Readings: (1st: Ez 34, 11-17; Ps. 22, 1-6; 2nd: I Cor 15, 20-28; Gos: Mt 25, 31-46)

Pranwan ladaw a sumshi mali ya ngu na Laban shani gaw, nawku daw jau ai shaning shagu a jahtum nhtoi rai nga ai. Ahkyak dik gaw, Hkristu Hkawhkam hpe hkungga lara ai lam rai nga ai. Wa Sarabyin Pius XI gaw, mung kan lam a ka-up da ai hpe ninghkap ai hku nna, 1925 ning hta Hkristu Hkawhkam Poi hpe masat ya sai. Ndai poi gaw amyu bawsang yawng a ntsa e Hkristu a hkawhkam aya hpe nsen kaba hte akyu nga na matu yaw shada let ndau shabra da tai lam rai nga ai.

Dai ni na daw 1 hta, Madu gaw, myihtoi wa Ezekela hku nna, anhte hpe matut manoi yu lanu lahku nga ai lam hpe kam shangun ai: “Ngai hkum nan nye a sagu hpung hpe bau maka na nngai… Ngai gaw shanhte a sagu rem wa tengman ai wa tai na nngai.” Ndai chyum daw hta mau hpa langai gaw, “ngai” ngu ai masha langai a mying shingteng hpe 9 lang lang lang ai lam rai nga ai. Langai, ndai gaw Karai Kasang shi a sagu hpung hpe myit lawm ai lam hpe tsun dan na matu re. Lahkawng, ndai lam gaw anhte a aten hta Yesu Hkristu hta shi a ga sadi ni hpring tsup wa sai hpe sakse madun na matu re.

Karai Kasang gaw shi a uphkang ai lam hpe Hkristu woi awn na “manifesto” hpe tang madun da ai. God’s manifesto gaw anhte a prat na mung masa ninghkring ni anhte hpe tang madun ai ni hte shai ai: “manu n jaw ra ai hpaji, nta, tsi tsi hkam la ai lam, mawdaw lam, ahkun hkanse n law ai, bungli law ai, shang gumhpraw law ai zawn re ni rai nga ai. Shanhte a aten garai n ngut shi yang, ga sadi jaw da ai hpe galoi mung n shadik shatup ma ai.

Dai hte nhtan shai ai hku nna, Karai Kasang a manifesto gaw tara rap ra ai hte tengman ai majaw shai nga ai. Dai gaw shingkyit hte karum shingtau ai lam n re. Ndai lam gaw Karai Kasang gaw sadi dung ai Hkawhkam re majaw rai nga ai: “Karai Kasang gaw shinggyim masha n rai, masha galaw ai zawn n galaw ai, ga sadi jaw nna n shadik ai kun? (Bhk 23, 19).

Daw Lahkawng hta, Pawlu gaw Hkristu a hkawhkam aya hte uphkang ai lam hpe shadum ya nga ai. Anhte a hpang jahtum na hpyen rai nga ai si hkrung si htan hpe dang kau ai aten du hkra shi a uphkang ai lam hpe matut manoi galaw nga na re. Kaja wa nga yang, Hkristu gaw shi a si hkam ai hte bai hkrung rawt ai hku nna kaga masha kadai mung n lu galaw ai bungli hpe galaw ngut sai. Dai gaw tsep kawp jahtum na shingjawng poi byin mat ai.

Shi galaw ai gaw: “Anhte hpe tara shang hpyi shawn ai lam ni hte rau tsap nga ai hka hpyi ai laika hpe dawm kau nna, wudang hta jen da nna, dai ni hpe dang kau ai (Kol 2, 14). Shi gaw anhte a matu mung, shi a mungdan a matu mung galaw nu ai. Dai majaw, anhte a matu shi a asai hpe ru kau ya ai shi hte rau anhte nga ra ai. Shi a mungdan hta lawm ra ai. Shi gaw hkawhkam ni a Hkawhkam re majaw, anhte shani shagu shi hpe hkungga jaw ra ga ai.

Dai ni na kabu gara shiga gaw Hkristu a uphkang ai lam gaw tara rap ra ai lam re ai hpe shadum ya nga ai. Dai majaw, langai hte langai hpe tinang galaw ai hte maren tara jeyang na re. Shi a mungdan hta, n tara ai lam, gumhpraw lagu ai lam, hkalem hkalau ai lam, n teng n man ai lam ni n nga na re. De a malai, “Shi gaw galu kaba ai masha amyu baw ni a lapran na ndang kalang lam ni hpe jeyang ya na ra ai. Shanhte gaw shanhte a nhtu ni hpe najawn ni, shanhte a nri ni hpe kadoi nhkyi ni dup kau na mara ai. Amyu baw ni majan galoi mung bai baw nan rai, majan a matu galoi mung bai hkyen na mra ai n rai (Es 2: 4). Shi a hkawhkam dawhkrawng gaw ngwi pyaw simsa lam hte tara rap ra ai lam rai na ra ai.

Hkristu gaw gara kaw up hkang na ngu ai kun? Teng sha nga yang, shawng nnan, anhte a myit masin hta! Dai majaw, anhte a prat hta Hkristu hpe uphkang na ahkang jaw yang she, daini na poi gaw lachyum pru na re ngu ai hpe sadi ra ai. Shi gaw myit masin shagu hta up nga ai rai yang, anhte a mungkan hta mung up nga ai. Shi dai shara hta up nga sai rai yang, kabu gara nna poi galaw nga mu. N rai yang, dai ni shang nna up hkang na matu shi hpe hpyi nem ga. Shi tsun ai gaw, “Ngai gaw chyinghka lam e tsap nga nngai, nang hpaw ya yang, ngai shang nna shi hte rau lu sha na nngai” (Shr 3:20).

Bai nna tsun ga nga yang, dai ni anhte a Hkawhkam Hkristu hpe shagrau ai shaloi, anhte a myit masin mungdan hpe teng sha uphkang na ahkang jaw ga, hpa majaw nga yang, “Bonus pastor” hku nna, Shi hpe anhte a prat a hkawhkam shatai yang, anhte hpa mung n ra na re, teng sha, shi a kaja ai hte matsan dum lama ai myit gaw, anhte a prat tup, anhte hpang hkan nang na re. Kaja wa Shi a hkawhkam htingnu hta ngwi pyaw simsa ai hte nga lu na ga ai.

https://youtu.be/YQnD4O3FLQY

Leave a Reply

Your email address will not be published. Required fields are marked *