Daini na Ja Chyum Mungga hpe hti sumru yu ai shaloi e, Madu a akyu hpyi ga hpe na chye la lu ga ai. Ndai Madu a akyu hpyi ga gaw, hkum zup dik ai kyu hpyi ga langai mi rai nga ai. Madu a kyu hpyi ga a shawng daw de gaw, Madu Karai hte shinggyim masha ni a lapran e hku hkau ai hte matut mahkai ai lam hpe madun da nga ai. Bai daw (2) de gaw, shinggyim masha langai a sak hkrung na matu ra rawng ai lam yan ni hpe hpyi la ai lam re. Madu a akyu hpyi ga gaw, hkristan ni hpe Karai a ra sharawng ai lam hta sak hkrung na, mara raw hkat ya ai lam tam na, nat tsadan hpe ninghkap lu na matu, Madu Karai a garum shingtau ai lam lu la na matu mung, ninggun jaw nga ai.

Ya daini nawku hpung gaw, Rosary a Hkawhkam jan poi hpe galaw nga ga ai. Ndai Rosary hti kyu hpyi ai gaw, kam sham ai ni a matu, mau hpa  atsam rawng ai lak nak kaba nan re. Raitim ya ndai prat maga de dum nta masha ni arau Rosary hti akyu hpyi ai lam grai yawm mat wa ai hpe mu lu ga ai. Nu Maria hkum nan dan pru ai shaloi e Rosary hti na matu htet da sai. Ndai Rosary kyu hpyi ai gaw mara lu ai ni myit galai mat na matu kaja dik ai kyu hpyi ga re. Nang hkrit tsang na lam hte hkrum katut wa ai shaloi, hkrit hpa lam kaw na makawp maga ya ai lak nak, myit ru shoi hpa hkrum ai ni hpe shalan shabran ya ai, bai Myit mada shara  n nga ai ni hpe, sak hkrung lu na, ningsin chyip rai nga ai ni hpe, ninghtoi lam tai ya nga ai re. Dai majaw Rosary a kyu hpyi shakut let hkrit hpa kaw na lawt lu mu ga law.