Daini na Ja Chyum Mungga hpe hti sumru yu ai shaloi, Madu Yesu tsun shadum ai gaw, shinggyim masha ngu tai wa yang, myit ra marin ai,pawt sindawng ai, manawn masham ai myit masa ni hte n mai hka ai gaw teng sha re. Bai asak hkrung na matu lam shagu hta myit ru tsam pu lam ni mung nga chyalu nan re.
Raitim, myit ru tsam pu taw nga nna sha gaw hpa mung n byin wa lu ai. Asak hkrung nga lu na matu gaw shakut sa ra ai. Shi madu hpe kam sham kam hpa let yawng tsun hpaw dan ra ai. Dai zawn shakut ai lam hta Karai Kasang hpe n mai malap ai. Shi hte rau shakut sa ra ai. Shaloi shi garum la na teng sha re. Na a myit ru tsam pu lam ni hpe mung shayawm kau ya lu na re.
Karai Kasang gaw anhte hpe hkum tsang mu nga nna tsun ai. Madu Yesu gaw anhte hpe myit sim sa lam jaw ya na nga nna n’gun jaw da nga ai. Dai majaw na a hkamja lam, lu lawm lam, kun dinghku lam ni hta n ru, n ra byin ai lam ni hpe Karai Kasang kaw tsun hpaw dan yang, shi Madu n`gun atsam jaw nna, mahkra hpe shi a atsam hte galaw tawt lai lu na teng sha re.
