“Nang hpe gun ai hkritung hte nang hpe chyu jaw ai num gaw a’ lu nga ai (Luka 11:27)” ngu nna Yesu hpe tsun ai numsha gaw kadai rai ta? Shi gaw Yesu a ga hte magam bungli ni hpe grai ra sharawng ai majaw, Chyoi Pra ai Nu Maria hpe madun dan nna, Yesu a npawt nhpang shi hpe hkungga jaw ai lam dan dawng nga ai.

Chyoi pra ai Nu Maria hpe mung dai zawn sha hkungga lara ai lam jaw nga ga ai kun? Hkristan makam masham nkau mi gaw, anhte hkungga ai zawn, Chyoi Pra ai Nu hpe n’hkap la ma ai. Raitim, Yesu a kanu hpe hpa majaw n mai hkungga ai kun? Chyoi Pra ai Kanu n nga yang Yesu n shangai wa na nrai nna anhte hta hkye la madu mung n nga na re.

Raitim, Chyoi Pra ai Kanu a shagrit shanem ai myit a majaw Yesu ndai mungkan ga de shangai wa sai. Shi gaw Yesu a kanu hku nna shi a chyoi pra ai sasana magam hpe shagrit shanem let hkap la nna, ngai gaw Madu a mayam jan rai nga nngai, na a ga hte maren ngai hta byin u ga (Luka 1:38) ngu tsun ai.

Ndai kabu gara shiga gaw anhte yawng hpe Chyoi Pra ai Nu Maria hpe grau nna hkungga lara hkungga jaw na matu saw shaga ai lam rai nga ai. Anhte a matu galoi mung akyu hpyi ya na matu hpyi shawn ai hte Chyoi Pra ai Rosary akyu hpyi ai hku nna shi hpe hkungga jaw ga ai. Ndai lam gaw anhte a prat hta tinang a kanu ni a lit hpe mung shadum ya nga ai. Shanhte hpe hkungga lara ai hte bau maka lu na matu shanhte a lahpa ntsa e gun hpai ai n dang hti ai hkungga na lam ni hpring nga ai.

Chyoi Pra ai Kanu hpe hpyi nem nna, na a akyu hpyi ga ni hpe Yesu hpang de la sa ya na matu galoi mung dum nga ai kun? Bat mi hta kalang sha pyi Chyoi pra ai Rosary hti akyu hpyi nga ai kun?