Readings: 1st: Is 55:6-9; Ps: 144:2-3.8-9.17; 2nd: Rom 1:20-24.27; Gos: Mt. 20:1-16
Ndai pranwan ladaw laban 25 ngu na Laban shani hta, Karai Kasang a myit yu nma ai lam ni hte tsawra myit hpe myit sumru yu na matu saw shaga da nga ai. Ndai tsawra myit hpe shinggyim masha ni a madang hku n dang hti lu ai. Dai majaw, ndai tsawra myit hpe kasi la na matu Nawku hpung gaw saw shaga nga ai. Daini na chyum mungga yawng hta bung ai lam langai mi nga ai: dai gaw Karai Kasang anhte hpe tsawra ai lam rai nga ai.
Daw 1 hta Esaia gaw “Karai Kasang hpe mu lu ai aten hta shi hpe tam mu, shi naw nga yang shi hpe shaga mu, tara n lang ai wa gaw shi a lam hpe kau da u ga…!” Ndai hta, shi a amyu masha ni hpe tsaw ra myit madun dan ai Karai Kasang hpe mu lu ga ai. Anhte sadi n dung ai raitim, anhte hpe matut nna tam nga ai Karai Kasang hpe mung mu lu ai. Anhte hpe lanu lahku ai hte hkap tau la na matu jin jin rai nga ai Karai Kasang re.
Daw Lahkawng hta Pawlu gaw Karai Kasang hte Kabu Gara Shiga hpe tsaw ra ai lam tsun dan nga ai. Hkristan ni hku nna, anhte hpe lam lahkawng de gang shadut ai lam law law nga ai. Anhte yawng gaw sumsing lamu de du mayu ai raitim, ndai prat gaw anhte hpe naw myit sharawt ya nga ai. Pawlu mung dai zawn sha hkam sha lam amyu myu nga ai. Kade nna yang htawng kaw na pru wa na hpe kam tim, Nero a nhtu a npu e hkrat sum mat chye ai hpe shi chye nga ai.
Dai gaw shi hta manghkang byin shangun ai. Shi gaw Hkristu hte rau nga mayu ai, hpa majaw nga yang, dai gaw grau kaja na re. Raitim, shi mung makam masham hta nga ai kahpu kanau ni hte kashu kasha ni hpe tsawra ai majaw asak hkrung mayu wa ai. Dai majaw, prat hta grau sung ai manghkang hpe Pawlu htai ai gaw, “Akrung nga ai gaw Hkristu rai nga ai, si ai gaw awng dang lam rai nga ai.” Anhte galaw ai lam yawng hpe Hkristu, kabu gara shiga hte hpunau nauna ni hpe tsawra ai myit gaw shadut ya ra ai. Anhte a n-gun atsam a npawt nhpang rai ra ai.
Ndai hku nna Karai Kasang (sh) anhte a hpunau ni a matu si hkam ai (sh) asak hkrung ai gaw yawn hkyen lam n rai mat na re. De a malai, kabu gara shiga hpe sakse hkam ai lam rai na re. Kaga ni hpe tsawra ai lam hpe madun dan ai lam byin wa na re. Pawlu gaw shi a myit sumru ai lam hpe lawu na lam matsun hte kadun dawk tsun dan ai: “Hkristu a kabu gara shiga hte n htap htuk ai lam yawng hpe shani shagu na sak hkrung lam hta koi gam nga mu.”
Kabu gara shiga hta, Hkristu gaw anhte hpe manghkang langai mi hpe madun dan nga ai. Bungli madu gaw yawng hpe gumhpraw maren sha gara hku jaw lu na kun? Dai ni anhte law malawng chye na na zawn, shawng na bungli galaw hpung ni a matu chye na na matu yak hkak nga ai. Ndai ga shadawn hta lawm ai tsabyi sun madu a galaw ai lam hpe chye na na matu ahkyak ai lam gaw daini na daw 1 hta rai nga ai. Karai Kasang anhte hpe shadum ai gaw, “Nye a myit mang ai lam gaw nanhte a myit mang ai lam n rai, nye a lam ni mung nanhte a myit mang ai lam n rai nga ai.”
Dai ni kabu gara shiga hta anhte mu lu ai lam gaw Karai Kasang a tara rap ra ai lam sha rai nga ai. Shi a tara rap ra ai lam hpe shi a gam jaw gam ya ai lam hte yawng hpe n-gun n rawng ai tsawra myit gaw uphkang nga ai. Hpang jahtum na bungli galaw hpung hpe shi galaw ai lam gaw, shi gaw tara rap ra ai lam (sh) sut masa lam hte maren n galaw ai hpe madun nga ai.
De a malai, shi a saw shaga ai lam hpe hkap la ai ni yawng hpe tsawra myit hte gam jaw gam ya ai lam gaw shi hpe shadut ya ai. Anhte yawng hpe mung, dai zawn n ging dan ai saw shaga ai lam hpe shi galaw ya sai. Shi a tsawra myit gaw shadawn shadang n nga ai majaw, yawng hpe shabrai maren sha jaw na re. Shi a shabrai gaw kadai hpe mung shaga ai aten hta n rai, yawng hpe shi a gam jaw gam ya ai hte myit n lu ai tsawra myit hta madung nga ai.
Karai Kasang a tsabyi sun hta ahkyak ai gaw, shaning law law magam gun ai lam n rai, lata la hkrum ai wa hku nna myit masin shakut shaja ai lam rai nga ai. Masha yawng gaw Karai Kasang a matu maren mara manu dan nga ai, gara aten hta shang wa ai raitim, Karai Kasang a mungdan hta nga ai yawng a matu Karai Kasang a shabrai gaw ndai rai nga ai: Shi a Karai Kasang a saw shaga ai lam hpe sadi dung let hkap la ai ni yawng hpe Shi a chyeju jaw ya ai.
Anhte gaw ayan shadawn, shingdaw, hti chye ga ai. Shi n galaw ai. Anhte gaw shingdu de shingdang ga ai; Shi gaw shadawn sharam n nga ai sha jaw ya nga ai. Anhte garan ginhka ai; Shi gaw yawng hpe garan ginhka ai lam n nga ai sha hkap tau la nga ai. Madu a matu ahkyak ai gaw, Shi a shaga la ai lam hpe kade daram alawan, kade daram hpang hkrat ai hku htai ya ai n re, anhte tsep kawp htai ya ai lam rai nga ai.
Karai Kasang gaw na a yubak mara hta n nga ai. Nang kade ning tup hkawm sa wa ai hpe shi n hti ai. Shi a matu ahkyak ai gaw, nang nhtang wa ai aten, Shi a tsawra myit hte myit malai lu na matu saw shaga ai hpe nang hkap la ai aten rai nga ai. Shi a matsan dum lama ai gaw galoi mung n hpang hkrat ai, Shi a gam jaw gam ya ai lam gaw galoi mung n htum mat ai.
Lama na nang gaw n ging dan ai ngu hkamsha ai rai yang. Lama na Shi a tsabyi sun de nang grai hpang hkrat du ai wa ngu nang myit la ai rai yang. Raitim Karai Kasang a matu gaw galoi mung n hpang hkrat ai. Shi a matsan dum lama ai chyinghka gaw naw hpaw nga ai, Shi a tsawra myit a shaga la ai lam galoi mung n htum ai.
Hpang jahtum ahkyak ai gaw, Madu gaw shi a saw shaga ai lam hpe hkap la ai ni yawng hte ni htep ai lam rai nga ai. Gara hku, galoi aten hta galaw na ngu ai gaw ahkyak n re. Shi a tsawra myit gaw yawng a matu rai nga ai.