Manmaw Sasana Sagurem wa, Wa Saradaw Raymond Sumlut Gam gaw majan a majaw hpyen koi yen let shim lum ai shara de shanu shingbyi hkawm nga ai hpung masha ni hpang de sa du kawan katsan, akyu hpyi shaman ya ai hpung kawan hkrun lam hpe July ( 22 – 24 ) ya shani du hkra galaw lai wa ai.
Manman Saradaw ginwang kata na Han Htet, Maing Hkawng, Nam Hpu, Mya Le, Momawk jau ginwang hpung masha ni hpe sa du kawan hkawm ai rai nna hpung masha ni hpe n’gun jaw hkrum shaga ai, akyu hpyi shaman ya ai, grau nna asak kaba sai hte machyi makaw hkrum nga ai ni hpe sa kawan katsan n’gun jaw ai, akyu hpyi shaman ya ai hte hkum hkrang hta n’gun rawng ai baw malu masha kumhpa ni jaw let shi a tsawra myit hpe madun dan ai.
Manje Jau ginwang Han Htet mare hta hpyen koi yen shingbyi taw nga ai hpyen yen dabang de mung sa du kawan nna machyi masha ni, asak kaba nna rawt hkawm sa na n jin n ngut sai ni hpe sa kawan hkrum shaga ai, akyu hpyi shaman ya ai hte hkum hkrang n’gun rawng ai baw malu masha kumhpa ni jaw da ai.
Han Htet mare hta hpyen yen dabang lahkawng nga ai rai nna Camp ( I ) kaw hpyen yen htinggaw ( 70 ) nga ai hte Han Htet mare nnan Camp ( II ) kaw gaw hpyen yen masha htinggaw ( 30 ) nga ai.
Hpyen yen Camp ( I ) hta Manmaw, Manje, Nmawk, Wa Wang, Deng ( II ), Deng ( III ) na hpung masha ni hte kaga hpunau hpung ni mung rau jawm shanu shingbyi nga ai lam chye lu ai.
Manmaw Saradaw Sasana gaw Majan a majaw Wa Saradaw dung ai Manmaw Muklum na St. Patrick Cathedral hte rau Saradaw rung, jau ni nga ai dum nta hte Saradaw ginwang a ginra nta ni yawng wan hkru, hten za mat sai rai nga ai hte Manmaw Saradaw Sasana, shara law law hta majan laja lana byin wa ai majaw Wa Saradaw hte Wa Jau ni, nawku hpung masha ni, buga masha ni law law gaw tinang shim lum dum ai shara ni de hpyen koi yen shingbyi hkawm taw ra ai Saradaw ginwang rai nga ai.
Shiga madat nu wa hpunau ni mung Manmaw Sasana kaw nga ai hpyen yen tsin-yam hkrum masha ni hte shara shagu na hpyen yen tsin-yam hkrum masha ni a matu akyu hpyi garum ya ai hte shinggyim hpu nau, nau na myit hte shada garum shingtau la nga ga. Myanmar Mungdan lawan ngwi pyaw simsa wa na matu mung matut nna akyu hpyi shakut ding yang rai nga ga law.
