“Dai shaloi e jan, shata shagan ni hta lamik kumla dan pru na ra ai, nammukdara hte hka leng ni a wu kadu ai nsen majaw, ga ningtsa e mung masha amyu ni myit mau ai hte ru tsang hkrum na ma ra ai.” ( Luka 21: 20-28 )
Tsawra ai shiga madat Nu Wa Hpu Nau ni e, daini na lu ai Ja Chyum Mungga hta Madu Karai Kasang bai du sa wa na ten hta byin wa na ni hpe tau nau nna tsun da ai lam rai nga ai. Mahte a kabu gara shiga 24:29 kaw mung, a san sha tsun da nga ai. “Jan gaw nip mat wa nna, shata mung nhtoi mat na ra ai; shagan ni mung, lamu de na di hkrat mat nna, sumsing lamu a atsam ni gaw gari wa na ma ra ai.” Nga nna ka da nga ai.
Anhte shata shagan nmu ai, shana, nsin kata kaw, madu hkrai sha nga hkawm yang pi, hkrit chye nga ga ai. Jan nip mat wa, shata mung nhtoi mat, shagan ni mung di hkrat wa, rai yang gaw, nang ngai n nga yawng hkrit kajawng taw na rai nga ga ai. Shagan ni di hkrat wa jang, mungkan ga gaw, hten za mat na rai nga ai. Hpa majaw ta nga yang, shagan ngu ai gaw, n kau mi Jan ram kaba nna, nkau mi Jan hta grau kaba nga ai. Jan gaw mungkan hta htam 109 kaba nga ai. Ndai ni gaw, jahtum e byin wa na ni hpe shadum da nga ai.
Hkrit hpa ni kade wa byin pru wa na rai nga tim, Madu gaw, “hkum hkrit mu” nga tsun da nga ai. Madu Karai Kasang gaw, Chyum Laika hta hkum hkrit mu nga nna 365 lang tsun da nga ai. Lachyum gaw, laning mi hta 365 ya nga ai majaw, shani shagu Madu hte hkawm sa nga yang, hpa hkrit na lam n nga ai, ngu ai lam rai nga ai.
Tsawra ai Nu Wa Hpu Nau ni e, anhte ni sak hkrung hkawm sa nga ai, ahkying aten ni hta, Madu hte rau hkawm sa na gaw, grai ahkyak dik ai lam rai nga ai. Anhte a shani shagu na bungli bungsi ni hta, Madu n lawm ai hku galaw hkawm sa ai lam ni law wa jang, anhte ni galaw hkawm sa ai lam ni awng dang ai lam n lu ai sha n ga, Madu hte grau tsan ai de du mat wa chye nga ga ai. Madu n lawm ai lam ngu ai gaw masha shada nchye tsawra matsan dum hkat, dip lu dip sha hkat, zingri zing rat galaw hkat, matai dawk hkat re, n kaja ai lam ni rai nga ai. N kaja ai lam ni, chye nga ning len, nkoi gam lu nna, galaw kau re ni rai nga ai.
Mungkan ga e, sak hkrung hkawm sa nga yang, mai kaja ai lam ni, Madu ra sharawng ai lam ni, n hkan sa yang gaw, Madu du sa wa ai ten ni hta byin pru wa na hkrit hpa ni hpe mu jang, Sumsing lamu de du na matu, hpa mung n galaw da shi ai hpe myit dum nna, hkrit gari taw nga nna rai nga ga ai.
Dai majaw sak hkrung hkawm sa nga ai ten hta, Karai Kasang hpe tsawra ai zawn, masha shada tsawra hkungga let, shani shagu Madu hte rau hkawm sa ai a marang e, hpang na prat na matu, tau nau nna, hkyen lajang da nga ga. Shi Madu hte hkawm sa ai a marang e, hkrit hpa mahkra hta na, shi hkye mawoi la na rai nga ai. Madu Yesu gaw, “Hkum hkrit myit” nga tsun da nga ai.
Anhte a, hkying ten shagu, shani shagu, shata shagu, shaning shagu, Madu Karai Kasang hte rau hkawm sa ai ni byin tai hkra shakut nga ga. Madu Karai Kasang hte rau hkawm sa ai a marang e, ndai mungkan ga hta galaw hkawm sa ai ni awng dang ai lam lu la nna, sumsing mundan e mung, Nu Maria, San Pra ai ni hte rau, Hpanwa Ningsang Karai Kasang hpe shakawn lu ai ni byin tai wa mu ga.