Daini na Ja Chyum Mungga hpe hti sumru yu ai shaloi e, masha ni Yesu kaw lamik kumla hpyi ma ai lam na chye lu ga ai. Ya dai ni kabu gara shiga hta e, makam masham lamik kumla hte mara raw hkyam sa ya na lam hpe tsun da nga ai. Kalang lang anhte ni gaw, Madu Karai Kasang nga nga ai ngu ai hte shi a matsan dum lama ai lam ni hpe sakse madun na matu hpyi shawn chye nga ga ai. Anhte gaw Madu Karai shi a yaw shada ai lam ni hpe n chye na ai raitim pyi kam sham lam nga nan nga ra ga ai. 

Yona a lamik kumla gaw Ninive masha ni hpe myit malai lu shangun ai zawn, anhte ni mung mara kaw na tawt lai let, myit malai lu nna, Madu Karai a prat ningnan hpe hkap la lu na matu, ninggun jaw da nga ai. Shingrai anhte a makau grupyin kaw nga ai lamik kumla ni gaw, myit malai lu na hte, Madu Karai anhte hpe lam madun na matu gaw, ahkaw ahkang jaw na ra nga ga ai. Madu Karai Kasang gaw, anhte a myit tsaw myit dap ai hte hpyi shawn ai lam ni nga ai raitim mung, anhte myit malai lu ai rai yang e, Madu Karai tut e mara raw hkyam sa ya na re. Dai majaw myit malai kaba hte, shi Madu kaw sit shang kam hpa let sak hkrung nga sa ga law.