Daini na Ja Chyum Mungga hpe hti sum ru yu ai shaloi e Yesu hpe Udang hta jen da ma ai lam na lu ga ai. Shiga madat nu wa ni e dai ni nawku hpung kaw nna, Chyoi pra ai Maria a yawn hkyen lam a poi hpe galaw nga ga ai. Madu Yesu hpe shi a prat hta e hkap la ai majaw, Nu Maria yawn hkyen myit ru ai lam (7) nga nga ai. Anhte marai langai hpra a prat ni hta e mung, myit ru yawn hkyen ai lam ni hkrum katut chye nga ga ai. Nu Maria zawn myit galu kaba ai, hkam sharang ai, mara raw ya ai.

Akyu hpyi ya ai. Madu Karai hte htep lahti nga chye ai. Bai mai kaja ai lam ni hpe chyu sha sumru dik lik yu nna galaw sa ai. Bai mungkan ting hkye hkrang la ai hkrum lu na matu, shi a prat hpe ap nawng daw jau ya ai zawn, masha law law hkye hkrang la ai hkrum lu na matu, anhte a prat hpe mung Madu Karai kaw ap nawng sa ga law. Lam shagu hta yak hkak jan jau ap nawng hkam sharang ai Nu Maria kaw kasi la nga ga. Shi kanu kaw ra nga ai chyeju mung hpyi la nga ga law.