Daini na hkamja lam hte seng ai machye machyang hkaja la na aten hta gaw myen myusha ga hku Danyin si ngu shamying ai hpun shamyen si sha ai gaw hkum hkrang a matu akyu nga ai kun shing n rai hkam kaja lam hta hkra machyi shangun ai re kun ngu ai hpe kalang mi bai tsun shadum garan kachyan ya mayu ai.
Ndai hpun shamyen si gaw hkam kaja lam a matu n hkrak ai re ngu ai hpe chye ga ai raitim shi a nam chyim chye sai ni gaw n sha nna n lu nga ai, n lu koi na daram ra sha chye nga ga ai. Sha ai shaloi mu ai raitim sha ngut ai hpang shani hkan du hkra n-gup manam ai, nam sa, hka sa yang namdum, hka dum manam rai nna mung n sha ai masha, kaga masha ni a matu n hkrak nga ai re. Anhte grai sha mu dum ai hpun shamyen si hta e hkrit tsang ra ai gung acid rawng ai majaw hpun shamyen si sha shut nna tsi rung tsi gawk du ra ai masha ni mung law law rai nga ai hte n kau mi aten dep n lu tsi la ai majaw asak si sum ra ai du hkra rai nga ai. Hpun shamyen si hta rawng ai Djenkolic acid ngu shamying ai amino acid hpan myu mi gaw hka hta tun byawng na grai yak ai rai nga ai.
Anhte hpun shamyen si hpe sha dat ai shaloi dai acid gung gaw sai lam lasa ni kaw nna sade de du mat ai. Jit sa lam de du ai shaloi dai Djenkolic acid ni gaw ja ai pat masen hku nna gale mat nhtawm sade hte jit sa ai sai lam lasa ni hpe achyaw nna pat kau ya ai majaw ginshang hte jit sa lam shara ni hta n chyi n mu nga machyi ai, jit sa yak ai, jit hti hti ai, jit hta sai lawm ai, aten dep n lu tsi kau ai rai yang a kajawng sha sade hkra machyi hten mat chye ai hte asak lawm mat na madang du hkra tsang shara nga nga ai.
Rai yang hpun shamyen si gaw hkamja lam a matu n mai nan n mai sha ai baw re kun ngu ai hpe hkaja yu ai shaloi n sha hkra koi gam lu ai gaw kaja dik re nga tim tsep kawp nan n mai sha ai baw gaw n re. Grai ra sha ai majaw n lu koi nna sha na rai yang hkra machyi lam hkyamsa hkra galaw mai ai lam ni nga ai hpe matsun da ya nga ai.
Gara hku sha yang hkra machyi lam hkyamsa ai baw re kun nga yang hpun shamyen si hpe katsing kachyi mi mung n mai sha ai. Katsing sha ai gaw acid dat hpe hkum hkrang kata de hpring tup di shang shangun ai lam tsun da nga ai. Hka hta aten na na tsing kau shing n rai shadu kau u. Hpun shamyen si hpe garai n shadu shi yang 2/3 ya hka tsing kau lu yang kaja ai. Shing n rai shadu ai shaloi Baking Soda kachyi mi bang nna shadu ai rai yang Alkaline dat gaw Djenkolic acid hpe loi loi shatun byawng nna gung labu nsa hpe shayawm kau ya lu ai. Shadu ntsin hpe kachyi mi mung n mai lu ai.
Sha mayu ai, grai ra sha ai raitim, shamyen si sha ai hpe madung sadi koi gam ra na masha ni gaw sade ana lu ai masha ni, sade n’gun yawm ai, sade bungli atsawm n lu galaw ai masha ni a matu gaw hkrit tsang ra ai gung byin shangun ai re majaw tsep kawp n mai sha ai, koi gam lu ai kaja dik rai nga ai. Bai nna ndai hpun shamyen si hpe jit sa lam hta n lung rawng ana lu yu sai masha ni hte jit sa lam hta ana kanu shang ai masha ni mung n sha ai kaja dik rai nga ai.
Hka law law n lu ai masha ni, shani shagu hka dat hpring hkra n lu ai masha ni gaw jit law law n sa ai re majaw jit hta acid grau majaw rawng loi ai rai nna dai masha ni mung hpun shamyen si hpe n mai sha na, koi gam na ra nga ai. Bai ma kaji ni n mai sha ai. Ma kaji ni a sade gaw kaji nna naw hkalung ai re majaw kachyi mi sha dat ai hte rau aloi sha jahten hkra wa lu ai hpe sadi la na ra ga ai. Ma hkum rai taw ai kanu num ni mung koi gam ra ai. Hpa majaw ta nga jang sai kata de du mat ai hpun shamyen si a gung labu ni gaw hkri tung na ma hpang de du nna ma a hkamja lam hpe hkra machyi wa shangun lu nga ai.
Tsawra ai shiga madat ni grau nna anhte Jinghpaw mung kaw nga ai masha ni gaw hpun shamyen si kung ai ten tsa lam hku shadu da nna kalang ta law law sha chye nga ga ai. Dai gaw n kaja ai lam re hpe sadi jaw tsun da nga ai. Nang grai sha mayu nna sha ai raitim law law hkum sha u, masum hta jan nna n sha ai gaw kaja dik re nga nna tsun da nga ai. Sha ngut ai hpang hka law law bai lu ya u. Hpun shamyen si sha ai shani ni hta jit sa lam kata acid ni majaw rawng taw ai lam n byin na matu hka law law lu ya na ra nan ra ai hpe mung tsun sadi jaw da nga ai.
Lama hpun shamyen sha shut nna machyi wa ai rai yang kaning re ai masa hta tsi rung tsi gawk n sa n mai rai ra ai kun? Hpun shamyen si sha ngut ai hpang hkying hkum mi kaw nna hkying hkum 14 laman ginshang hte jit sa lam ni hta ndang sharang na daram machyi wa ai, jit sa ai shaloi grai machyi wa ai shing n rai jit hta sai lawm wa ai, jit n pru hkraw ai, kraw galau ai, madawn ai ndai zawn re ai machyi kumla ni byin wa ai rai yang tsi rung tsi gawk de n du n mai sa madun tsi tsi hkam la na ra ga ai re. Nta kaw chye ai hku tsi taw nna aten shalai kau ai lam n byin na grai sadi la ra ai.
Dai re majaw tsawra ai shiga madat nu wa hpu nau ni malu masha ngu ai gaw myen ga malai hta na အစားမတော် တစ်လုတ် nga ai hte maren n-gup mi hta sha dat nna mung sha shut chye nga ai, bai nna law law sha shalai jang mung hpyen tai wa chye ai hpe sadi la nga ga. Ra sha nna sha ai nga tim tinang a hkam kaja lam, tinang a sade hkra machyi ai lam n byin hkra gaw machye machyang hte rau sadi sahka shadawn sharam rai sha chye ga ngu tsun shadum garan kachyan ya dat lu ga ai.