
Daini na Ja Chyum Mungga hpe hti sumru yu ai shaloi e, Yesu hpe mu mayu ai Zahke-u a lam na la lu ga ai. Madu Yesu Galile Mare ni hta kabu gara shiga hkaw tsun nga ai aten, Madu Karai Kasang a mungdan gaw du magang wa ra ai. Myit malai lu mu nga nna tsun shadum nga ai. Dai myit malai lu ai ngu ai gaw, hpa hpe ngu mayu ai rai ta? Ya daini e madu a kabu gara shiga hta, anhte hpe jaw ya ai ga shadawn hta e, ya kaw nna, tinang a shut ai lam ni hpe koi yen kau nna, mai kaja ai magam lam ni hpe galaw sa na ngu ai, ntsa lam myit malai lu ai lam hpe tsun mayu ai n re.
Ya daini du hkra galaw shut kau lai mat wa sai. N kaja ai lam ni a matu mara dan hkam la nna, hpang de dai zawn re n hku n kaja ai lam ni hpe galoi e mung n galaw sai ngu ai, jaw ai, jet ai myit malai kaba lu ai lam hpe tsun mayu ai rai nga ai. Shinggyim masha ni hku nna, shingdu tawn da kau ai Zahke-u gaw, Madu Yesu hte hkrum ai hpang jet ai myit malai kaba lu la nga ai. Anhte yawng mung tinang a shut hpyit mara ni a matu, jet ai tengman ai myit malai lu hkra shakut sa ga law.
