Readings: 1st: Is 55: 1-3; Ps 55; 2nd: Rom 8: 35. 37-39; Gos: Mt 14: 13-21
Ndai 18 ngu na Laban shani hta Karai Kasang a Kasha Yesu Hkristu hta hpring tsup, dan dawng wa ai shadawn shadang n nga ai tsawra myit hpe anhte hpe kalang bai shadum ya nga ai. Dai ni anhte galaw nga ai ndai tsawra myit kaba gaw, anhte a prat tup a matu madung rai nga ai zawn, Yesu Hkristu hta dan dawng wa ai, wenyi malu masha chyoipra hkum hte anhte a prat hpe maren mara madi shadaw ya nga ai.
Dai ni na daw 1 hta, Karai Kasang gaw anhte yawng hpe laksan hte mungkan ting hpe saw shaga ai lam hpe maden jat nna, yawng mayawng hpe manu jahpu n jaw ra ai sha jaw ya nga ai. Shi a kumhpa ni rai nga ai, shi a tsawra myit, lanu lahku ai lam ni gaw anhte nsa sa ai nbung zawn lawt lu ai hte shadawn sharam n nga ai. Ahkyak dik gaw, anhte a madung ra kadawn ai lam ni hpe Hkristu chye ya nga ai. Dai ni Karai Kasang anhte hpe saw shaga ai hte maren anhte kaw na ra sharawng ai lam langai sha gaw: “Sa wa u…, ngai tsun ai hpe madat u…myit maju jung u, ngai hpang de sa wa u, na a wenyi hkrung nga na ra ai…”
Ndai gaw kade daram asan sha re ai masa rai ahka..? Shi ra sharawng ai gaw “sa wa u”, madat u”, “myit maju jung u” ngu ai sha rai nga ai. Ndai gaw mungkan ting hpe saw shaga ai lam rai nga ai.Dai hta n-ga, ndai saw shaga ai lam gaw, aten galu magang, anhte a matu ahkaw ahkang n law wa na re. Dai hta n-ga, ndai saw shaga ai lam hku nna, Karai Kasang gaw shi a tsawra myit hpe anhte hpe hkam sha shangun mayu ai.(Is 40:1)
Daw Lahkawng hta, Karai Kasang anhte hpe tsawra ai lam hpe kam hpa myit kaba hte tsun da nga ai. Teng sha nga yang, ndai tsawra myit hpe hkam sha lai wa sai wa hku nna tsun nga ai. Anhte hte Hkristu a tsawra myit lapran hta mai byin ai hpa mung n nga ai, “tsin-yam tsindam, zingri zingrat ai lam, gawng kya ai lam ni n rai…kaning rai nme law, si hkrung si htan mung, asak hkrung lam mung, hpan da ai arai mung, anhte hte Karai Kasang a tsawra myit lapran hta galoi mung n mai byin ai hpe ngai kam nga nngai…” Ndai lam ni yawng gaw Hkristu a tsawra myit hte anhte hpe garan ginhka lu na n re ai hpe Pawlu madi madun nga ai. Ndai lam ni hta na langai mi mung Hkristu hte teng man ai kam sham ai masha shagu a lapran nga ai tsawra myit hte jinghku hku hkau lam hpe shayawm kau lu na n rai.
Dai ni na Kabu Gara Shiga hta, Yesu gaw shi a amyu masha ni anhte hpe tsawra ai lam hpe tatut hta hkrang shapraw nna, madun dan sai. Masha hkying manga hpe lusha jaw sha ai lam gaw Karai Kasang a sung htum ai gam jaw gam ya ai lam hte anhte hpe tsawra ai tsawra myit kaba hpe madun dan nga ai. Ngam ai nga hte muk hte hpring ai ka tawng shi lahkawng gaw Karai Kasang anhte hpe jaw ya ai kumhpa ni lwi shang nga ai lam hpe madun dan nga ai – shaman chyeju, shamai shatsai ai lam, n-gun atsam, n-gun nnan jaw ya ai kumhpa ni rai nga ai. Karai Kasang gaw anhte ra kadawn ai lam ni hpe yu lajang ai hta galoi mung n hkring sa nga ai. Yesu gaw shi hpe aja awa tam ai ni hpe galoi mung myit daw shangun ai n re.
Dai ni na kabu gara shiga kaw na anhte hpa sharin la lu ai kun? Langai, Yesu gaw anhte tsin-yam tsindam hkrum nga ai aten hta matsan dum nna, myit tau ya ai. Anhte hkamsha ai hpe shi hkamsha nna anhte hpe karum ya ai. Lahkawng, anhte shi hpang de sa wa ai shaloi, shi anhte hpe galoi mung n kabai kau ai. Masum, anhte hpe shim lum hkra galaw na matu, shi gaw n kaja ai lam yawng hpe awu asin di kau ya ai. Anhte a akyu a matu sha n mai byin ai lam ni hpe byin shangun ai. Mali ngu na hta, muk ni law law jat wa ai lamik kumla gaw, chyoi pra hkum a laklai ai muk hpe tau hkrau tsun dan ai kumla rai nna, anhte a hkrun lam hta anhte hpe madi shadaw ya nga ai Karai Kasang a tsawra myit hpe tau hkrau tsun dan ai kumla rai nga ai.
Karai Kasang a tsawra myit gaw anhte a prat hta shani shagu matut nna shamai shatsai ya nga ai. Anhte a muk ni hpe matut nna law htam shangun nna, matut nna shalan shabran ya ai, myit dik shangun nga ai. Anhte a ntsa e shi a dawnghkawn gaw tsawra myit rai nga ai (Solamun a Mahkawn 2: 4). Karai Kasang jaw ai shaloi law htam jaw ai.
Hpang jahtum, shanhte a muk hte nga ni hpe ap ya ai ma kaji ni gaw Hkristu a lata hta tsawra myit a arung arai ni rai nga ma ai. Yesu gaw tsawra myit madun ai mauhpa amu hpe galaw na matu dai arai ni hpe ra nga ai. Dai majaw, shanhte gaw dai mauhpa amu hta shang lawm ma ai. Dai ni mung Yesu a lamik kumla ni hta anhte hpe shang lawm na matu saw shaga nga ai.
Ndai bat hta, nang hpa hpe mahkawng da ai (sh) tinang nan gram lajang na matu shakut nga ai hpe myit sumru yu u. Kaga masha langai ngai hpe karum na matu nang n-gun n rawng ai (sh) “n hkum tsup ai” ngu hkam la ai shara langai hpe chye ginhka nga u. Na a “muk tawng manga hte nga lahkawng” hpe Yesu hpang de ap ya nna, law htam wa hkra hpyi nem nga u, na a makau grup yin na ni hpe daw jau na matu shakut shaja nga u.