“Nanhte chyawm gaw, nsin kata de nna shi a mauhpa nhtoi de nanhte hpe shaga bang ai wa a dan hkung ai magam hpe shabrawng dat ya myit ga, lata la ai amyu, hkawhkam hkinjawng ni, chyoi pra ai amyu baw hte, Karai Kasang lahku la ang ai masha ni, rai nga myit dai.”
1 Petru 2:9
Karai Kasang a tsawra ai kasha ni ngu ai sari anhte hpe bai jaw ya chye ai Karai Kasang a tsawra ai salum hpe asan sha mu mada shangun ai mabyin lam ni hta na dan dawng dik ai mabyin langai gaw bai wa ai Dam mat ai kasha hpe shi a kasha ngu ai sari hpe bai jaw ya ai mabyin lam rai nga ai. Dai dam mat ai kasha, kawa a nta de bai wa na matu daw dan ai shaloi, kawa a nta hta magam bungli galaw nga ai shangun ma nchyang mayam langai zawn sha shi hpe kawa hkap la na hpe myit mada let shi bai wa ai rai nga ai. Raitimung, nta de ni wa ai shaloi, kawa gat pru sa wa nna, kawa a myi hta kawa hpe galoi mung tsawra chye ai kasha langai zawn shi hpe hkap la nna, kasha ngu ai sari, ma hpe bai jaw ya ai.
2 Kor 5:17 hta, “Hkristu hta e marai langai ngai rai nga ai teng yang gaw, shi gaw ningnan hpan da ai wa rai nga ai; dingsa hte gaw lai mat wa sai, yu mu, dai hte gaw ningnan tai wa sai,” nga nna Kasa Pawlu shadum da nga ai. Madu Yesu Hkristu a si ai hte bai hkrung rawt ai lam hpe kam sham ai a marang e, shut hpyit ai amyu masha ni ngu ai prat kaw nna hkye la hkrum ai amyu ni ngu ai sari hpe anhte lu la ga ai. Kawa Karai Kasang anhte hpang de pru sa wa nna, shut hpyit ai amyu ni n rai sai, kawa a tsawra ai kasha ni re, kawa a hpungshing kang hta kawa hte rau jawm pawng gahkyin nga ai shi a kasha ni re ngu ai sari hpe anhte hpe jaw ya ai.
Myit htoi Esaia 43:1 hta, “Ya chyawm gaw, Yaku amyu e, nang hpe hpan da ai wa, Israela dap e, nang hpe hpajang da ai wa Karai Kasang ning nga ai: Hkum hkrit e, ngai nang hpe hkye hkrang la ni ai; na a mying hte ngai nang hpe shaga nna, nang nye a rai nga ndai,” nga nna Karai Kasang tsun ai. Shut hpyit ai amyu ni ngu ai dazik hpe raw kau ya nna, Madu Yesu a asai hte hkye hkrang la hkrum ai ni, ngu ai sari hpe jaw ya ai. Ndai lam gaw anhte tinang a atsam hte galaw la lu mai ai lam n rai nga ai.
1 Petru 2:9 hta, “’Nanhte chyawm gaw, nsin kata de nna shi a mauhpa nhtoi de nanhte hpe shaga bang ai wa a dan hkung ai magam hpe shabrawng dat ya myit ga, lata la ai amyu, hkawhkam hkinjawng ni, chyoi pra ai amyu baw hte, Karai Kasang lahku la ang ai masha ni, rai nga myit dai,” nga nna Kasa Petru tsun shadum da nga ai. Karai Kasang e hkye hkrang la da hkrum ai amyu masha ni, ngu ai anhte lu la sai sari sadang gaw dai Kawa Karai Kasang a hkyik hkam kaba dik ai mai kaja ai lam hpe hkaw tsun ndau lam galaw na matu rai nga ai. Ndai mungkan ga gaw anhte a ntsa majing n rai nga ai, anhte gaw hpan madu Karai Kasang a kashu kasha ni, tengman ai Madu Karai Kasang a kashu kasha ni, nnan bai hpan da hkrum ai amyu ni rai nga ga ai.
- Kasha ngu ai sari hpe bai jaw ya ai, dam mat ai kasha a mabyin ja chyum mungga hpe bai hti sumru yu mai ai,
- Anhte gaw Kawa a tsawra ai kasha ni rai nga ga ai, ngu ai lam tinang a hkum hpe mu mada wa hkra Chyoi pra ai Wenyi kaw akyu hpyi mai ai,
- Anhte hta nga ai Kawa a tsawra ai kasha ni ngu ai sari hte bung pre ai magam bungli ni hpe galaw shabyin lu hkra Kawa Karai Kasang kaw akyu hpyi mai ai.