Wa Sarabyin rung kaw nna Myitkyina Saradaw ginwang a matu Lit Hkam Saradaw lata dang dat ai kabu gara shiga na lu ai majaw ngai mung grai na kabu ai. Hpa majaw kabu ai I nga yang No ( 1 ) kabu ai gaw Anhte Myitkyina Saradaw Ginwang kaw lit hkam Saradaw n lu mat ai, grai na mat sai majaw kadai mung Saradaw Kut nga ai aten re, Myitkyina Saradaw ginwang kaw nga nga ai sagu hpung masha Jau, Mama ni chyu sha n re, kaga Saradaw ginwang kaw nga ai Manmaw, Lashio, kaga Myanmar Mung Saradaw ginwang kaw nga ai ni yawng mung grai marit myit mada nga ai re. No ( 2 ) hku nna kabu ai lam ni nga ai ngu ai gaw ya Saradaw tai na Msgr. La Sam gaw shi shangai wa ai, nga kaba wa ai lam ni hpe yu yang shi gaw Sammung maga de shangai wa ai majaw Lashio Saradaw Ginwang a masha mung rai nga ai. Manmaw ga de mung jau tai jawng garai n lung shi ai, jau tai jawng lung ai hpang hkan shaning law law wa nga ai majaw anhte Manmaw ga na hpung masha ni, ramma ni mung shi hpe law law chye ai lam chye lu ai, dai majaw Manmaw de mung seng nga ai ngu ai lam mung nga nga ai. No ( 3 ) hta gaw Msgr. John La Sam shi a lam shawng de gaw n chye hkat ai, n hkrum yu ai raitim shi hte lak lak lai lai hkrum ai lam gaw 2006 ning ngai Myitkyina nga ai shaloi Manmaw Saradaw Ginwang a Saradaw hku nna lata la hkrum ai shaloi ngai hpe e Manmaw de htaw sa na, Mawdaw gau ya ai gaw dai La Sam ngu ai wa rai taw nga ai. Dai shaloi shi hpe shawng ningnan lang mu ai, kaja wa rau hkawm nna shaga hkat ai, shaloi shi a lam hpe grai chye la hkat ai, grai myit sumnung shingdi ai, makam masham myit rawng ai, shi a myit jasat mung tsun ai shaga ai ni grai hkrak nga ai. Dai shaloi kaw nna ndai La Sam ngu ai wa hpe grai yu kaba ai. Yu maya masha, shabrang kaba langai mi hte lam galu rau hkawm nna tsun ai shaga ai ni kaw na hkawt, shi gaw grai myit su ai masha langai mi re ngu nna hkam la ai.
