Daini na Ja Chyum Mungga hpe hti sumru yu ai shaloi e, A gyi wa a si mat sai shayi sha hte, sai htaw ai numsha a lam hpe na lu ga ai. Dai ni Madu Yesu a asak hkrung ai mungga a majaw, tinang marai shagu a Karai Kasang kaw kam sham myit mada ai lam ni hpe kalang mi bai sumru dinglik yu na matu anhte hpe saw shaga nga ai. Ndai chyum laika na mabyin lahkawng yan hta, Madu Yesu hta myit masin mahkra hte kam sham kam hpa ai myit majaw shamai shatsai ya ai chyeju hpe hkam la lu sai rai nga ai. Dai zawn sha anhte a prat hta e mung agung alau lam hkrum wa ai ten ni hta, kam sham myit ngu ai ninggang ja ai laknak hpe lang let gasat poi shang ra ai re.

Kasa Pawlu tsun da ai hta, anhte ni lu la hkap la ai makam masham lam hpe, ta tut galaw sa ai lam n nga ai makam masham gaw, chya si (sh) si mat ai makam masham nan sha re nga nna, madi madun tsun shadum ya nga sai re. Dai majaw daini na kabu gara shiga hte maren, Madu Yesu hpe kasi da nna, tinang a htingbu wa hte kaga masha ni hpe, ra kadawn ai lam ni hta garum shaingtau let, anhte hkap la kam sham sai makam masham hpe a sak hkrung nga ai makam masham, lachyum nga ai makam masham byin hkra, shiga madat nga ai nang ngai yawng matut nna, shani shagu sak hkrung nga pra sa ai ten ni hta e, dingyang shakut sa nga ga ngu n`gun jaw dat ai.