101. Ndai lam ni yawng gaw, anhte galoi mung myit dum ra ai matsan masha ni a matu lata la mai ai lam langai mi hpe shabyin ya nga ai, dai gaw kaga masha ni hpe myit tau ya ai myit masa hpe anhte kaw nna hpyi shawn nga ai. “Ndai tsawra myit hte myit dum ai lam gaw shanhte hpe teng sha myit dum ai lam a npawt nhpang rai nna, shanhte a kaja ai lam hpe tam na matu ngai hpe kaja wa shadut ya ai. Ndai gaw matsan mayan ni hpe shanhte a kaja ai lam, shanhte a prat mahkrum madup, shanhte a htunghking, makam masham hpe sak hkrung ai lam ni hta manu shadan ai lam hpe tsun mayu ai. Jet ai matsan dum tsawra myit gaw hkum hkrang hta grau nna tsawm htap ai… Ndai tengman ai hte myit masin mahkra hte ni htep ai lam a npawt nhpang hta sha, matsan mayan ni hpe shanhte a lawt lu lam hta tup hkrak hkan nang lu na re.” Ndai lam a majaw, matsan masha ni a lapran hta kalang lang sa du gawan ai sha n-ga, shanhte zawn shanhte hte rau nga na matu lata la ai ni yawng hpe myit masin mahkra hte chyeju dum ai lam tsun dan nngai. Ndai zawn re ai dawdan lam hpe kabu gara shiga hkaw tsun ai prat hta tsaw dik htum ai masa langai hku sawn la ra ai.

102. Ndai lam hpe yu yang, anhte yawng gaw matsan mayan ni hpe “kabu gara shiga hkaw tsun shangun mayu ai” rai nna, “shanhte hku nna Karai Kasang anhte hpe garan gachyan mayu ai maumwi mausa hpaji hpe” hkap la ra ai lam dan dawng nga ai. N-gun n rawng ai masa hta kaba wa ai, grau sawng ai masa hta asak hkrung lu na matu sharin la ai, kaga kadai mung shanhte hpe ahkyak n la ai ngu ai kam hpa myit hte Karai Kasang hpe kam hpa ai, nsin sin dik ai aten ni hta shada da karum shingtau hkat ai, matsan mayan ni gaw shanhte a myit masin hta makoi da ai lam law law hpe sharin la lu sai. Ndai zawn sak hkrung hkawm sa ai lam hta dai zawn re ai mahkrum madup n lu la ai anhte ni gaw, matsan mayan ni a mahkrum madup rai nga ai hpaji a npawt nhpang kaw nna, teng sha lu la mai ai lam law law nga ai. Anhte a marawn jahtau ai lam ni hpe shanhte a tsin-yam tsindam ni hte n-gun kya ai lam ni hte matut mahkai ai hku nna sha, anhte a prat hpe asan sha galaw na matu anhte hpe shadut ya lu ai sharin achyin ai lam hpe hkam sha lu na re.

https://youtu.be/v6O9ySbGlRE

Leave a Reply

Your email address will not be published. Required fields are marked *