“Lani Jan sha nang hpe, sanit lang shut nhtawm, Ngai myit malai lu ni ai, nga nna sanit lang nang hpe bai kayin nem yang gaw, shi a mara dat kau ya u, ngu nna tsun mu ai.” (Luka: 17: 1-6)
“Mara dat ya nchye ai akyang gaw, anhte shinggyim masha shagu kaw rawng ai, gawng kya ai lam rai nga ai.”
Tsawra la ai shiga madat Nu Wa Hpu Nau ni e, anhte shinggyim masha ni gaw shut chye ai ni hkrai rai nga ga ai. Mara raw dat ya ai lam hpe ra taw ai ni raitim, mara nau n kam dat ya hkat ai ni, rai nga ga ai. Kalang lang madu gaw masha ni hpe, shut kau ai lam ni nga yang gaw, ngai shut kau ai mara naw dat ya rit, nga chye hpyi nem nga ga ai. Raitim, manaw manang ni madu hpe shut jang gaw mara dat ya na matu grai lit li nga ga ai.
Mara dat hkat ai lam gaw Karai Kasang hte seng ai lam rai nga ai majaw anhte shinggyim masha ni a, n-gun atsam hte sha, shakut yang nau n-mai byin nga ga ai. Madu Karai gaw anhte shinggyim masha ni, shi Madu a ra sharawng ai lam hte nhtan shai ai lam ni, galaw hkawm sa mat wa tim, anhte ni myit malai lu nna, tawng ban jang galoi raitim, mara dat ya nga ai. (Luka 15: 11-31) hta Kasha kaji mahtang wa, shi ang ai, Sali kumhtaw mahkra hpe la nna, Kawa hte tsan ai de sa nhtawm, shi a kumhtaw ni, jai shama kau ai hpang, jam jau hkrum nna, Kawa kaw bai wa ai shaloi, Kawa gaw gat sa nhtawm, kasha hpe sa hkalum la ai lam ka da nga ai.
Madu Karai Kasang gaw, anhte shinggyim masha ni, myit malai lu nna bai wa jang, galoi mung mara raw dat ya na matu la taw nga ai. Kaja wa mung, Madu nraw ya lu ai mara n-nga nga ai. Madu Yesu hpe sat ai ni hpe pi, shi mara dat ya lai wa ai. (Luka 23: 34) “Shaloi Yesu gaw, Wa e, shanhte a mara dat kau ya mu: shanhte galaw ai lam hpe shanhte n chye nga ma ai.” Nga tsun da nga ai. Anhte shi a hpang hkan ai, shi a sape ni, Shi Madu zawn, mara dat ya chye ai ni, byin tai wa na matu Madu saw shaga nga ai.
Mara dat ai lam hte seng nna, Sarama langai mi, shi a jawngma ni hpe, sharin shaga ai lam hpe, garan kachyan mayu ai. Sarama gaw, Jawngma ni hpe shanhte ni mara ndat lu ai ni a, mying hpe Yangyi ntsa kaw, ka nna la sa wa shangun ai. Jawng ma n kau mi gaw, 4,5, la sa wa ma ai. Sarama gaw, Jawng ma ni hpe, dai Yangyi ni hpe, gun hkawm ra ai ngu wu ai. Jawng ma ni gaw, gade ya gun hkawm ra na, ngu san yang, BAT mi tup gun hkawm ra ai ngu tsun wu ai da. Jawng ma ni gaw, Jawng sa, Jawng wa, sa ai shara shagu, gun hkawm ma ai da. Hkawng masum ya na wa yang gaw, nkau mi yat wa ai majaw, manam wa ai da. Bat mi hpring ai shaloi, saya ma gaw jawngma ni a Yangyi ni la nna, maza bang ai ka kaw, sa bang kau ya ai da.
Sarama gaw, nanhte ni Yangyi si gun hkawm yang, ganing nga ai ta? Ngu san wu ai. Dai shaloi, jawngma ni gaw atsawm sha nlu ginsup ai, gun hkawm yang li ai, yet wa nna manam ai, atsawm amai rai nlu nga hkawm ai, ngu htai ma ai. Sarama gaw, masha ni hpe, mara ndat ya ai lam gaw, nanhte ni Yangyi gun hkawm ai hte bung nga ai. Dai majaw mara n dat ai sha, hkum gun hkawm mu ngu shadum dat wu ai.
Madu Yesu gaw anhte shada da galoi mung mara dat hkat ra ai lam hpe aja awa shadum da nga ai.
