daw ya ai, manam daw ai, hkam sha chye ai amu lam ni gaw shan a akyu a matu galai shai wa ai. Shan a prat tup ra sharawng ai lam hpring tsup wa sai.
Maga mi de, Elisha gaw ndai Shunem yan la a ra kadawn ai lam ni hpe maren sha myit tsang nna, hkam sha chye ai. Dai majaw, shanhte hpe grau nna hpyi shawn ai lam ni (sh) shanhte a daw jaw daw ya ai lam hpe akyu jashawn na malai, shanhte a matu akyu hpyi ya nna, shi a myihtoi ga hku nna shaman ya ai. Shingrai, shi nga ai gaw ndai nta a matu lit n rai, shaman chyeju rai nga ai. Elisa ngu ai mying a lachyum gaw: “Karai Kasang hkye hkrang la ai” ngu ai lachyum re ai hpe dum ra ai. Teng sha nga yang, ndai gaw shi galaw ai lam gaw madi shadaw ya ai lam rai nga ai.
Daw Lahkawng hta, Hkristu gaw kashin kamun hkam ai hku nna anhte hpe asak nnan jaw ya ai lam hpe Pawlu bai tsun dan nga ai. Hkristu gaw shi a akyu a matu n rai, anhte a hkye hkrang la ai lam a matu shi hkum nan hpe gawng malai hkungga hku nna du sa nna nawng ya sai. Kashin kamun hkam ai hku nna shi hpe hkap la ai, si hkrung si htan hta mung, shi hte rau langai sha tai wa saga ai. Bai nna, Hkristu hpe hkap tau la ai hku nna, shi a hpung shingkang rawng ai asak hkrung lam hta shang lawm lu sai rai nna, mara hte si hkrung si htan a mayam n rai sai. Ndai Hkristu langai sha kaga masha ni hta nga nga ai. Dai majaw, anhte a hpunau nauna ni hta na kaji dik htum ai ni hta mung lawm ai kaga masha ni hta mung maren mara shi hpe hkap tau la ra ai.
Dai ni na kabu gara shiga hta, Hkristu gaw Shi a matu kaga masha ni hpe hkap tau la ra ai lam hpe asan sha tsun da nga ai. Ndai lam gaw grau nna, hkye hkrang la ai kabu gara shiga hpe gun hpai ai ni rai nga ai. Daw 1 hta Shunem dinghku zawn, gam jaw gam ya ai hte manam daw ai hku nna, anhte a nta hte dinghku de Karai Kasang a shaman chyeju ni hpe hkap la lu na re. Ndai ni hku nna anhte a prat hte sut masa ni hpe mung galai shai ya lu na re.
Kaja wa myit n pyaw hpa gaw, ndai prat hta anhte gaw lam law law hpe n dum shami hkam la nga ga ai. Anhte nkau mi gaw kaga masha ni hte shanhte ra kadawn ai lam ni hpe n myit mada chye ga ai. Ndai hta Karai Kasang a “teng man ai kasa ni” anhte a lapran nga ai hpe n sawn ai lam lawm ai. Hpa majaw nga yang, tinang hkum hpe tsun shaga ai, masu ai Karai Kasang a masha law law gaw, anhte a shinggyim wuhpawng hpe masu ai shiga ni hte hka lim shangun ai majaw re. Tsun mayu ai gaw, tengman ai hkaw tsun sara hte shut shai ai hkaw tsun sara hpe n chye ginhka lu ai daram du hkra rai nga ai.
Anhte langai hte langai hta mung, teng sha nga yang, Karai Kasang a masha ni hpe mung, shanhte gaw anhte a matu shinggyim masha ni sha rai mat ai majaw mung rai na re. Raitim, ahkyak dik htum hte yawn hpa lam gaw, “Karai Kasang a masha ngu ai nkau mi” zawn, Karai Kasang a masha nkau mi mung, chyoi pra ai lam hpe n chye na mat ai majaw rai na re.
Hpang jahtum ndai ahkyak ai ga san ni hpe tinang hkum tinang san na matu ahkyak nga ai. Kaga masha ni hpe anhte naw manu shadan nga ai kun? Shanhte a ra kadawn ai lam ni hpe anhte myit tau ya ai kun? Anhte nga ai gaw anhte hkrum ai masha ni (sh) anhte hte hkrum ai masha ni a matu shaman chyeju rai kun? Dai gaw shai hkat ai lam byin shangun ai kun, shing nrai shanhte a prat hta lit kaba jat ya ai kun? Kaga masha ni a prat hta ngai hpa akyu jaw ai kun?
Anhte gaw manam daw chye ai hte gam jaw gam ya chye ra ai: Manam daw chye ai ngu ai gaw kaga masha ni hta Karai Kasang nga ai hpe hkap yin la nna, shanhte hta Shi hpe daw jau ai, grau nna anhte Shi hpe mu lu na hpe n myit mada ai ni hta daw jau ai hpe tsun mayu ai. Anhte langai hkrai hku nna mung, wuhpung wuhpawng hku nna mung, manam daw na matu ahkaw ahkang tam ra ai–dai hta n-ga, teng sha nga yang, manam daw na matu ladat law law nga ai. Lama na manam daw ai lam hpe n chye ai masha langai hpe tsawra myit hte tsun shaga ai hku nna – shing nrai, mani sum sai madun dan ai.
Anhte hte rau malu masha mari na matu line kaw la nga ai marai langai ngai hpe tsawra myit hte mani sumsai (sh) “hello” ngu tsun ai gaw, dai masha wa shani tup hta hkrum katut ai tsawra myit langai rai na re. Anhte hkum nan hpe gam jaw gam ya ai hku nna Hkristan ni hkum tsup ai hku hkrung nga lu ga ai. Karum shingtau lam a matu arung arai ni hpe sa ya ai hta grau ahkyak ai gaw, anhte hkum nan hpe masha ni hpe ahkying aten jaw ya ai lam rai nga ai, shanhte a lam hpe anhte myit sawn sumru ai lam, shanhte the tsun shaga ai lam ni hte shanhte a lam ni hpe tsun shaga ai lam ni, shanhte a hkrat sum ai lam ni hpe mara raw ya ai, n-gun jaw ai, hkungga lara ai lam madun ai, shalan shabran ya ai, karum shingtau lam ni hpe jaw ya ai lam ni anhte a kraw lawang kaw na lwi pru wa na re. Dai zawn gam jaw gam ya ai lam gaw Karai Kasang a tsawra myit kaw nna pru wa ai shim lum ai myit hpe madun dan ai lam rai nga ai.