Daini na Ja Chyum Mungga hpe hti sum ru yu ai shaloi e, Laika ka ai sara ni hte Hparishe ni a sawt ai myit hte mying dan hkung mayu ai myit ni hpe na la lu ga ai.
N kaja ai lam hpe koi yen, kaja ai lam hpe galaw na matu rapra tara hpe tam na matu, anhte hpe Chyum laika daw (1) hta saw shaga nga sai htb e mren, Madu Yesu gaw anhte yawng hpe tinang a myit kraw kata hta masu jahpai ai hku n re ai sha, tinang a myit kata na sumru da ai lam ni hpe a san brang tsun shaga chye na saw shaga nga ai.
Tsun shaga ai hte maren, ta tut mung hkan galaw sa na matu anhte yawng hpe Madu Yesu saw shaga nga ai.
Shingrai ndai Lusha gam ai aten ladaw hta e, tinang a myit sawn sumru ai lam ni, shani shagu na tsun shaga ai ga si ga ngau ni, galaw sa nga ai magam bungli bungsi ni mahkra gaw, bung pre hkra shakut sa ga . Shing n rai yang, Madu tsun shaga ai gaw amyu mi bai tinang galaw sa wa ai hkrang gaw kaga ga rai, n bung taw yang, masha hpe myit kataw shangun chye ga ai. Hparishe ni zawn, masha e shakawn shagrau na hpe chyu sha ra marin ai myit hpe tawn kau ga. Anhte yawng lam shagu hta, tsun ai hte galaw sa ai bung hkra ndai lusha gam ladaw hta shakut sa nga ga law.
