Daini na Ja Chyum Mungga hpe hti sum ru yu ai shaloi e, Sumsing lamu na yu wa ai asak muk a lam hpe na la lu na ga ai. Dai ni na Chyum laika daw langai hta, San. Stephen a prat hkrun lam hpe na la lu ga ai. Shi gaw chyoi pra ai wenyi hte hpring zup nna, Madu Yesu a lam hpe sakse hkam ai. Madu Yesu a lam hpe hkaw tsun ai wa re nga ka da nga ai. Hkristan ni a prat hta chyoi pra ai wenyi a hpung dagu hte Madu Yesu a lam hkaw tsun ai gaw matut manoi rai nga ai. Madu Karai Kasang mung tara n hkaw hkawm shi yang, chyoi pra ai wenyi a atsam hpe shawng hkam la ai. Shi kashin kamun hkam la ai shaloi e chyoi pra ai wenyi gaw, Madu Yesu a ntsa e yu hkrat wa ai rai nga ai.
Shingrai shi chyoi pra ai wenyi hpe hkap hkam la ngut ai hpang e shi a tara hkaw hkawm ai magam hpe Madu Yesu galaw hpang wa ai re. Bai kasa laika hta e, sape ni a ntsa chyoi pra ai wenyi yu wa ai hpang e she Madu Yesu a lam hpe hkaw tsun sak se hkam hpang wa ai re. Ya daini anhte hpe mung Madu Yesu a lam sak se hkam hkaw tsun na matu Karai Kasang ra sharawng nga ai. Kahtalik kanu nawku hpung a shani shagu tsun ai kyu hpyi ga hta, chyoi pra ai wenyi hpe saw shaga ai kyu hpyi ga hpe, shawng n`nan tsun hpyi na matu n`gun jaw da ai hpe yu yu yang, chyoi pra ai wenyi Karai Kasang ahkyak ai lam hpe madun da nga ai. Dai majaw anhte yawng Madu Yesu a lam sakse hkam lu na matu chyoi pra ai wenyi hpe shani shagu hkap la nga ga law.
