Indonesia mungdan, Jakarta mare hta galaw nga ai Asian Saradaw ni zuphpawng (FABC) a 12 lang na Plenary Assembly de Wa Sarabyin Leo XIV gaw, Asia dan hta Nawku hpung a shawng lam hpe bawngban ai shaloi, Chyoi Pra ai Wenyi a lam matsun hpe tam na matu, Wa Saradaw ni hpe n-gun jaw da ai.
Ndai Zuphpawng a ga baw, “Nang gaw grau kaba ai lam ni hpe mu lu na ndai” (Yn 1:50) ngu ai hpe myit sumru let, Wa Sarabyin gaw, Yesu gaw shinggyim masha ni Karai Kasang hte kanawn mazum ai lam hte, shada da kahkyin gumdin ai lam lahkawng yan a npawt nhpang rai nga ai hpe ahkyak shatai tsun shaleng da nga ai. Shi a ‘Magnifica humanitas, ngu ai laika buk hpe bai myit dum let, Hkristan kahkyin gumdin lam gaw Hkristu hta ru jung nna, Missa hkungga hku nna bau maka nga ai hpe madi madun dan ai.
Wa Sarabyin Leo gaw, shanhte a buga Nawku Hpung ni hta ngang kang ai Missa hkungga wenyi lam hpe shalat ya na matu, tsawra myit hte kahkyin gumdin lam hpe ngang kang hkra galaw na matu, Saradaw ni hpe tsun shadut da nga ai. Ndai grau sung ai kanawn mazum lam gaw, Nawku hpung hpe Karai Kasang nga ai hpe grau dan dawng ai kumla byin tai wa shangun nna, Kahtawlik hpung masha ni hpe ‘Asia dan ting hta simsa lam, kahkyin gumdin lam, rau jawm galaw ai lam ni hpe gawgap ai ni’ tai wa shangun na hpe myit mada ai lam tsun da ai.
Shi gaw, Zuphpawng hpe Chyoi Pra ai Nu Maria kaw ap ya let, Karai Kasang a hpaji byeng-ya, n-gun atsam, shaman chyeju ni hpe hpyi nem let, hpungdim dat da ai.
