Readings: 1st: Rev 7, 2-4. 9-14; Ps: 23; 2nd: 1 Jn 3, 1-3; Gos: Mt 5, 1-12
“Shanhte gaw ga n shaga ma ai, shanhte kaw na nsen mung n na lu ai, rai ti mung, shanhte a nsen gaw ga ntsa ting e, shanhte a ga gaw mungkan htum hkra du nga ai. Sumsing lamu hta Karai Kasang gaw jan a matu sum gap da nu ai (Sh.K 19, 4-5)”.
Daini nawku hpung gaw anhte a share shagan ni hpe shagrau na matu ahkaw ahkang jaw nga ai. San Pra ai ni yawng a poi gaw, nawku hpung kaw nna tara shang san pra ai ni (sh) beatified n galaw ai raitim “Sadi dung ai ni” law law a shakut shaja ai lam hpe myit dum masat masa galaw ai poi rai nga ai.
Hkristan hpung langai mi a kam sham ai lam hte nhtan shai ai hku nna: “Masha wan mi mali shi mali sha hkye hkrang la hkrum na (sh) Karai Kasang a mungdan de shang lu na re” ngu ai hte shai hku nna, dai ni daw 1 hta lawm gaw, awng dang ai kadai mung Karai Kasang a mungdan hta shara law law nga ai ngu ai myit mada lam hpe jaw ya nga ai. Dai majaw, All Saints ngu ai hpe tsun mayu ai gaw: “Kadai mung n dang hti lu ai daram law ai masha wunawng wuwa gaw, amyu bawsang shagu, mungdan shagu, ga amyu hpan shagu na masha shagu rai nga ma ai.”
Ndai lam gaw ahkyak ai lam lahkawng hpe madun dan nga ai. Langai gaw, tara shang chyoi pra ai ni ngu masat da hkrum ai ni hta lai nna, kaga law law wa, share shagan ai hte kaja ai prat hpe nga lai wa sai. Shanhte hpe masha ni n shakawn shagrau ai raitim, Karai Kasang, Hpan Madu, Kawa gaw shanhte a shakut shaja ai lam hpe chye na ya nga ai. Dai ni gaw: “Sagu Kasha a asai hta shanhte a hpun palawng ni hpe kashin kau ai ni,” ya gaw, “Awng padang, hkye hkrang la ai lam, hkungga lara ai hte hpung shingkang gaw anhte a Karai Kasang a rai nga ai, hpa majaw nga yang shi gaw Tsawra myit rai nga ai!” Lahkawng, Karai Kasang a tsawra myit gaw amyu bawsang yawng a matu re ai hpe mung madun dan nga ai.
Dai majaw, dai ni na lahkawng gaw, Karai Kasang anhte hpe kade daram tsawra ai hpe shadum ya nga ai. San Pra ai ni yawng (awng padang lu ai nawku hpung) gaw ya ndai tsawra myit a hpring tsup ai lam hpe hkam sha nga ma ai. Anhte (“bu hkawm nga ai hpung”), ya du hkra naw hkrung nga ai ni mung, Karai Kasang a tsawra myit hpe hkam sha nga ga ai. Ndai tsawra myit langai sha anhte a shani shagu na hkrun lam hta anhte hpe madi shadaw ya nga ai. Raitim, shanhte zawn awng dang wa ai shaloi, anhte mung galai shai wa nna, ndai tsawra myit a hkum tsup ai lam hpe hkam la lu na re. Dai majaw, Yawhan anhte hpe ndai hku tsun ai: “Hpu nau ni e, anhte ya e Karai Kasang a kashu kasha ni rai nga ga ai, rai ti mung, hpang jahtum e anhte kaning rai na ga ai, garai n dan dawng nga ai.” Anhte gaw hpung shingkang rawng ai Hkristu hte chyoi pra ai ni zawn rai na re. Karai Kasang a tsawra myit hpring tsup ai hta anhte shang lawm lu na re.
Daini anhte a kabu gara shiga gaw, dai ni anhte hkungga lara ai San Pra ai ni yawng hpe hkum tsup ai hku kam hpa mai ai lam hpe jaw ya nga ai. Shanhte gaw teng sha Shaman Chyeju hte Kabu Gara ai ni rai ma ai. Shanhte langai hte langai gaw ndai garan ginhka ai lam langai (sh) law law hta lawm ai. Shanhte gaw wenyi hta matsan ai ni rai ma ai. Kaga masha ni hkye hkrang la hkrum na matu nni nkri hkrum let hkrap ngu hkrap ngoi nga ma ai. Shanhte gaw tara rap ra lam hte tengman ai lam hpe kawsi hpang gara nga ma ai. Dai lam hta shanhte hpe grai zingri zingrat nna, hkra machyi shangun ai. Dai lam ni yawng nga tim, shanhte a myit masin san seng ai, yawng hpe matsan dum chye ai, simsa lam a matu shakut shaja ai ni rai ma ai.
Ndai lam gaw, San Pra ai ni yawng a profile hte ya aten na shagrau kumhpa hte bung ai raitim, myit mada shara kaba hte ga sadi kaba hpe mung tawn da ya nga ai. Chyoi pra ai ni yawng gaw anhte langai hte langai zawn si chye ai shinggyim masha ni rai nga ma ai. Shanhte du wa ai, mu ai, gasat gala ai, shanhte dang kau ai. Shanhte hpe garum ya ai chyeju nan dai ni du hkra anhte a matu naw nga nga ai. Kabu gara shiga gaw, shanhte galaw ai zawn hkawm sa nna hkam sharang yang, anhte mung ndai hkrak ai profile hte shagrau kumhpa hpe hkam sha lu na re.
Daini na poi kaw na sharin la lu ai lam ni gaw grai kaba nga ai. Kalang lang, masha nkau mi tsun ai hpe na lu ai: “Yu u, ngai bungli galaw nna, ngai dang lu ai daram galaw nga ai, rai tim kadai mung ngai hpe n chye na ai, ngai ndai kaw nga ai hpe kadai mung n chye ai, ngai shakut shaja ai lam hpe kadai mung n myit yu ai. Ngai hpe kadai mung hpa n sawn ai, hpa lachyum n pru ai” Karai Kasang kadai re ai hpe chye na yang, ndai hku myit, tsun shaga na n re.
Teng sha nga yang, shinggyim masha ni gaw na a shakut shaja ai lam hte manu dan ai lam hpe manu n shadan ai rai tim, Karai Kasang gaw manu shadan ai. Ndai lam gaw nang kaw nga ai hpe shi chye ai majaw re. Nang hti lu ai, shi a matu nang,ngai grai ahkyak ai, Shi a “hpaga jahpan” hta nang, ngai lawm nga ai. Shi gaw nang, ngai hpe tsawra nna, shi a tsawra myit hpring tsup ai hta shang lawm lu na matu ndai mungkan hpe dang manga lu na matu akyu hpyi let myit galu let ala nga ai. Dai majaw, San Pra ai ni yawng zawn, Madu tam nga ai masha hpan hta nang, ngai mung lawm nga ai. San Pra ai ni yawng, Akyu hpyi ya uga!